༢༠༡༤ ཟླ་ ༨ ཚེས་ ༢༧ རེས་གཟའ་ལྷག་པ།
༄༅། །རྒྱ་གཞུང་གིས་ནགས་ཤོད་འབྲི་རུ་རྫོང་རབ་བརྟན་དགོན་པའི་དགེ་བཤེས་ཚུལ་ཁྲིམས་སྙན་གྲགས་ལགས་སུ་ལོ་དགུ་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་འདུག
དེ་ཡང་བརྒྱུད་ལམ་ཁག་གཅིག་ནང་གནས་ཚུལ་ཐོན་གསལ་ལྟར་ན། རྒྱ་ནག་གཞུང་གིས་ཕྱི་ལོ་ ༢༠༡༢ ཟླ་ ༡༢ ནང་ནགས་ཤོད་འབྲི་རུ་རྫོང་རབ་བརྟན་དགོན་པའི་དཔེ་ཁྲིད་དགེ་རྒན་དགེ་བཤེས་ཚུལ་ཁྲིམས་སྙན་གྲགས་ལགས་ལྷ་སར་འཛིན་བཟུང་བྱས་ཏེ། ལོ་གཅིག་དང་ཟླ་བདུན་ལྷག་གར་སོང་ཆ་མེད་གྱུར་ཡོད་འདུག འོན་ཀྱང་འདི་ལོའི་ཕྱི་ཟླ་ ༧ ཚེས་ ༣༡ ཉིན་རྒྱ་གཞུང་གིས་ཁོང་གི་ནང་མིར་བརྡ་ལན་སྤྲད་དེ་དགེ་བཤེས་ཚུལ་ཁྲིམས་སྙན་གྲགས་ལགས་སུ་ལོ་ ༩ དུས་བཀག་བཙོན་འཇུག་གི་ཁྲིམས་ཐག་བཅད་ཡོད་ཚུལ་དང་། ད་ལྟའི་ཆར་ལྷ་སའི་ཆུ་ཤུལ་བཙོན་ཁང་དུ་བཙོན་འཇུག་བྱས་ཡོད་འདུག
རྒྱ་གཞུང་གིས་དགེ་བཤེས་ཚུལ་ཁྲིམས་སྙན་གྲགས་ལགས་ཀྱི་ནང་མིར་ཁོང་ལ་ནག་ཉེས་ཅི་ཡོད་གསལ་བཤད་ཅི་ཡང་བྱས་མེད་པ་མ་ཟད། བཙོན་ཁང་དུ་སྡོད་རིང་སྡུག་སྦྱོང་མནར་གཅོད་ཚད་ལས་བརྒལ་བ་བཏང་སྟེ། ལུས་ཡོངས་ལ་རྨ་ཁས་ཁེངས་ཡོད་འདུག ཉེ་ལམ་ཁོང་གི་ནང་མི་ཚོས་ཁོང་ལ་སྨན་བཅོས་དང་སྐུ་གཟུགས་བདག་སྐྱོང་ཆེད་སྨན་བཅོས་མཐུན་རྐྱེན་སྤྲོད་རྒྱུ་དང་། དེ་ལྟར་མ་བྱུང་ཚེ་ནང་མིར་རྩིས་སྤྲོད་ཀྱིས་བདག་སྐྱོང་བྱེད་བཅུག་རྒྱུའི་རེ་སྐུལ་བྱས་ཡོད་ཀྱང་། རྒྱ་གཞུང་གིས་ནང་མིར་བརྡ་ལན་སོགས་གང་ཡང་མེད་པར་ལྷག་ཡོད་པ་དང། ཁོང་ནི་ད་ལྟ་རང་ལོ་ ༤༠ ཡས་མས་ཤིག་ཡིན་འདུག་པ་བཅས། །
