༢༠༡༤ ཟླ་ ༨ ཚེས་ ༢༦ རེས་གཟའ་མིག་དམར།
༄༅། །འདི་གར་ཐེ་ཝན་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཉེ་བའི་ཆར་བོད་ཁམས་སྡེ་དགེ་འདན་མ་ཁུལ་གྱི་གནས་སྟངས་ཛ་དྲག་ཏུ་འགྲོ་བཞིན་ཡོད་པའི་སྐབས་འདིར། ཐེ་ཝན་བོད་ཀྱི་ས་གནས་གཞོན་ནུའི་མིང་ཐོག་ནས་ཐེ་ཝན་སྲིད་འཛིན་དང་། སྲིད་བློན། གྲོས་ཚོགས་ཀྱི་ཚོགས་གཙོ། ཐེ་ཝན་རྒྱ་ནག་སྐམ་ས་ལས་དོན་ལྷན་ཁང་གི་འགན་འཛིན། སྲིད་དོན་ཚོགས་པ་ཆེ་ཁག་བཞིའི་ཚོགས་གཙོའི་མཚན་ཐོག་ཏུ་ཡིག་ཐོག་འབོད་སྐུལ་ཞུ་ཡིག་ཕུལ་བར་ཕྱིན་ཡོད།
ཕྱི་ཟླ་ ༨ ཚེས་ ༢༦ སྔ་དྲོ་ཆུ་ཚོད་ ༩ པའི་ཐོག་ཐེ་ཝན་བོད་ཀྱི་ས་གནས་གཞོན་ནུའི་ཚོགས་གཙོ་སྐལ་བཟང་ལྷུན་གྲུབ་ལགས་དང་། ཚོགས་གཞོན་བསྟན་འཛིན་ཆོས་འཕེལ་ལགས། ས་གནས་བོད་རིགས་ཚོགས་པའི་ཚོགས་ཟུར་དགྲ་བཅོམ་པ་ལགས་བཅས་ཀྱིས་ཐེ་ཝན་སྲིད་འཛིན་ཕོ་བྲང་དང་། སྲིད་འཛིན་ལས་ཁུངས། ཐེ་ཝན་གྲོས་ཚོགས། རྒྱ་ནག་སྐམ་ས་ལས་དོན་ལྷན་ཁང་། སྲིད་དོན་ཚོགས་པ་བཅས་ཀྱི་ལས་ཁུངས་སུ་བཅར་ནས་བོད་ལུགས་དཀར་གཙང་གི་མཇལ་དར་མཉམ་འབོད་སྐུལ་ཞུ་ཡིག་ཕུལ་འདུག
འབོད་སྐུལ་སྙན་ཞུ་ནང་གཙོ་བོ་གསལ་དོན། རྒྱ་གཞུང་གིས་བོད་དབང་བསྒྱུར་བྱས་ནས་ད་བར་བོད་ནང་སྲིད་བྱུས་ཇེ་སྡུག་དང་། བོད་མི་རྣམས་དཀའ་སྡུག་གི་གནས་སྟངས་འོག་ལྷུང་ཡོད་པ་མ་ཟད། རྒྱ་གཞུང་གིས་བོད་མིར་ཆེས་དམ་བསྒྲགས་ཀྱི་བྱེད་བབ་ལ་བརྟེན། བོད་མིས་ཞི་བའི་ངོ་རྒོལ་དང་རང་ལུས་མེར་སྲེག་གི་དོན་རྐྱེན་བྱུང་ཡོད།
ཉེ་ཆར་ནས་བཟུང་བོད་ཁམས་སྡེ་དགེ་འདན་མ་སྡེ་དཔོན་དབང་གྲགས་ལགས་རྒྱ་གཞུང་གིས་བཙན་འཁྲིད་བྱས་པར་བརྟེན་ས་གནས་བོད་མིས་གློད་བཀྲོལ་ཡོང་བའི་རེ་སྐུལ་བཏོན་
པར། རྒྱ་གཞུང་གིས་དྲག་གནོན་བྱས་ཡོད་པ་དང་། ཁུངས་ལྡན་གནས་ཚུལ་ལ་གཞིགས་ན་ད་བར་བོད་མི་བཞི་ཙམ་འདས་གྲོངས་སུ་གྱུར་ཡོད་འདུག ས་གནས་ཀྱི་གནས་སྟངས་ཛ་དྲག་ཏུ་གྱུར་ཡོད་སྟབས། འཛམ་གླིང་རྒྱལ་ཁབ་ཁག་གི་སྲིད་གཞུང་དང་། གྲོས་ཚོགས། འགྲོ་བ་མིའི་ཐོབ་ཐང་ཚོགས་པ། བོད་མིར་རྒྱབ་སྐྱོར་གནང་མཁན་གྱི་ཚོགས་སྡེ་ཁག་ལ་འབོད་སྐུལ་ཞུ་རྒྱུར་རྒྱ་ནག་གཞུང་ལ་གནོན་ཤུགས་སྤྲད་དེ་བོད་ནང་རང་དབང་ཅན་གྱི་རྟོག་ཞིབ་པ་གཏོང་དགོས་ཞེས་དང་། མཐའ་མར་ཐེ་ཝན་གཞུང་དང་སྲིད་དོན་ཚོགས་པ་ཁག་གིས་བོད་མིར་གདུང་སེམས་མཉམ་སྐྱེ་དང་། རྒྱ་ནག་གཞུང་གི་བྱ་ངན་ལ་སྐྱོན་བརྗོད་དགོས་པའི་འབོད་སྐུལ་ཞུས་ཡོད་འདུག
