༢༠༡༤ ཟླ་ ༩ ཚེས་ ༢༢ རེས་གཟའ་ཟླ་བ།
སྔོན་གླེང་།
༄༅། །ཉེ་ལམ་ཕྱི་ལོ་ ༢༠༡༤ ཟླ་ ༩ ཚེས་ ༡༧ རེས་གཟའ་ལྷག་པ་ཉིན་གྱི་མཚན་དཀྱིལ་དུ་ཨ་མདོ་ཀན་ལྷོ་ཁུལ་གཙོད་གྲོང་ཁྱེར་ཉེན་རྟོག་ཁང་གི་སྒོ་ཁ་རུ། གཙོད་གྲོང་ཁྱེར་དུ་སློབ་གྲྭར་འགྲོ་བཞིན་པའི་རང་ལོ་ ༢༢ ཡིན་པའི་སློབ་བུ་ལྷ་མོ་བཀྲ་ཤིས་ལགས་ནས་རྒྱ་གཞུང་ལ་ངོ་རྒོལ་གྱིས་རང་ལུས་མེར་བསྲེགས་གནང་སྟེ་འདས་གྲོངས་སུ་གྱུར་འདུག གནས་ཚུལ་དེ་བྱུང་མ་ཐག་རྒྱ་གཞུང་གི་ཉེན་རྟོག་པས་ཁོང་གི་སྐུ་ཕུང་འཁྱེར་ཡོད་པ་དང་། ཕྱི་ཚེས་ ༡༩ ཉིན་ས་གནས་ཉེན་རྟོག་པས་པུར་ཐལ་ཙམ་ཞིག་ནང་མིར་སྤྲད་ཡོད་གནས་འདུག
རྒྱལ་གཅེས་དཔའ་བོ་ལྷ་མོ་བཀྲ་ཤིས་ལགས་ནི་ཀན་ལྷོ་ཁུལ་བླ་བྲང་བསང་ཆུ་རྗོང་འབོ་ར་ཡུལ་ཚོའི་འོག་ཡོད་པའི་ཨ་མཆོག་སྒྲོག་མདོ་སྡེ་པའི་ཕ་གཅོད་པ་ཚེ་རིང་དང་། མ་གདུགས་དཀར་མཚོ་གཉིས་ཀྱི་བུ་ཡིན་པ་དང་། ད་ལམ་ཁོང་གིས་རྒྱ་གཞུང་ལ་ཞི་རྒོལ་ཆེད་རང་ལུས་མེར་བསྲེགས་གནང་སྟེ་འདས་གྲོངས་སུ་གྱུར་ཡོད་པ་དེ་ནི། ཕྱི་ལོ་ ༢༠༠༩།༢།༢༧ ནས་ ༢༠༡༤།༩།༡༧ བར་བོད་ནང་རང་ལུས་མེར་བསྲེགས་གནང་མཁན་གྲངས་ ༡༣༡ པ་དང་། སྐུ་སྲོག་ཤོར་མཁན་ ༡༡༣ པ་དེ་ཆགས་ཡོད་ཅིང་། གཞན་རྣམས་ས་གནས་གང་དུ་བཙོན་འཇུག་བཀག་ཉར་དང་། འདས་སོན་ཇི་ཡིན་ཤེས་རྟོགས་དཀའ་བའི་གནས་སུ་གྱུར་ཡོད།
གྲོས་ཆོད།
རྒྱལ་གཅེས་དཔའ་བོ་ཁོང་གིས་མཛད་རྗེས་ལ་ཡི་རངས་བསྔགས་བརྗོད་ཞུ་རྒྱུ་དང་། ཚེ་རབས་ཀུན་ཏུ་བྱས་བསགས་སྡིག་ལྟུང་རྣམས་བྱང་ཞིང་དག་ནས་ཐེག་མཆོག་འཁོར་ལོ་བཞི་ལྡན་གྱི་རྟེན་བཟང་རིམ་བརྒྱུད་ཀྱིས་ཐར་པ་དང་ཐམས་ཅད་མཁྱེན་པའི་གོ་འཕང་ལ་མྱུར་དུ་རེག་པའི་སྨོན་འདུན་དང་འབྲེལ། ཁོང་གི་ཤུལ་ལུས་ནང་མི་ལྟོས་བཅས་རྣམས་ལ་གདུང་སེམས་མཉམ་སྐྱེད་ཞུ་རྒྱུ་དང་། ཁོང་རྣམ་པའི་མངོན་འདོད་ལྟར། ཁམས་གསུམ་ཆོས་ཀྱི་རྒྱལ་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རང་ཡུལ་གངས་ཅན་ཞིང་དུ་༸ཞབས་སོར་བདེ་བར་འཁོད་ཐུབ་པ་དང་། གཞིས་བྱེས་བོད་མི་ཡོངས་ལ་རང་དབང་གི་ཉི་མ་མགྱོགས་ནས་མྱུར་དུ་ཤར་བའི་མཆོག་གསུམ་༸རྒྱལ་བ་རྒྱ་མཚོར་གདུང་ཤུགས་དྲག་པོས་གསོལ་འདེབས་ཞུ་རྒྱུ་བཅས་ཀྱི་སྤྱི་མོས་གྲོས་ཆོད་དུ། བོད་མི་མང་སྤྱི་འཐུས་ལྷན་ཚོགས་ཀྱིས་ཕྱི་ལོ་ ༢༠༡༤ ཟླ་ ༩ ཚེས་ ༢༢ ལ།
གྲོས་འཆར་འདོན་མཁན་སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས།
རྒྱབ་སྐྱོར་གནང་མཁན་སྤྱི་འཐུས་བསྟན་པ་ཡར་འཕེལ་ལགས།
