༢༠༡༤ ཟླ་ ༨ ཚེས་ ༡༢ རེས་གཟའ་མིག་དམར།
༄༅། །བརྒྱུད་ལམ་ཁག་གི་ནང་གནས་ཚུལ་ཐོན་གསལ་ལྟར་ན། མཚོ་སྔོན་འབའ་རྫོང་གི་དགེ་འདུན་པ་བྱང་ཆུབ་རྒྱལ་མཚན་ལགས་ལོ་གཉིས་རིང་མཚོ་སྔོན་ཟི་ལིང་གི་བཙོན་ཁང་ཞིག་ཏུ་བཙོན་འཇུག་བྱས་རྗེས། ཕྱི་ཟླ་ ༧ ཚེས་ ༢༨ ཉིན་གློད་བཀྲོལ་བཏང་ཡོད་པ་དང་། ཕྱི་ཟླ་ ༨ ཚེས་ ༨ ཉིན་ཁོང་འབའ་ཤིང་ཁྲི་དགོན་པའི་སློབ་གླིང་དུ་འབྱོར་སྐབས། ཆོས་གྲོགས་དགེ་འདུན་པ་རྣམས་ནས་ཕེབས་བསུ་ཟབ་རྒྱས་ཞུས་ཡོད་འདུག འོན་ཀྱང་ད་ལྟའི་ཆར་ཁོང་གི་གཟུགས་གཞིའི་གནས་སྟངས་དང་ཞིབ་ཕྲའི་གནས་ཚུལ་གང་ཡང་ཤེས་རྟོགས་བྱུང་མི་འདུག
བྱང་ཆུབ་རྒྱལ་མཚན་ལགས་ནི། ཕྱི་ལོ་ ༢༠༡༢ ཟླ་ ༣ ཚེས་ ༡༨ ཉིན་མཚོ་སྔོན་མཚོ་ལྷོ་ཁུལ་གད་པ་སུམ་མདོ་འམ་འབའ་རྫོང་གི་འབའ་ཤིང་ཁྲི་དགོན་པའི་དགེ་འདུན་པས་གཙོས་ས་གནས་བོད་མི་སྟོང་ཚོ་བརྒལ་བས། རྒྱ་ནག་གི་དྲག་པོའི་སྲིད་བྱུས་ལ་ཞི་བའི་ངོ་རྒོལ་གནང་བའི་སྐབས་འཛིན་བཟུང་བྱས་པ་ཞིག་ཡིན་པ་དང་། སྐབས་དེར་རྒྱ་ནག་གཞུང་གིས་དྲག་གནོན་བྱས་པ་མ་ཟད། བོད་མི་སེར་སྐྱ་མི་གྲངས་ ༦༠ མ་ཟིན་ཙམ་ཞིག་འཛིན་བཟུང་བྱས་ཡོད་པའི་ནང་ནས་ཁག་གཅིག་དུས་ཡུན་ཐུང་ངུའི་ནང་གློད་བཀྲོལ་བཏང་ཡོད་ཀྱང་། ཤིང་ཁྲི་དགོན་པའི་དགེ་འདུན་ཉི་ཤུ་ཡས་མས་ཤིག་གློད་བཀྲོལ་མ་བཏང་བར་བཀག་ཉར་བྱས་རྗེས། ཕྱི་ཟླ་ ༧ ཚེས་ ༡༤ ཉིན་ཁོང་ཚོའི་ནང་ནས་དགེ་འདུན་བསྟན་འཛིན་རིག་གྲོལ་ལགས་གློད་བཀྲོལ་བཏང་ཡོད་ཅིང་། ད་དུང་ཡང་ཁོང་ཚོའི་ནང་ནས་ཉུང་མཐར་ཡང་བོད་མི་གཉིས་བཙོན་འཇུག་བྱེད་མུས་ཡིན་འདུག
ཞི་བའི་ངོ་རྒོལ་གྱི་དོན་རྐྱེན་བྱུང་རྗེས་རྒྱ་ནག་གཞུང་གིས་འབའ་ཤིང་ཁྲི་དགོན་པར་ལས་དོན་རུ་ཁག་མངགས་གཏོང་གིས་རྒྱལ་གཅེས་ཆོས་གཅེས་ཟེར་བའི་སློབ་གསོ་ཡང་ནས་ ཡང་དུ་སྤེལ་བ་དང་། དགོན་པར་ཕྱོགས་ཡོངས་ནས་དམ་བསྒྲགས་དང་ལྟ་ཞིབ་བྱེད་ཤུགས་ཆེ་རུ་བཏང་ཡོད་འདུག
