༢༠༡༤ ཟླ་ ༨ ཚེས་ ༢༩ རེས་གཟའ་པ་སངས།
༄༅། །བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྣེ་ཁྲིད་འོག་དེང་སྐབས་ཨོ་སི་ཊོ་ལི་ཡར་གཞུང་འབྲེལ་ཕྱོགས་ཕེབས་གནང་བཞིན་པའི་བོད་མི་མང་སྤྱི་འཐུས་ཐུབ་བསྟན་ལུང་རིགས་ལགས་དང་། སྤྱི་འཐུས་རྣམ་དག་གཙུག་ཕུད་ལགས། སྤྱི་འཐུས་བསོད་ནམས་རྒྱལ་མཚན་ལགས་བཅས་ཀྱིས་ཨོ་སི་ཊོ་ལི་ཡའི་གྲོས་ཚོགས་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཝར་རེན་ཨིན་ཆི་ Warren Entsch མཆོག་གིས་དབུས་ཁུལ་དེའི་གྲོས་ཚོགས་འོག་མའི་འཐུས་མི་དྲུག་དང་གོང་མའི་འཐུས་མི་གཉིས་སོགས་སྲིད་དོན་ཚོགས་པ་འདྲ་མིན་གྱི་གྲོས་ཚོགས་འཐུས་མི་ཁག་གཅིག་དང་མཇལ་འཕྲད་གནང་འདུག་པ་མ་ཟད། བོད་དོན་རྒྱབ་སྐྱོར་ཚོགས་པའི་ཕྱི་འབྲེལ་ལས་དོན་ལྷན་ཚོགས་ཐོག་སྤྱི་འཐུས་ཚོགས་གཙོ་མཆོག་གིས་བོད་ནང་གི་ཛ་དྲག་གནས་སྟངས་སྐོར་ལ་གསུང་བཤད་གནང་འདུག
དེ་ཡང་ཕྱི་ལོ་ ༢༠༡༤ ཟླ་ ༨ ཚེས་ ༢༦ ཉིན་བོད་མི་མང་སྤྱི་འཐུས་རྣམ་པ་སི་ཌེ་ནི་གྲོང་ཁྱེར་ནས་རྒྱལ་ས་ཁེན་བྷེ་རའི་ནང་ཕེབས་ནས་བོད་རིགས་མང་ཚོགས་དང་ཐུག་འཕྲད་ཀྱི་དབུ་མའི་ལམ་དང་བོད་ནང་གི་ཛ་དྲག་གནས་སྟངས། དེ་བཞིན་དོལ་རྒྱལ་སྐོར་སོགས་ལ་ལམ་སྟོན་གསུང་བཤད་གནང་ཡོད་པ་དང། ཕྱི་ཚེས་ ༢༧ ཉིན་ཨོ་སི་ཊོ་ལི་ཡའི་གྲོས་ཚོགས་ཀྱི་འཐུས་མི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་མཆོག་གིས་གཙོས་འཐུས་མི་ཁག་གཅིག་དང་མཇལ་འཕྲད་གནང་ཡོད།
ཉིན་དེའི་ཕྱེད་ཡོལ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ཨོ་སི་ཊོ་ལི་ཡའི་ཕྱི་འབྲེལ་ལས་དོན་དང་བདེ་སྲུང་། ཚོང་ལས་སོགས་ཀྱི་རྒྱུན་ལས་ལྷན་ཚོགས་ Joint Standing Committee on Foreign Affairs, Defence and Trade ཐོག་ད་ལྟའི་བོད་ནང་གི་ཛ་དྲག་གནས་སྟངས་སྐོར་ལ་གསུང་བཤད་གནང་འདུག དེ་ཡང་ལྕམ་སྐུ་ཏེ་རེ་ས་གྷམ་བྷ་རོ་ Ms Teresa Gambaro མཆོག་དབུ་བཞུགས་ཐོག་རྒྱུན་ལས་ལྷན་ཚོགས་སྐབས་འདིར་ཚོགས་གཙོ་མཆོག་གིས་བོད་ནང་གི་དངོས་ཡོད་ཛ་དྲག་དཀའ་ངལ་རྣམས་གསལ་བཤད་གནང་ཐུབ་པ་ནི་རྣག་ཐོག་གཙག་འཁེལ་བྱུང་བ་ལྟ་བུ་ཆགས་ཡོད། གང་ཡིན་བརྗོད་ན་ཉེ་ལམ་རྒྱུན་ལས་ལྷན་ཚོགས་ལ་རྒྱ་ནག་ནས་བོད་རིག་པའི་མཁས་དབང་ཡིན་ཟེར་མཁན་རྒྱ་རིགས་ཁག་གཅིག་གིས་བོད་ནང་གི་གནས་སྟངས་སྐོར་འགྲེལ་བཤད་བྱས་འདུག དེར་བརྟེན་ད་ཆ་རྒྱུན་ལས་ལྷན་ཚོགས་ནས་བོད་རྒྱ་ཕྱོགས་གཉིས་ཀའི་གནད་དོན་གསན་ཞིབ་ཐོག་དངོས་ཡོད་གནས་ཚུལ་དབྱེ་འབྱེད་ཐུབ་རྒྱུར་ཕན་ཐོགས་ཧ་ཅང་བྱུང་འདུག
དེ་བཞིན་ཕྱི་ཚེས་ ༢༨ ཉིན་སྤྱི་འཐུས་རྣམ་པ་མེལ་བྷོན་དུ་ཕེབས་འབྱོར་གྱིས་ཁུལ་དེའི་ནང་གནས་སྡོད་བོད་མིར་གསུང་བཤད་གནང་རྒྱུས་མཚོན་མང་གཙོའི་དུས་ཆེན་སྔ་སྣུར་ཐོག་བོད་མི་མང་སྤྱི་འཐུས་རྣམ་པས་མཉམ་ཞུགས་སོགས་ཀྱི་ལས་འཆར་ཁག་གྲུབ་མཚམས་ཕྱི་ཚེས་ ༣༡ ཉིན་རྒྱ་གར་ལ་ཕྱིར་ཕེབས་གནང་རྒྱུ་ཡིན་འདུག
