༢༠༡༤ ཟླ་ ༧ ཚེས་ ༨ རེས་གཟའ་མིག་དམར།
༄༅། །བཀའ་ཤག་སྐབས་བཅུ་བཞི་པས་ལོ་འདི་ཧྲིལ་པོ་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དྲིན་རྗེས་དྲན་ལོར་སྲུང་བརྩི་ཞུ་རྒྱུའི་གཞུང་འབྲེལ་གསལ་བསྒྲགས་སྔོན་སོང་ལྟར༌འཛམ་གླིང་ཡུལ་གྲུ་གང་སར་ཕྱི་ལོ་ ༢༠༡༤ ཟླ་ ༧ ཚེས་ ༦ ཉིན་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་དགུང་གྲངས་ ༧༩ ཕེབས་པའི་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་ཡོད་པ་ལྟར། མགོན་པོ་གང་ཉིད་མཆོག་གིས་ད་བར་འཛམ་གླིང་སྐྱེ་འགྲོ་སྤྱི་དང་ལྷག་པར་བོད་གངས་ཅན་ལྗོངས་ཀྱི་བསྟན་འགྲོའི་བདེ་ཐབས་ཁོ་ནར་དམིགས་ཏེ་ཉིན་མཚན་དབྱེར་མེད་སྐུ་ལས་སྐྱོན་གནང་མཛད་དང་མཛད་མུས་ལ་བཀའ་དྲིན་རྗེས་དྲན་ཞུ་སླད་གོང་ཚེས་ཉིན་ཨུ་རུ་སུའི་རྒྱལ་ས་མོ་སི་ཁོར་སྐུའི་འཁྲུང་སྐར་དུས་ཆེན་སྲུང་བརྩི་གཟབ་རྒྱས་ཞུས་འདུག
དེ་ཡང་མཛད་སྒོའི་ཐོག་མར་དགེ་འདུན་པ་ཁག་གཅིག་གིས་དབུ་ཁྲིད་དེ་༸རྒྱལ་བའི་༸ཞབས་བརྟན་གསུང་འདོན་སོགས་ཆོས་ཕྱོགས་ཀྱི་བྱེད་སྒོ་རྣམས་ཡོངས་སུ་ལེགས་གྲུབ་རྗེས་སྐུ་ཚབ་དོན་གཅོད་ངག་དབང་རབ་རྒྱས་ལགས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་འགྲོ་བ་མིའི་ནང་ཤེས་རྒྱུད་དང་འབྲེལ་བའི་བྱམས་པ་དང་བརྩེ་བ། བཟོད་བསྲན་སོགས་བཟང་པོའི་རིན་ཐང་དེ་དག་གོང་མཐོར་གཏོང་གནང་མཛད་སྐོར་དང་། ཆོས་ལུགས་མཐུན་སྒྲིལ། དེ་བཞིན་བོད་ཀྱི་ཆོས་དང་རིག་གཞུང་མི་ཉམས་རྒྱུན་འཛིན་དང་ཉམས་པ་སླར་གསོ་མཛད་པ་སོགས་སྐུ་ཚེའི་མཛད་ཁུར་གཙོ་བོ་གསུམ་སྐོར་གསུང་བཤད་གནང་བསྟུན། དམིགས་བསལ་སྐུ་མགྲོན་སྐུ་ཞབས་ཨེན་ཌེ་རེ་ཏེ་རེན་ཏེ་ཡེབ་ Dr. Andrey Terentyev ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་། ཁོང་ནི་ཨུ་རུ་སུའི་སྐད་ཡིག་ཐོག་གི་ནང་ཆོས་དུས་དེབ་གསར་ཤོག་གི་སྤྱི་ཁྱབ་རྩོམ་སྒྲིག་པ་ཡིན་འདུག
སྐབས་དེར་ཁོང་གི་གསུང་བཤད་ནང་དོན་གཙོ་བོ་ནི། ༸གོང་ས་མཆོག་གི་ཐུགས་ཀྱི་འཆར་སྣང་དང་ཁོང་རང་ཉིད་ཀྱིས་༸གོང་ས་མཆོག་མཇལ་ཁ་ཞུ་སྐབས་མྱོང་ཚོར་ཇི་ལྟར་བྱུང་མིན་སོགས་སྐོར་གསུངས་ཡོད། སྤྱིར་སྐུ་ཞབས་ ཨེན་ཌེ་རེ་ཏེ་རེན་ཏེ་ཡེབ་ལགས་ཀྱིས་༸གོང་ས་མཆོག་དང་བོད་སྐོར་དཔེ་དེབ་འགའ་ཤས་གསུང་བསྒྱུར་དང་ཕྱོགས་སྒྲིག་གནང་མྱོང་ཡོད་པ་མ་ཟད། ཕྱི་ལོ་ ༡༩༩༠ ནང་༸གོང་ས་མཆོག་ཨུ་རུ་སུར་ཆིབས་སྒྱུར་བསྐྱངས་སྐབས་སྐུའི་གསུང་བསྒྱུར་ཡང་ཞུ་མྱོང་འདུག ལྷག་པར་མཛད་སྒོའི་སྐབས་བོད་ཁང་གི་འབྲེལ་ཡོད་ལས་འབྱེད་ལྕམ་སྐུ་ཇུ་ལི་ཡ་བྷེ་ཅར་ནི་ན་ Mrs. Julia Bechernina ལགས་སོགས་ཀྱིས་གཙོས་སྐུ་མགྲོན་རྣམ་པས་གསུང་བཤད་གནང་འདུག
གཞན་ཡང་མཛད་སྒོའི་སྐབས་ཨུ་རུ་སུའི་འཁྲབ་སྟོན་པ་ཁག་གཅིག་གིས་དུས་ཆེན་དང་འབྲེལ་བའི་གཞས་སྣ་འཁྲབ་སྟོན་སོགས་གནང་ཡོད་པ་མ་ཟད། རྫོགས་ཆེན་ཆོས་ཚོགས་ཀྱི་བོད་རིགས་སློབ་ཕྲུག་རྣམས་ནས་ཀྱང་བོད་གཞས་འཁྲབ་སྟོན་གནང་འདུག ཐེངས་འདིའི་སྐུའི་འཁྲུངས་སྐར་དུས་ཆེན་གོ་སྒྲིག་ཞུ་མཁན་མོ་སི་ཁོ་བོད་ཁང་དང་བོད་མིའི་སྒྲིག་འཛུགས། དེ་བཞིན་བོད་ཀྱི་རིག་གཞུང་གཅེས་སྐྱོང་ཁང་བཅས་ཡིན་འདུག མཛད་སྒོ་ཡོངས་སུ་ལེགས་གྲུབ་རྗེས་སི་ལེང་གེ་“Seelenge” ཞེས་པའི་གསོལ་མགྲོན་ཁང་དུ་དམིགས་བསལ་སྐུ་མགྲོན་རྣམས་དང་མཁས་དབང་། གྲོས་ཚོགས་འཐུས་མི། ཐུ་ཝ་དང་བྷུ་རི་ཡ་ཏི། ཁལ་མུཀ་བཅས་ནང་པའི་ཡུལ་གྲུ་གསུམ་གྱི་ཆོས་ཚོགས་ཁག་གི་སྐུ་ཚབ་འཐུས་མི། དེ་བཞིན་བོད་དོན་རྒྱབ་སྐྱོར་བ་བཅས་ལ་དགོང་ཚིགས་གཟབ་རྒྱས་ཕུལ་ཡོད།
གཞན་ཡང་བྷུ་རི་ཡ་ཏི་སྤྱི་མཐུན་རྒྱལ་ཁབ་ཀྱི་ Buryat Republic རྒྱལ་ས་ཨུ་ལན་ཨུ་དེའི་ Ulan Ude ནང་ས་གནས་བོད་རིགས་དང་སྒྲོལ་ལྗང་ནང་པའི་ཆོས་ཚོགས་གཉིས་ཀྱིས་གོ་སྒྲིག་འོག་༸གོང་ས་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་ཞུས་ཡོད། སྐབས་དེར་སྒྲོལ་ལྗང་ནང་པའི་ཆོས་ཚོགས་ཀྱི་གཙོ་འཛིན་དགེ་བཤེས་འཕྲིན་ལས་དབང་ཆེན་ལགས་ཀྱིས་མཛད་སྒོ་དང་འབྲེལ་བའི་གསུང་བཤད་གནང་། ཕྱོགས་མཚུངས་ཁལ་མུཀ་སྤྱི་མཐུན་རྒྱལ་ཁབ་ Kalmyk Republic ཀྱི་རྒྱལ་ས་ཨེ་ལི་སི་ཏའི་ Elista ནང་ཁལ་མུཀ་ནང་པའི་ཆོས་ཚོགས་དང་བོད་དོན་རྒྱབ་སྐྱོར་ཚོགས་པས་གོ་སྒྲིག་འོག་སྐུའི་འཁྲུངས་སྐར་སྲུང་བརྩི་ཞུས་འདུག དེ་བཞིན་ཐུ་ཝ་སྤྱི་མཐུན་རྒྱལ་ཁབ་ Tuva Republic ཀྱི་རྒྱལ་ས་ཀི་ཛེལ་ Kyzyl ནང་སྐུའི་འཁྲུངས་སྐར་སྲུང་བརྩི་ཞུས་འདུག
