༢༠༡༤ ཟླ་ ༨ ཚེས་ ༡༨ རེས་གཟའ་ཟླ་བ།

༄༅། །ཕྱི་ལོ་ ༢༠༡༤ ཟླ་ ༨ ཚེས་ ༡༥ ཉིན་གྱི་སྔ་དྲོ་ཆུ་ཚོད་ ༩།༠༠ བའི་ཐོག་དབུས་བོད་མིའི་སྒྲིག་འཛུགས་བཀའ་ཤག་གི་མདུན་ཐང་དུ། དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས་དབུས་ཕྱག་སྦྲེལ་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་དང་། བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ཟུང་དྲུང་ཡན་གྱི་སྲི་ཞུའི་ལས་བྱེད་བཅས་འདུ་འཛོམས་ཐོག་རྒྱ་གར་གྱི་རྒྱལ་གླུ་བཏང་བ་དང་ཆབས་ཅིག་སྲིད་སྐྱོང་མཆོག་གིས་རྒྱ་གར་གྱི་རྒྱལ་དར་མཁའ་དབྱིངས་སུ་སྒྲེང་འཛུགས་གནང་སྟེ། རྒྱ་གར་ལ་རང་བཙན་ཐོབ་ནས་མི་ལོ་ ༦༨ འཁོར་བའི་དུས་དྲན་སྲུང་བརྩི་ཞུས་ཡོད།

སྐབས་དེར་སྲིད་སྐྱོང་མཆོག་གིས་དུས་དྲན་ཐོག་གསུང་དོན།  དེ་རིང་ངས་བོད་བོད་མིའི་སྒྲིག་འཛུགས་ཀྱི་ཚབ་བྱས་ཏེ། རྒྱ་གར་ལ་རང་བཙན་ཐོབ་ནས་ལོ་ ༦༨ འཁོར་བའི་ཉིན་མོར་རྒྱ་གར་གཞུང་དམངས་གཉིས་ལ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་དང་། དམིགས་བསལ་སྐུ་ཞབས་མ་མོ་དི་ (Narendra Modi) མཆོག་གིས་རྒྱ་གར་གྱི་སྲིད་བློན་འགན་དབང་བཞེས་ནས་ལོ་དང་པོ་ཡིན་སྟབས། ཁོང་དང་ཁོང་གི་བཀའ་ཤག་ལ་བོད་མི་ཡོངས་ནས་འཚམས་འདྲི་དང་བྱ་བ་ལམ་ལྷོང་ཡོང་བའི་སྨོན་འདུན་ཡོད་ཅེས་ཞུ་རྒྱུ་ཡིན། ད་ལྟའི་བར་ང་ཚོ་བོད་པ་ཉག་ཕྲ་བའི་གནས་སྐབས་སུ་བོད་མི་ཚོར་རྒྱ་གར་གཞུང་དམངས་ལྟར་བཀའ་དྲིན་ཆེ་བ་གཞན་སུ་ཡང་མེད། བོད་མིའི་སྒྲིག་འཛུགས་ད་ལྟའི་བར་དུ་གནས་ཐུབ་པ་མ་ཟད། ལྷག་པར་གཞིས་ཆགས་དང་དགོན་པ། སློབ་གྲྭ སྨན་ཁང་སོགས་གང་ཅིའི་ཐད་རྒྱ་གར་གཞུང་དང་རྒྱ་གར་གྱི་གནད་ཡོད་མི་སྣ་མང་པོས་སྐུ་ལས་བསྐྱོན་པའི་བཀའ་དྲིན་ལ་བརྟེན་ནས་བྱུང་ཡོད་སྟབས། ཁོང་རྣམ་པ་ཚོས་ང་ཚོར་ཕྱག་རོགས་དང་མཐུན་འགྱུར་གནང་བར་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས།

དེ་བཞིན་སྲིད་སྐྱོང་མཆོག་གི་གངས་ཅན་སྐྱིད་གཤོངས་སུ་བོད་མིའི་སྒྲིག་འཛུགས་ཀྱིས་རྒྱ་གར་གྱི་རང་བཙན་ཉིན་མོ་སྲུང་བརྩི་ཞུས་གྲུབ་བསྟུན། རྡ་ཤོད་ས་གནས་སྲིད་གཞུང་གིས་མགྲོན་འབོད་གནང་བ་ལྟར། རྡ་ཤོད་ཀ་ཅཱ་རིའི་ཉེན་རྟོག་རྩེད་ཐང་དུ་ཕེབས་ཏེ་རྒྱ་གར་རང་བཙན་ཉིན་མོ་སྲུང་བརྩིའི་མཛད་སྒོར་ལྷན་ཞུགས་གནང་ཡོད།