༢༠༡༤ ཟླ་ ༩ ཚེས་ ༡༦ རེས་གཟའ་མིག་དམར།
༄༅། །གསར་དུ་འོས་འདེམས་གནང་བའི་སྤྱི་ཁྱབ་རྩིས་ཞིབ་འགན་འཛིན་མགོན་པོ་ཕུན་ཚོགས་མཆོག་ནི་ཕྱི་ལོ་ ༡༩༥༣ ལོར་སྡེ་དགེ་དཔལ་ཡུལ་དུ་ཕ་ནོར་བུ་དང་མ་བུ་དཀར་གཉིས་ཀྱི་བུར་འཁྲུངས་ཤིང་། དུས་འགྱུར་བྱུང་སྟེ་ཕྱི་ལོ་ ༡༩༦༣ ལོའི་ནང་རྒྱ་གར་དུ་བཙན་བྱོལ་ལ་འབྱོར་ཏེ་མན་སྤར་ཕན་བདེ་གླིང་གཞིས་ཆགས་སུ་གནས་སྡོད་གནང་། ཐོག་མར་གཞིས་ཆགས་ཀྱི་ཉིན་སློབ་དང་། དེ་རྗེས་མ་སུ་རི་བོད་གཞུང་གཏན་སློབ་ཏུ་སློབ་སྦྱོང་གནང་སྟེ་གཞི་རིམ་སློབ་གྲྭ་ཐོན། ལོ་ཤས་རྗེས་སུད་སི་རོགས་ཚོགས་ཀྱིས་རོགས་རམ་ལ་བརྟེན་ནས་ཀར་ཎ་ཀྲ་ཀ་གཙུག་ལག་སློབ་གཉེར་ཁང་ནས་རྩིས་ཀྱི་མཐོ་སློབ་སྦི་ཀོམ་ཐོན་ཏེ། དཔལ་འབྱོར་ལས་ཁུངས་སུ་འཕྲལ་སེལ་ལས་བྱེད་དང་དཔལ་འབྱོར་ཁྱབ་ཁོངས་ལྡི་ལི་རུམ་གདན་ཕྱིར་ཚོང་ཁང་དུ་རང་ཁོངས་ལས་བྱེད་ལོ་གཅིག་ལྷག་ཙམ་དང་།
ཕྱི་ལོ་ ༡༩༨༡ ལོའི་ནང་ཚང་རྒྱུགས་སུ་ཞུགས་ཏེ་གནས་བརྒྱད་པ་རྒན་དྲུང་གི་གནས་རིམ་ཐོག་དཔལ་འབྱོར་ཁྱབ་ཁོངས་ལྡི་ལི་ཕྱིར་ཚོང་ཁང་དུ་བསྐོ་བཞག་གནང་བར་རྩིས་པའི་ལས་འཁུར་ཞུས། ཕྱི་ལོ་ ༡༩༨༣ ལོར་ཨམ་རི་སར་བོད་གཞུང་བལ་སྤུན་ཚོང་ལས་ཁང་དུ་གནས་སྤོས་ཀྱིས་དངུལ་གཉེར་དང་རྩིས་པའི་ལས་རོགས་གཅིག་ལྕོགས། རིམ་བཞིན་རྩིས་པ། རྩིས་པ་དང་འགན་འཛིན་ལས་རོགས་བཅས་ཀྱི་ལས་འཁུར། ཕྱི་ལོ་ ༡༩༨༨ ལོའི་ནང་ཨམ་རི་སར་བལ་སྤུན་ཚོང་ལས་ཁང་པ་ནེ་པཊ་ལ་གནས་སྤོས་གནང་བར་རྩིས་པ་དང་འགན་འཛིན་ལས་རོགས་ཀྱི་ལས་འཁུར་མུ་མཐུད་ཞུས། ཕྱི་ལོ་ ༡༩༩༠ ལོར་སྒང་ཏོག་བོད་ཀྱི་གསོལ་མགྲོན་ཁང་དུ་གནས་སྤོས་གནང་སྟེ་རྩིས་པ་དང་འགན་འཛིན་ལས་རོགས་ཀྱི་ལས་འགན་རང་འཇགས།
ཕྱི་ལོ་ ༡༩༩༡ ལོར་དཔལ་འབྱོར་ལས་ཁུངས་སུ་གནས་སྤོས་ཀྱིས་དཔལ་འབྱོར་འདུ་འགོད་རྩིས་པའི་ལས་འཁུར་དང་། དེ་རྗེས་དཔལ་འབྱོར་སྔོན་རྩིས་སྡེ་ཚན་གྱི་འགན་འཛིན་དུ་བསྐོ་བཞག ཕྱི་ལོ་ ༡༩༩༢ ལོའི་ནང་གཞུང་ཞབས་འདེམས་བསྐོ་ལྷན་ཁང་གི་སྒྲིག་གཞི་དགོངས་དོན་དྲུང་ཆེ་གཞོན་པའི་གནས་རིམ་དུ་གནས་སྤར། ཕྱི་ལོ་ ༡༩༩༦ ལོར་ཨ་རིར་ལོ་གཅིག་གཞུང་འབྲེལ་སློབ་བསྐྱོད། ཕྱི་ལོ་ ༡༩༩༧ ལོའི་ནང་ཟུང་དྲུང་གནས་རིམ་ཐོག་གནས་སྤར་དང་འབྲེལ་རྩིས་ཞིབ་སྤྱི་ཁྱབ་ལས་ཁང་དུ་བསྐོ་བཞག ཕྱི་ལོ་ ༡༩༩༩ ལོར་བཀའ་དྲུང་ཡིག་ཚང་དུ་གནས་སྤོས།
ཕྱི་ལོ་ ༢༠༠༢ ལོར་དྲུང་ཆེ་ལས་འཕར་གྱི་གནས་རིམ་ཐོག་གནས་སྤར་དང་འབྲེལ་ཆོས་རིག་ལས་ཁུངས་སུ་གནས་སྤོས། ཕྱི་ལོ་ ༢༠༠༩ ཟླ་ ༤ ནས་ཟླ་ ༩ བར་ཆོས་རིག་ལས་ཁུངས་ཀྱི་དྲུང་ཆེ་ལས་ཚབ་དང་ཕྱི་ལོ་ ༢༠༠༩ ཟླ་ ༩ ཚེས་ ༨ ཉིན་ཆོས་རིག་ལས་ཁུངས་ཀྱི་དྲུང་ཆེ་ངོ་མར་བསྐོ་བཞག་གནང་། ཕྱི་ལོ་ ༢༠༡༠ ལོར་སྤྱི་ཁྱབ་རྩིས་ཞིབ་ལས་ཁང་དུ་གནས་སྤོས་ཀྱིས་དྲུང་ཆེའི་ལས་འཁུར་ཞུ་མུས་ཡིན་པ་བཅས་ཀྱི་ལོ་རྒྱུས་སྙིང་བསྡུས་སུ།།
