༢༠༡༤ ཟླ་ ༩ ཚེས་ ༢༩ རེས་གཟའ་ཟླ་བ།

༄༅། །ཕྱི་ལོ་ ༢༠༡༤ ཟླ་ ༩ ཚེས་ ༢༧ ཉིན་ཧོང་ཀོང་ནང་རྟེན་གཞི་བྱས་པའི་ Regal Riverside Hotelཞེས་པའི་གསོལ་མགྲོན་ཁང་ནང་བོད་ཀྱི་གློག་བརྙན་དུས་སྟོན་ཞིག་གོ་སྒྲིག་གནང་བ་བརྒྱུད་བོད་ནང་གི་རང་ལུས་མེར་སྲེག་དང་འབྲེལ་བའི་གློག་བརྙན་བསྟན་ཡོད། སྐབས་དེར་རྒྱ་ནག་གཞུང་གི་དངུལ་དངོས་ཀྱི་ཁེ་ཕན་དོན་གཉེར་བ་མི་གྲངས་ ༢༠ ཙམ་བརྒྱུགས་ཡོང་ནས་མི་རུབ་བརྒྱབ་སྟེ་ཟིང་འཁྲུག་སླང་པ་མ་ཟད། ཐེ་ཝན་བོད་རིགས་ཚོགས་པའི་ཚོགས་གཙོ་བཀྲ་ཤིས་ལགས་སུ་ལག་རུབ་རྒྱག་རྩིས་བྱེད་སྐབས། གོ་སྒྲི

ག་ཚོགས་ཆུང་གི་ཚོགས་མི་གཅིག་གིས་བར་འདུམ་བྱེད་རྩིས་བྱས་པར་ཁོང་ལའང་འགྲམ་ལྕག་གཅིག་གཞུས་འདུག ཐེ་ཝན་བོད་རིགས་ཚོགས་པའི་ཚོགས་གཙོ་བཀྲ་ཤིས་ལགས་ཀྱིས་མི་དེ་དག་རྒྱ་གཞུང་གིས་གླ་ཕོགས་བཟའ་མཁན་ས་གནས་ཀྱི་མི་ཁག་གཅིག་ཡིན་ཚུལ་འགྲེལ་བརྗོད་གནང་འདུག

ཉིན་གྲངས་གསུམ་རིང་གི་བོད་ཀྱི་གློག་བརྙན་དུས་སྟོན་འདི་བཞིན་ཧོང་ཀོང་ནང་རྟེན་གཞི་བྱས་པའི་ཧོང་ཀོང་བོད་ཀྱི་རིག་གཞུང་བསྟི་གནས་ཁང་དང་། ཐེ་ཝན་ནང་ཡོད་པའི་༼ཧན་ཙང་༽རྒྱ་བོད་མཐུན་འབྲེལ་ཚོགས་པ་གཉིས་ཀྱིས་གོ་སྒྲིག་གནང་བ་ཞིག་ཡིན་འདུག གནས་ཚུལ་འདི་བཞིན་དྲ་ཐོག་ཁྱབ་སྤེལ་བྱུང་ཡོད་ཀྱང་དུས་སྟོན་ཐོག་རྙོག་འཛིང་སློང་མཁན་དེ་དག་གི་སྐོར་ཞིབ་ཕྲ་འཁོད་མེད།