༢༠༡༤ ཟླ་ ༨ ཚེས་ ༡༢ རེས་གཟའ་མིག་དམར།
༄༅། །རྒྱ་གཞུང་གིས་ཤག་རོང་པོའི་སེར་སྐྱ་གཉིས་ཀྱིས་རེ་སྐུལ་ལྟར། བླ་མ་ཟླ་བ་ཕྱིར་རང་དགོན་དུ་ཕེབས་བཅུག་ཡོད་པ་མ་ཟད། མི་མང་ལ་བཀའ་ཆོས་གནང་བཅུག་ཡོད་འདུག
དེ་ཡང་བརྒྱུད་ལམ་ཁག་གཅིག་གི་ནང་གནས་ཚུལ་ཐོན་གསལ་ལྟར་ན། ཟླ་འདིའི་ཚེས་ ༥ ཉིན་རྒྱ་གཞུང་གིས་ཤག་རོང་པོ་སེར་སྐྱ་མི་མང་གིས་རེ་སྐུལ་ཞུས་དོན་ལྟར། ལོ་བདུན་གྱི་བཙོན་འཇུག་ཁྲིམས་ཐག་བཅད་ཡོད་པའི་དགོན་པའི་བླ་མ་ཟླ་བ་མཁྱེན་རབ་དབང་ཕྱུག་བསམ་གཏན་བསྟན་པའི་རྒྱལ་མཚན་དཔལ་བཟང་པོ་མཆོག་ས་གནས་སེར་སྐྱ་མི་མང་གིས་ཕེབས་བསུའི་ཁྲོད་ཕྱིར་དགོན་པར་ཕེབས་བཅུག་ཡོད་པ་མ་ཟད། མི་མང་ལ་བཀའ་དབང་དང་གསུང་ཆོས་བཅས་གནང་བཅུག་ཡོད་འདུག
ཕྱི་ལོ་ ༢༠༡༠ ཟླ་ ༥ ཚེས་ ༢༠ ཉིན་རྒྱ་གཞུང་གིས་ཤག་རོང་པོ་དགོན་པའི་བླ་མ་ཟླ་བར་ལྔ་ཉི་ཤུའི་དོན་རྐྱེན་དང་འབྲེལ་བ་ཡོད་པའི་མིང་འདོགས་དང་། རོང་པོ་ཆོས་རྗེའི་ཡང་སྲིད་རྩད་གཅོད་ཐད་༸གོང་ས་༸སྐྱབས་མགོན་ཆེན་པོ་མཆོག་དང་འབྲེལ་བ་བྱས་པའི་ཉེས་མིང་འོག་ལྷ་སར་འཛིན་བཟུང་བྱས་ཡོད་པར་མ་ཟད། ལོ་ ༧ ཁྲིམས་ཐག་བཅད་ཡོད་འདུག ཕྱིས་སུ་བླ་མ་ཁོང་སྐུའི་སྙུང་གཞི་དང་ལོའི་གནས་བབ་ཀྱིས་དབང་གིས་རང་ཁྱིམ་དུ་སྨན་བཅོས་བྱེད་རྒྱུའི་གོ་སྐབས་སྤྲད་ཡོད་ཀྱང་། ནག་ཆུ་ཐོ་སྒོ་ལ་མན་ཆད་དུ་འགྲོ་བསྐྱོད་མི་ཆོག་པ་དང་། རྒྱུན་དུ་འདྲི་རྩད་དང་ལྟ་རྟོག་འོག་བཞུགས་དགོས་བྱུང་ཡོད་འདུག
༢༠༡༣ ཟླ་ ༧ ཚེས་ ༣ ཉིན་རྒྱ་གཞུང་གིས་ཤག་རོང་པོ་དགོན་པ་སྒོ་བརྒྱབ་པ་དང་། དམག་མི་ ༢༠༠༠ ལྷག་མངགས་གཏོང་གིས་སེར་སྐྱ་གཉིས་ཀ་གང་བྱུང་འཛིན་བཟུང་དང་དྲག་གནོན། སློབ་གསོའི་ལས་འགུལ་སོགས་སྤེལ་ཡོད་པ་མ་ཟད། དགོན་པའི་ལས་སྣེ་གྲྭ་དུང་ཕུག་ལགས་དང་ངག་དབང་བྱང་ཆུབ་ལགས། གྲྭ་ངག་དབང་ཐོགས་མེད་ལགས། མི་སྐྱ་བཀྲ་ཤིས་དོན་གྲུབ་ལགས་བཅས་འཛིན་བཟུང་བྱས་ཡོད།
རྗེས་སུ་ཁོང་རྣམ་རིམ་བཞིན་གློད་བཀྲོལ་བཏང་ཡོད་པ་དང་། ངག་དབང་ཐོགས་མེད་ལགས་དང་མཁྱེན་རབ་ཐོགས་ལགས་མེད་གཉིས་ཀྱང་ལོ་ ༢ རིང་ལྷ་སར་བཙོན་འཇུག་བྱས་རྗེས་གློད་བཀྲོལ་བཏང་འདུག ཉེ་ལམ་རྒྱ་གཞུང་གིས་བླ་མ་དགོན་པར་ཕེབས་བཅུག་པ་དང་མི་མང་ལ་བཀའ་ཆོས་གནང་བཅུག་ཡོད་ཀྱང་། ས་གནས་མི་མང་ཁྲོད་རྒྱ་གཞུང་གིས་འདི་ལྟར་བྱེད་དོན།
ད་བར་ཤག་རོང་པོ་དགོན་པའི་གནས་ཚུལ་ཕྱི་ཕྱོགས་ཀྱི་གསར་འགྱུར་བརྒྱུད་ལམ་དུ་དྲིལ་བསྒྲགས་ཤུགས་ཆེར་ཕྱིན་ཡོད་སྟབས། ཁོང་ཚོས་ཕྱི་ཕྱོགས་སུ་ཆོས་དད་རང་དབང་ཡོད་པའི་རྣམ་པ་སྟོན་བྱེད་དང་གཡོ་བྱུས་ཤིག་ཡིན་སྲིད་པའི་དོགས་པ་བྱེད་ཀྱི་ཡོད་འདུག
