༢༠༡༤ ཟླ་ ༨ ཚེས་ ༥ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༨ ཚེས་ ༤ ཉིན་དབུས་བོད་ཀྱི་བུད་མེད་ལྷན་ཚོགས་ཀྱིས་གོ་སྒྲིག་འོག་༼བཙན་བྱོལ་བོད་ཀྱི་བུད་མེད་ལ་ཁྲིམས་དོན་གྱི་ནུས་སྟོབས་གོང་འཕེལ།༽ ཞེས་པའི་ཉིན་བཞིའི་རིང་གི་ཟབ་སྦྱོང་ཞིག་རྡ་ས་མེཀ་གྷན་བོད་ཀྱི་གསོལ་མགྲོན་ཁང་དུ་འགོ་འཛུགས་གནང་འདུག
དེ་ཡང་གོང་ཚེས་ཉིན་གྱི་སྔ་དྲོ་ ༩།༠༠ ཐོག་མཛད་སྒོ་དབུ་འཛུགས་ཀྱི་ཐོག་མར་བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་ལགས་ཀྱིས་སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གཙོས་སྤྱི་འཐུས་ཤར་གླིང་ཟླ་སྒྲོན་ལགས་དང་། གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམ་པ། ས་གནས་ཁག་གི་ཚོགས་གཙོས་དབུས་རྒྱུན་ལས་དང་སྐུ་ཚབ། ལྡི་ལི་མཐོ་སློབ་ཀྱི་སློབ་མ་བཅས་ཁྱོན་མི་གྲངས་ ༥༨ བརྒལ་བ་ལྷན་འཛོམས་བྱུང་བའི་དབུས་སུ་ཟབ་སྦྱོང་གི་དམིགས་ཡུལ་ངོ་སྤྲོད་གནང་གྲུབ་མཚམས་སྐུ་མགྲོན་གཙོ་བོ་མཆོག་གིས་ཟབ་སྦྱོང་དབུ་འབྱེད་ཀྱི་གསུང་བཤད་གནང་དོན།
ཐོག་མར་ངས་འདིར་ཕེབས་པའི་ཁྱེད་རྣམ་པ་ཚང་མར་འཚམས་འདྲི་ཞུ་རྒྱུ་ཡིན། སྤྱིར་བཏང་ཕོ་མོ་དབྱེ་བ་འབྱེད་རྒྱུ་ནི། མིའི་བྱུང་རབས་ལོ་རྒྱུས་དང་སྤྱི་ཚོགས་ཀྱི་བསམ་བློ་འཁྱེར་སྟངས་སོགས་མང་པོ་ཞིག་ལ་འབྲེལ་བ་ཆགས་ཡོད། གཙོ་བོ་སྤྱི་ཚོགས་ཀྱི་བསམ་བློ་འཁྱེར་སྟངས་ལ་འགྱུར་བ་ཐེབས་དགོས་པ་གལ་ཆེན་པོ་ཆགས་ཡོད། དུས་ཀྱི་འགྱུར་བ་ཤུགས་ཆེན་པོ་འགྲོ་མུས་ལྟར། སྤྱི་ཚོགས་ཀྱི་འགྱུར་བ་ཤུགས་ཆེན་པོ་འགྲོ་བཞིན་ཡོད་སྟབས། སྤྱི་ཚོགས་ནང་ཕོ་དང་མོ་ལ་ལྟ་སྟངས་ཀྱི་གནས་བབ་དེ་དངོས་ཡོད་གནས་སྟངས་དང་མཐུན་པར་འགྲོ་རྒྱུ་གལ་ཆེ་ཡིན། བོད་མིའི་སྒྲིག་འཛུགས་ལྟ་བུའི་ནང་གནས་བབ་འདྲ་མིན་མང་པོ་ཞིག་ཡོད་སྟབས། གནས་བབ་སོ་སོ་དང་ལྷག་པར་གཞི་རིམ་ནས་བཟུང་ཕོ་མོ་དབྱེ་འབྱེད་མི་བྱེད་པ་དང་། ཐོབ་ཐང་འདྲ་མཉམ་སྤྲོད་དགོས་པ་གནད་འགག་ཆེན་པོ་ཡིན། དེའི་གོ་རྟོགས་གཙོ་བོ་ཕ་ལ་དགོས་པ་ཞིག་ཆགས་ཡོད། མ་ལ་ནམ་རྒྱུན་ནས་བསམ་བློའི་ནང་དེ་ཡོད་མུས་རེད། འོན་ཀྱང་མའི་བསམ་བློར་ཡོད་བཞིན་དུ་ཕ་དབང་ཆེ་དྲགས་ཏེ། བསམ་ཚུལ་བཤད་མ་ཐུབ་པའི་གནས་སྟངས་མང་པོ་ཞིག་ཡོང་གི་ཡོད། གཙོ་བོ་ཕ་ལ་བསམ་བློ་རྒྱ་ཆེན་པོ་ཡོད་ན་མའི་ངོས་ནས་ཡོད་མུས་རེད། ཐོག་མར་ཁྱིམ་ཚང་སོ་སོའི་ནང་ནས་འདྲ་མཉམ་དང་གོ་སྐབས་བསྐྲུན་ཐུབ་ན། རིམ་བཞིན་སྤྱི་ཚོགས་ཁྱོན་ཡོངས་དང་རྒྱལ་ཁབ་ཧྲིལ་པོར་ཡོང་གི་རེད། གནད་དོན་གཞན་ཞིག་ནི། བུད་མེད་ཚོའི་ངོས་ནས་གོ་སྐབས་ལེན་ཐུབ་དགོས་པ་དེ་རེད། ཐོབ་ཐང་ཡོད་མེད་ཀྱི་སྐད་ཆ་གཅིག་པུ་མ་རེད། བཙན་བྱོལ་སྤྱི་ཚོགས་ནང་སྔར་དང་མི་འདྲ་བར་དེང་སྐབས་གང་ཙམ་འགྱུར་བ་ཕྱིན་ཡོད། ཐོབ་ཐང་ནི་བཅའ་ཁྲིམས་ཀྱིས་གཙོས་ཁྲིམས་དང་སྒྲིག་གཞིའི་ནང་གསལ་ཡོད། གོ་སྐབས་ལེན་ཐུབ་མིན་བུད་མེད་ཚོར་རག་ལས་ཡོད། སྐབས་རེ་ང་རང་ཚོ་བོད་པ་ཙམ་མིན་པར་སྤྱི་ཚོགས་གཞན་མང་པོའི་ནང་ཡོང་གི་ཡོད། བུད་མེད་ཀྱི་དགྲ་གཙོ་བོ་བུད་མེད་ཆགས་རྒྱུ་ཉེན་ཁ་དེ་འདྲ་ཡོང་གི་འདུག བུད་མེད་ནང་ཕན་ཚུན་རོགས་སྐྱོར་བྱེད་དགོས་རྒྱུ་ཧ་ཅང་གལ་ཆེན་པོ་ཆགས་ཀྱི་ཡོད། སྤྱི་ཚོགས་ནང་ཕོ་མོ་འདྲ་མཉམ་མི་འདུག་བརྗོད་སྐབས། འདྲ་མཉམ་མི་སྤྲོད་མཁན་བུ་ཡིན་པ་དང་། ཐོབ་ཐང་མ་རག་མཁན་བུད་མེད་ཡིན་པ་ལྟ་བུ་རང་བཞིན་གྱིས་གོ་བཞིན་ཡོད་ཀྱང་། ཚང་མ་བུའི་ནོར་འཁྲུལ་མ་རེད། ང་རང་སྔོན་མ་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་འགན་འཛིན་ཡིན་སྐབས། མཐོ་སློབ་དང་འཛིན་རིམ་བཅུ་གཅིག་གི་སློབ་མ་ཚོར་ཟབ་སྦྱོང་སྤྲོད་སྐབས། ག་དུས་ཡིན་རུང་བུད་མེད་ཉུང་ཉུང་ཡོང་གི་འདུག གོ་སྐབས་ཡོད་དུས་ལེ
ན་མ་ཐུབ་ན་གཞན་ལ་བཤད་རྒྱུ་གང་ཡང་མེད། སོ་སོའི་ལག་པར་ཡོད་པ་དེ་འཛིན་མ་ཐུབ་པར། གཞན་ནས་སྤྲོད་ཀྱི་མི་འདུག་ཅེས་བརྗོད་ན་རྒྱུ་མཚན་གང་ཡང་མེད། ཅེས་སོགས་ཀྱི་གསུང་བཤད་གནང་།
དེ་རྗེས་ཟབ་ཁྲིད་བ་གཙོ་བོ་རྒྱ་གར་གྱི་བུད་མེད་ཐོབ་ཐང་རྩོད་ལེན་པ་དང་སྤྱི་ཚོགས་ཚན་རིག་པ། ལྷོ་ཨེ་ཤི་ཡའི་ཕོ་མོ་འདྲ་མཉམ་གྱི་གནད་དོན་ཐོག་སྦྱོང་བརྡར་གནང་མཁན་ལྕམ་སྐུ་ཀམ་ལ་བྷ་སིན་ (Kamla Bhasin) ལགས་ཀྱིས་ཀྱང་གསུང་བཤད་གནང་།
མཐར་སྐུ་མགྲོན་གཙོ་བོ་མཆོག་དང་ལྕམ་སྐུ་ཀམ་ལ་བྷ་སིན་ལགས་གཉིས་ཀྱིས་དབུས་བོད་ཀྱི་བུད་མེད་ལྷན་ཚོགས་ནས་བོད་དབྱིན་གཉིས་ནང་ཡོད་པའི་རྒྱ་གར་གྱི་རྩ་ཁྲིམས་ནང་བུད་མེད་སྲུང་སྐྱོབ་སྐོར་གྱི་ཁྲིམས་ལུགས་ལག་དེབ་གཅིག་དང་། ཕྱི་ལོ་ ༢༠༡༣ ལོའི་བཙན་བྱོལ་ནང་གི་བོད་རིགས་བུད་མེད་ཚོའི་སྐོར་གྱི་སྙན་ཐོ་དེབ་གཅིག་བཅས་དཔེ་དེབ་ཁག་གཉིས་རིམ་བཞིན་དབུ་འབྱེད་གནང་།
ཐེངས་འདིའི་ཟབ་སྦྱོང་འདི་བཞིན་ཕྱི་ཟླ་ ༨ ཚེས་ ༤ ནས་ ༧ བར་སྤྲོད་རྒྱུ་ཡིན་འདུག
