༢༠༡༤ ཟླ་ ༧ ཚེས་ ༧ རེས་གཟའ་ཟླ་བ།
༄༅། །སྐབས་བཅུ་བཞི་པའི་བཀའ་ཤག་གིས་ཕྱི་ལོ་ ༢༠༡༤ ལོ་འདི་བཞིན་༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གི་བཀའ་དྲིན་རྗེས་དྲན་གྱི་ལོར་སྲུང་བརྩི་ཞུ་རྒྱུའི་ལས་རིམ་ཆེ་ཁག་ ༢༡ དང་། ནང་ཚན་ལས་རིམ་ཆུང་གྲས་ ༣༠༠ ཙམ་གཏན་འབེབས་ཐོག་ལོ་འདི་ཧྲིལ་པོ་བཀའ་དྲིན་རྗེས་དྲན་ལོར་སྲུང་བརྩི་ཞུས་དང་ཞུ་མུས་ཀྱི་ཁོངས་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ལས་འཆར་གཞིར་བཟུང་ཕྱི་ལོ་ ༢༠༡༤ ཟླ་ ༧ ཚེས་ ༦ ནས་ ༧ བར་ཉིན་གྲངས་གཉིས་རིང་རྒྱ་གར་ལྷོ་ཕྱོགས་སྦེང་ལོར་དུ་ལྷོ་སྤྱི་ལས་ཁུངས་ནས་གཙོ་འགན་བཞེས་ཐོག་ལྷོ་ཕྱོགས་བོད་མིའི་གཞིས་ཆགས་ཁག་ལྔས་གོ་སྒྲིག་འོག་༸གོང་ས་མཆོག་གི་སྐུའི་འཁྲུངས་སྐར་དང་སྟབས་བསྟུན།
བོད་ཀྱི་དུས་སྟོན་ཞེས་བོད་ཀྱི་རིག་གཞུང་འགྲེམས་སྟོན་གོ་སྒྲིག་ཞུས་ཏེ་སྐུའི་འཁྲུངས་སྐར་དང་བཀའ་དྲིན་རྗེས་དྲན་གྱི་དུས་སྟོན་ཉིན་གཉིས་རིང་གཟབ་རྒྱས་ངང་སྲུང་བརྩི་ཞུས་འདུག མཛད་སྒོའི་སྐུ་མགྲོན་གཙོ་བོ་ཀ་ཎ་ཊ་ཀ་མངའ་སྡེའི་ཡུལ་སྐོར་སྤྲོ་འཆམ་དང་ཤེས་རིག་བློན་ཆེན་སྐུ་ཞབས་ཨར་ཝི་རྡེག་པན་ཌེ་ (R.V.Deshpande) མཆོག་དང་། དམིགས་བསལ་སྐུ་མགྲོན་བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག ས་གནས་ཀྱི་གནད་ཡོད་མི་སྣ་ཁག་གཅིག
དེ་བཞིན་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ལྔའི་ས་གནས་འགོ་འཛིན་རྣམ་པ། བོད་མིའི་སྤྱི་མཐུན་མཉམ་འབྲེལ་གྱི་ཚོགས་གཙོ། ལྷོ་ཕྱོགས་གཞིས་ཆགས་ཁག་ལྔའི་གནད་ཡོད་མི་སྣ་བཅས་ལྷན་འཛོམས་ཀྱིས་སྐུའི་འཁྲུངས་སྐར་སྲུང་བརྩི་གཟབ་རྒྱས་ཞུས་ཡོད་འདུག དེ་ཡང་ཕྱི་ཚེས་ ༦ ཉིན་གྱི་སྔ་དྲོ་བོད་ལུགས་ལྟར་ཆོས་ཕྱོགས་ཀྱི་བསང་གསོལ་དང་སྐུ་རླུང་དར་འཛུགས་ཀྱིས་མཚོན་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་གདན་ཞུས་ཐོག་མཎྜལ་རྟེན་གསུམ་འདེགས་འབུལ་སོགས་ཀྱི་ལས་རིམ་གྲུབ་མཚམས་ནང་སྲིད་བཀའ་བློན་མཆོག་གིས་མགོན་པོ་གང་ཉིད་མཆོག་གི་སྐུའི་མཛད་འཕྲིན་དང་འབྲེལ་བའི་གསུང་བཤད་གནང་འདུག
ཐེངས་འདིའི་བོད་ཀྱི་དུས་སྟོན་མཛད་སྒོའི་སྐབས་རྒྱུད་སྨད་གྲྭ་ཚང་དང་རྫོང་དཀར་ཆོས་སྡེ་ནས་དཀྱིལ་འཁོར་དང་མཆོད་པ་བཤམ་སྟངས་སྐོར།
དེ་བཞིན་སེ་ར་བྱེས་ནས་ནང་ཆོས་ཀྱི་ཚན་རིག་སྐོར་འགྲེམས་སྟོན། རྣམ་གྲོལ་གླིང་གིས་གར་འཆམ། བོད་ཁྱིམ་སློབ་གྲྭའི་བོད་ཀྱི་རིག་གཞུང་འཁྲབ་སྟོན། མོན་གྷོ་ལྷ་མོ་ཁྲབ་སྟོན་ཚོགས་པས་ལྷ་མོ་འཁྲབ་སྟོན། སྦེལ་ཀོབ་མཉམ་འབྲེལ་གྱིས་ལག་ཤེས་ཤིང་བརྐོས་དང་བོད་མིའི་སྐྱེ་ལྡན་སོ་ནམ་སོགས་ནས་གནའ་དེང་གི་བོད་པའི་རིག་གཞུང་དང་འབྲེལ་བའི་འགྲེམས་སྟོན། སྦེང་ལོར་དུ་རྟེན་གཞི་བྱས་པའི་ཆོས་འཁོར་གསུམ་གླིང་ཆོས་ཚོགས་ནས་ནང་ཆོས་དང་འབྲེལ་བའི་ལས་རིམ། སྦེང་ལོར་ཡན་ལག་སྨན་རྩིས་ཁང་གི་སྨན་པས་རིན་མེད་ཐོག་བརྟག་དཔྱད་དང་། སྨན་གྱི་སྐོར་འགྲེམས་སྟོན། དེ་བཞིན་ལྷ་བྲིས་དང་སྐུ་ཐང་འདྲ་མིན་སོགས་ཁྱོན་བསྡོམས་ལས་རིམ་ཉི་ཤུ་ལྷག་གོ་སྒྲིག་ཞུས་ཡོད་འདུག་པ་མ་ཟད། ཕྱི་དྲོ་བོད་ཀྱི་ལོ་རྒྱུས་དང་འབྲེལ་བའི་གློག་བརྙན་དང་གཞས་སྣ་འཁྲབ་སྟོན་བཅས་གོ་སྒྲིག་ཞུས་ཡོད་འདུག ལྷག་པར་ཕྱི་ཚེས་ ༧ ཉིན་དུས་སྟོན་མཇུག་བསྡོམས་མཛད་སྒོར་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་ཆེད་ཕེབས་གནང་འདུག་པ་བཅས།།
