༢༠༡༤ ཟླ་ ༨ ཚེས་ ༤ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ཕྱི་ལོ་ 
༢༠༡༤ ཟླ་ ༨ ཚེས་༤ ཉིན་བཏང་གནས་ནང་འཁོད་དོན། ཕྱི་ཟླ་ ༧ ཚེས་ ༣༡ མཚན་མོ་ཐེ་ཝན་ལྷོ་ཕྱོགས་ཀའོ་ཞུང་གྲོང་ཁྱེར་གྱི་ས་འོག་རྡོ་བཞུན་རླངས་རྫས་འབར་གས་བྱུང་ནས་མི་གྲངས་ ༢༨ ལ་སྲོག་སྐྱོན་དང་། མི་གྲངས་ ༢༨༠ ལྷག་ལ་རྨས་སྐྱོན་བྱུང་བར་ཐེ་ཝན་དུ་གནས་སྡོད་བོད་མི་རྣམས་ཀྱིས་གདུང་སེམས་མཉམ་སྐྱེའི་མཆོད་འབུལ་སྨོན་ལམ་ཞིག་ཚོགས་ཡོད། དེ་ཡང་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་དང་། ཐེ་ཝན་བོད་རིགས་ཚོགས་པ་ཐུན་མོང་གིས་ཕྱི་ཟླ་ ༨ ཚེས་ ༡ དགོང་དྲོ་ཆུ་ཚོད་ ༧ པའི་ཐོག་དོན་གཅོད་ལས་ཁུངས་ཀྱི་ནང་ཆོས་འཛིན་ཁང་དུ་ཐེ་ཝན་རྒྱལ་སྤྱིའི་བོད་བརྒྱུད་ནང་བསྟན་མཐུན་ཚོགས་ཀྱི་སློབ་སྟོན་པ་རྫོགས་ཆེན་མགོན་པོ་རིན་པོ་ཆེ་མཆོག་དང་། དགའ་ལྡན་ཤར་རྩེ་ནོར་གླིང་གྲྭ་ཚང་གི་མཁན་ཟུར་བསོད་ནམས་པ་སངས་རིན་པོ་ཆེས་དབུས་བོད་བརྒྱུད་ཆོས་ལུགས་རིས་མེད་ཀྱི་བླ་སྤྲུལ་དགེ་བཤེས་རྣམ་པ་དང་། ཐེ་ཝན་དུ་གནས་སྡོད་བོད་རིགས། ཐེ་ཝན་མི་རིགས་བཅས་ཁྱོན་མི་གྲངས་ ༥༠ ལྷག་མཉམ་ཞུགས་གནང་སྟེ་འདས་གྲོངས་སུ་གྱུར་བ་རྣམས་ལ་མཆོད་འབུལ་དང་བསྔོ་བ་སྨོན་ལམ་གནང་། ཐོག་མར་མགོན་པོ་རིན་པོ་ཆེ་མཆོག་གིས་གསུངས་དོན། ཀའོ་ཞུང་གྲོང་ཁྱེར་གྱི་གོད་ཆག་འདིས་མི་རྟག་པ་ཞེས་པའི་ངོ་བོ་མཚོན་ཐུབ་པ་དང་། འགྲོ་བ་སེམས་ཅན་ཐམས་ཅད་རང་གི་ཕ་མ་བྱེད་མྱོང་བས། ད་རེས་འདས་གྲོངས་སུ་གྱུར་བ་རྣམས་རང་ཉིད་ཀྱི་ཕ་མར་ངོས་བཟུང་ནས་བསྔོ་བ་སྨོན་ལམ་འདོན་དགོས་པ་དང་། བོད་མི་ཚོའི་ངོས་ནས་ཐེ་ཝན་མི་རིགས་ལ་འོ་ཆུ་འདྲེས་པའི་མཛའ་སེམས་བཅངས་ནས་ཉིན་ཞག་ཞེ་དགུ་རིང་བསྔོ་སྨོན་རྒྱ་མི་ཆུང་བ་གནང་དགོས།
བོད་བརྒྱུད་ནང་བསྟན་མཐུན་ཚོགས་ངོས་ནས་བདུན་ཚིགས་དང་པོའི་ནང་སྨོན་ལམ་རྒྱ་ཆེ་བ་ཞིག་གོ་སྒྲིག་ཞུ་རྒྱུ་ཡིན་ཞེས་སོགས་གསུངས། བདུན་ཕྲག་གཉིས་བསྟུད་མར་གནམ་གྲུའི་གོད་ཆག་དང་། རྡོ་བཞུན་རླངས་རྫས་འབར་གད་ཀྱི་གོད་ཆག་བཅས་ནང་མི་གྲངས་མང་པོར་སྲོག་སྐྱོན་དང་རྨས་སྐྱོན་བྱུང་བར། བོད་མིའི་ངོས་ནས་གདུང་སེམས་མཉམ་སྐྱེ་མཚོན་ཆེད་འཕྲལ་མར་སྨོན་ལམ་གོ་སྒྲིག་ཞུས་པར་ཐེ་ཝན་ཡུལ་མི་མང་པོར་སེམས་འགུལ་ཚད་མེད་ཐེབས་ཡོད་འདུག
