༢༠༡༤ ཟླ་ ༨ ཚེས་ ༢༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༨ ཚེས་ ༢༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྔ་དྲོ་ཆུ་ཚོད་ ༩ ཐོག་ཇར་མན་གྲོང་ཁྱེར་ཧམ་བྷག་གི་ཀོང་རེ་སི་ཚོགས་ཁང་ནང་མང་ཚོགས་སྟོང་ཚོ་བརྒལ་བར་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་སྐབས་བཀའ་སློབ་ཕེབས་དོན། སྤྱིར་བཏང་སངས་རྒྱས་པའི་ཆོས་པ་ནང་ཁུལ་ལ་བཀའ་སྒྲུབ་སྐབས་ལུང་གི་སྒྲུབ་བྱེད་ཡོང་གི་རེད། ནང་པ་མ་ཡིན་པར་ལུང་གི་སྒྲུབ་བྱེད་ཀྱི་ཕན་ཐོགས་མེད་པར་བརྟེན་རིག་པས་སྒྲུབ་བྱེད་དགོས་ཀྱི་ཡོད། བདེན་པ་བཞི་ནི་སངས་རྒྱས་པའི་ཆོས་འཁོར་ཚང་མའི་ནང་ཡོད། བདེན་བཞིའི་རྣམ་གཞག་རིག་པའི་ལམ་ནས་གཏན་ལ་ཕབ་རྒྱུ་དེ་ཚད་མ་རྣམ་འགྲེལ་ཡག་ཤོས་ཆགས་ཡོད། གཙོ་བོ་ཐེག་ཆེན་གྱི་བཀའ་སྒྲུབ་རིག་པར་བརྟེན་དགོས་པ་ཞིག་རེད། རིག་པ་ཡང་མཐར་མངོན་སུམ་དང་མྱོང་བར་གཏུག་དགོས་ཀྱི་ཡོད།
དེང་སྐབས་ཚན་རིག་པ་དང་ལྷན་སྐད་ཆ་ཤོད་སྐབས་རིག་པས་སྒྲུབ་སྐབས་དེར་བསམ་བློ་གཏོང་རྒྱུ་ཡོད་སྐོར་བརྗོད་ཀྱི་འདུག ཐེག་ཆེན་བཀའ་སྒྲུབ་རིག་པར་བརྟེན་ནས་སྒྲུབ་དགོས་ཀྱི་ཡོད། དེ་བཞིན་གསང་
སྔགས་ཀྱི་བཀའ་སྒྲུབ་ཅིག་དགོས་ཀྱི་ཡོད། དེ་ཡང་གཙོ་བོ་རིག་པའི་ལམ་ལ་བརྟེན་ནས་སྒྲུབ་དགོས་པ་ཞིག་རེད་འདུག གསང་སྔགས་ཀྱི་ཆོས་འཁོར་ནི་ལྷ་དང་དཀྱིལ་འཁོར་བསྒོམ་རྒྱུ་ཙམ་མ་ཡིན་པར་གཙོ་བོ་གཉུག་མ་ལྷན་ཅིག་གི་འོད་ཟེར་ལམ་དུ་བསྐྱེད་དགོས། ང་ཚོས་ཆོས་བྱེད་པའི་དགོས་དོན་གཙོ་བོ་ནི། རང་གི་སེམས་ལ་བཟོ་བཅོས་རྒྱག་རྒྱུ་དེ་ཡིན། དེའི་དགོས་དོན་ཡང་རང་གཞན་གཉིས་ཀ་མཐར་ཐུག་གི་རྣམ་མཁྱེན་གྱི་གོ་འཕང་ཐོབ་པ་བྱ་རྒྱུ་དེ་ཡིན་སྟབས། དེ་ལྟ་བུའི་འབྲས་བུ་སངས་རྒྱས་ཀྱི་གོ་འཕང་འཐོབ་རྒྱུར་བྱམས་སྙིང་རྗེ་བྱང་ཆུབ་ཀྱི་སེམས་དང་ཆོས་ཐམས་ཅད་ཀྱི་དེ་ཁོ་ན་ཉིད་ཀྱི་གནས་ལུགས་ཏེ། སྟོང་ཉིད་ཀྱི་ལྟ་བ་རང་རྒྱུད་ལ་ངེས་པར་དུ་བསྐྱེད་ཐབས་སུ་སྔར་ལྷག་འབད་བརྩོན་བྱེད་དགོས། དེ་བཞིན་གཞན་ལ་ཕན་ཐོགས་བྱེད་ཐུབ་ན་ཡག་ཤོས་རེད། གལ་སྲིད་ཕན་ཐོགས་བྱེད་མ་ཐུབ་རུང་གཞན་ལ་གནོད་སེམས་ཀྱི་བསམས་པ་ནམ་ཡང་བཅང་རྒྱུ་མེད། སོགས་ཀྱི་བཀའ་སློབ་སྩལ་ཡོད་པ་མ་ཟད། དད་ལྡན་ཆོས་ཞུ་བ་རྣམས་ལ་བྱང་ཆུབ་སེམས་དཔའི་སྡོམ་པ་འབོགས་ཆོག་དང་སྤྱན་རས་གཟིགས་འཇིག་རྟེན་དབང་ཕྱུག་གི་བཀའ་དབང་ཡང་སྩལ་འདུག་པ་བཅས།
