༢༠༡༤ ཟླ་ ༨ ཚེས་ ༡༢ རེས་གཟའ་མིག་དམར།

༄༅། །ཕྱི་ལོ་ ༢༠༡༤ ཟླ་ ༨ ཚེས་ ༧ ཉིན་སྦིར་བོད་མིའི་གཞིས་ཆགས་སུ་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་། ཐེ་ཝན་སོའི་སྨན་པའི་ལྷན་ཚོགས། ཁ་ཐེའི་སྨན་ཁང་ (Cathy’s hospital) དེ་བཞིན་ཐེ་ཝན་འཕྲོད་བསྟེན་མཉམ་འབྲེལ་ཚོགས་པ་ (Taiwan health CO_OP organisation) ཐུན་མོང་ཐོག་སྨན་ཞབས་པ་དང་། འཕྲོད་ལས་པ་རྣམས་ཀྱི་ཟབ་སྦྱོང་གི་མཇུག་བསྡོམས་མཛད་སྒོར་བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་ཕེབས་ཡོད། ཟབ་སྦྱོང་དེ་བཞིན་བོད་མི་མང་ཚོགས་དང་། ལྷག་པར་སློབ་གྲྭ་ཁག་གི་སློབ་ཕྲུག་རྣམས་ལ་སོའི་འཕྲོད་བསྟེན་ཡར་རྒྱས་དང་གོ་རྟོགས་སྤེལ་ཆེད་ལ་དམིགས་པ་ཞིག་ཡིན་འདུག
ཟབ་སྦྱོང་སྐབས་སློབ་གྲྭ་ཁག་གི་སྨན་ཞབས་པ་དང་། འཕྲོད་ལས་པ་རྣམས་ལ་སོ་བདག་གཅེས་བྱེད་སྟངས་དང་། སོའི་བྱེད་ལས་དང་གལ་གནད་སོགས་ཀྱི་སྐོར་ངོ་སྤྲོད་གནང་ཡོད། བཀའ་བློན་མཆོག་གིས་སྦིར་དང་ཅོན་ཏ་ར་ཁུལ་གྱི་འབྲེལ་ཡོད་འཕྲོད་བསྟེན་ལས་ཁུངས་ཀྱི་འགན་འཛིན་དང་འཐུས་མི་རྣམས་ཐུག་འཕྲད་ཀྱིས་གཞིས་ཆགས་ནང་འཕྲོད་བསྟེན་དང་འབྲེལ་བའི་དཀའ་ངལ་ཁག་ལ་གོ་བསྡུར་སྦྱང་བཤད་ཀྱང་གནང་འདུག
ལྷག་པར་བཀའ་བློན་མཆོག་གིས་འཕྲོད་བསྟེན་ལས་ཁུངས་ནས་བོད་མི་རྣམས་ཛ་དྲག་ནད་མནར་སྐབས་སྨན་བཅོས་ཀྱི་མཐུན་འགྱུར་སླད་བོད་མིའི་སྨན་བཅོས་ལྟ་སྐྱོང་ལས་གཞི་སྐོར་ངོ་སྤྲོད་གནང་བ་མ་ཟད། པ་ལམ་པུར་ (Palampur) མཛེ་ནད་སྨན་ཁང་དུ་ཕེབས་ཏེ་སྨན་ཁང་དེའི་ནང་སྨན་བཅོས་བྱེད་བཞིན་པའི་བོད་མི་དྲུག་དང་ཐུག་འཕྲད་ཀྱིས་ཁོང་ཚོའི་འཚོ་བའི་མཐུན་རྐྱེན་དང་འཕྲོད་བསྟེན་སྐོར་བཀའ་འདྲི་ཡང་གནང་འདུག་པ་བཅས།།