༢༠༡༤ ཟླ་ ༧ ཚེས་ ༡༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༡༡ ཉིན་གྱི་ཕྱི་དྲོ་ཆུ་ཚོད་ ༦།༣༠ ཐོག་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ལ་དྭགས་བསོད་ནམས་གླིང་གཞིས་སྒར་གྱི་ཚོགས་ཁང་གསར་པའི་ནང་། ལ་དྭགས་ཁུལ་གྱི་མི་མང་གིས་གཙོས་ཕྱོགས་མཐའ་ཁག་ནས་ཕེབས་པའི་བོད་མི་རྣམས་ལ་འདས་པའི་ལོ་ངོ་གསུམ་ནང་བཀའ་ཤག་སྐབས་ ༡༤ པའི་ལས་དོན་དང་། ཤེས་ཡོན་གྱི་གལ་གནད། ལྷག་པར་དབུ་མའི་ལམ་གྱི་སྲིད་བྱུས་སོགས་ཀྱི་སྐོར་ལམ་སྟོན་གསུང་བཤད་གནང་འདུག
དེ་ཡང་གསུང་བཤད་ཀྱི་ལས་རིམ་དེའི་ཐོག་སྲིད་སྐྱོང་མཆོག་གིས་གཙོས་ཁྲིམས་དཔོན་དང་། ལ་སྤྱི། དེ་བཞིན་ལ་དྭགས་བསོད་ནམས་གླིང་གཞིས་སྒར་གྱི་ས་གནས་འཐུས་ཚོགས་ཀྱི་ཚོགས་གཙོ། མི་མང་བཅས་ཁྱོན་མི་གྲངས་ ༦༠༠ ལྷག་འདུ་འཛོམས་གནང་ཡོད་པ་དང་། སྐབས་དེར་སྲིད་སྐྱོང་མཆོག་གིས་དེར་འདུས་མང་ཚོགས་ལ་འཚམས་འདྲི་གནང་བ་དང་ཆབས་ཅིག ད་ལྟའི་བཀའ་ཤག་གི་ངོས་ནས་ཕྱི་ལོ་ ༢༠༡༤ ལོ་འདི་བཞིན་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུའི་ལས་འཆར་ཁག་ངོ་སྤྲོད་ལས་འཕྲོས་ཏེ་ཤེས་ཡོན་གྱི་གལ་གནད་དང་འབྲེལ། ད་ལྟའི་བཀའ་ཤག་གི་ངོས་ནས་ཤེས་ཡོན་གལ་ཆེར་རྩི་བཞིན་ཡོད་པ་བསྐྱར་བརྗོད་གནང་སྟེ། ཤེས་ཡོན་འདི་བཞིན་བོད་མིའི་དྲང་བདེན་དང་ཞི་བའི་འཐབ་རྩོད་ཀྱི་ནུས་པ་འདོན་རྒྱུའི་ཆེད་གལ་ཆེ་ཡིན་སྐོར་གསུང་བཤད་གནང་དོན། བོད་ནང་བོད་མི་ས་ཡ་དྲུག་དང་བཙན་བྱོལ་ནང་བོད་མི་འབུམ་གཅིག་དང་ལྔ་ཁྲི་རྩི་བཞིན་ཡོད། དེ་དག་བརྒྱ་ཆར་བགོས་ན་བོད་ནང་བོད་མི་བརྒྱ་ཆ་དགུ་བཅུ་གོ་བདུན་དང་ཕྱེད་ཀ་དང་བཙན་བྱོལ་ནང་བོད་མི་བརྒྱ་ཆ་གཉིས་དང་ཕྱེད་ཀ་ཡོད། དེར་བརྟེན་བོད་ནང་ཡོད་པའི་བོད་མི་ས་ཡ་དྲུག་གིས་བཙན་བྱོལ་ནང་ཡོད་པའི་བོད་མི་ཚོར་རེ་བ་བཅོལ་བཞིན་ཡོད། བཙན་བྱོལ་ནང་ཡོད་པའི་བོད་མི་འབུམ་གཅིག་དང་ཕྱེད་ཀའི་ནུས་པ་ཆ་ཚང་འདོན་ཐུབ་པ་བྱེད་རྒྱུར་ཤེས་ཡོན་དགོས་ཀྱི་ཡོད། ང་ཚོས་ཞི་བའི་ལམ་ནས་བོད་ཀྱི་རྩ་དོན་རྩོད་དགོས། དེར་བརྟེན་དྲང་བདེན་དང་ཞི་བའི་ལམ་ནས་བོད་ཀྱི་རྩ་དོན་རྩོད་རྒྱུའི་ནུས་པ་ཆ་ཚང་ཐོན་ཐུབ་པར་ཤེས་ཡོན་དེ་ཧ་ཅང་གལ་ཆེན་པོ་ཆགས་ཡོད། ཅེས་དང་།
དེ་བཞིན་སྲིད་སྐྱོང་མཆོག་གིས་མང་ཚོགས་ལ་དབུ་མའི་ལམ་གྱི་སྲིད་བྱུས་ཀྱི་བྱུང་རིམ་ལོ་རྒྱུས་དང་མཐར་གྲོས་ཚོགས་ནས་མང་མོས་ཀྱི་གཏན་འབེབས་བྱུང་ཡོད་པའི་བརྒྱུད་རིམ་ཁག་ངོ་སྤྲོད་སྤྱི་དང་། ལྷག་པར་༸གོང་ས་༸སྐྱབས་མགོན་ཆེན་པོ་མཆོག་གིས་ད་བར་བོད་དོན་ཐོག་བསྐྱངས་པའི་བླ་ན་མེད་པའི་མཛད་རྗེས་ཁག་མང་ཚོགས་ལ་ངོ་སྤྲོད་གནང་བ་དང་ཆབས་ཅིག ཉེ་ཆར་མགོན་པོ་གང་ཉིད་མཆོག་ནོར་ཝེས་གཙོས་ཕྱི་རྒྱལ་ཡུལ་གྲུ་ཁག་ལ་ཆིབས་སྒྱུར་བསྐྱངས་སྐབས་དོལ་རྒྱལ་རྗེས་འབྲང་པ་ཁག་གཅིག་གིས་གཞི་མེད་ཀྱི་ངོ་རྒོལ་བྱས་པར་བཀའ་ཤག་གི་ངོས་ནས་མཐའ་གཅིག་ཏུ་ངོ་རྒོལ་ཡོད་ཅེས་གསུངས་ཡོད་པ་མ་ཟད། ངོ་རྒོལ་བ་དེ་དག་བོད་མི་ཞིག་ཡིན་པའི་ཆ་ནས་ཧ་ཅང་ཐབས་སྐྱོ་པོ་ཡིན་པ་དང་། མང་ཚོགས་ཀྱི་ངོས་ནས་གནད་དོན་དེའི་ཐོག་གཟབ་ནན་གནང་དགོས་སྐོར་གསུང་བཤད་གནང་དོན། ༸གོང་ས་མཆོག་གི་མཛད་འཕྲིན་རྒྱས་ཡོང་སྐབས་མཚན་སྨད་ཞུ་མཁན་ཡང་ཡོང་གི་ཡོད། ཉེ་དུས་དོལ་རྒྱལ་རྗེས་འབྲང་པ་འགའ་ཤས་ཤིག་གིས་༸གོང་ས་མཆོག་ཕྱི་རྒྱལ་ཁག་ཏུ་ཆིབས་སྒྱུར་སྐབས་མཚན་སྨད་ཞུ་བ་དང་སྐད་འབོད་ཀྱི་ལས་འགུལ་སྤེལ་ཡོད།
༸གོང་ས་མཆོག་ནོར་ཝེ་ལ་ཆིབས་སྒྱུར་བསྐྱངས་སྐབས་ས་གནས་མི་མང་གིས་དགའ་སྤྲོའི་ངང་ཕེབས་བསུ་དང་། ནོར་ཝེ་གཞུང་གི་སྲིད་བློན་དང་ཕྱི་སྲིད་བློན་ཆེན་གཙོས་པའི་གནད་ཡོད་མི་སྣས་གཞུང་འབྲེལ་ཐོག་མཇལ་འཕྲད་ཞུ་དགོས་ཞེས་བརྒྱུད་ལམ་ཁག་ནང་བགྲོ་གླེང་ཤུགས་ཆེར་གནང་ཡོད། འོན་ཀྱང་དོལ་རྒྱལ་རྗེས་འབྲང་པ་དེ་ཚོས་བརྒྱུད་ལམ་ཁག་ནང་རྒྱ་ནག་གི་གནོན་ཤུགས་འོག་ནོར་ཝེའི་སྲིད་བློན་དང་ཕྱི་སྲིད་བློན་ཆེན་སོགས་ཀྱིས་ཐེངས་འདིར་༸གོང་ས་མཆོག་དང་མཇལ་འཕྲད་ཐུབ་ཀྱི་མི་འདུག་ཅེས་པར་རྒྱབ་སྐྱོར་ཡོད་ཅེས་བརྗོད་འདུག ཁོ་པ་ཚོས་ཆོས་དད་དང་གཏམ་བརྗོད་རང་དབང་མི་འདུག་ཅེས་བརྗོད་ཀྱི་ཡོད་ཀྱང་། དོན་དངོས་ཐོག་ཆབ་སྲིད་ཀྱི་བེད་སྤྱོད་འོག་འགྲོ་གི་ཡོད་པ་ཧ་ཅང་གསལ་པོ་རེད། ཁོ་པ་ཚོའི་སྐད་ཆ་དེ་དག་ཆོས་དད་རང་དབང་དང་འབྲེལ་བ་རྩ་བ་ནས་མི་འདུག འབོད་ཚིག་ཡང་བོད་པ་ཞིག་ཡིན་པའི་ཆ་ནས་བསམ་ཡུལ་ལས་འདས་པ་བེད་སྤྱོད་གཏོང་གི་ཡོད་པ་རེད། ཧ་ཅང་ཐབས་སྐྱོ་པོ་རེད། བཀའ་ཤག་གི་ངོས་ནས་མཐའ་གཅིག་ཏུ་ངོ་རྒོལ་ཡོད། ཁོ་པ་ཚོས་ག་རེ་བྱེད་ཀྱི་ཡོད་མེད་ཤེས་རྒྱུ་གལ་ཆེན་ཡིན་སྟབས། དེའི་རིགས་ཁྱེད་རང་ཚོས་ཤེས་རྒྱུ་ཧ་ཅང་གལ་ཆེན་པོ་རེད། ཅེས་སོགས་ཀྱི་གསུང་བཤད་གནང་གྲུབ་མཚམས་མང་ཚོགས་ཀྱི་དྲི་བར་ལན་འདེབས་ཀྱང་གནང་ཡོད་པ་བཅས།།
