༢༠༡༤ ཟླ་ ༧ ཚེས་ ༡༧ རེས་གཟའ་ཕུར་བུ།

༄༅། །ཕྱི་ལོ་ ༢༠༡༤ ཟླ་ ༧ ཚེས་ ༡༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཀྱི་ས་བྷོ་(Saboo) ས་གནས་ཀྱི་ཉེ་འཁྲིས་སུ་ལ་དྭགས་ནང་པའི་ལྷན་ཚོགས་ཀྱིས་ཕྱི་ལོ་ ༢༠༡༠ ལོར་སྤྲིན་པ་གས་གཏོར་གྱིས་གནོད་ཚེ་ཕོག་མཁན་དྭ་ཕྲུག་སློབ་མ་ཁག་གཅིག་ལ་སྡོད་ཁང་གསར་རྒྱག་ལེགས་གྲུབ་བྱུང་བར་རབ་གནས་དབུ་འབྱེད་མཛད་པ་དང་ཆབས་ཅིག སློབ་མ་བརྒྱ་མིན་ཙམ་ཡོད་རྣམས་ལ་རང་གི་ཕ་མེས་ཀྱི་ཆོས་དང་རིག་གཞུང་ལ་བདག་པོ་རྒྱག་རྒྱུར་གཙོ་བོ་སློབ་སྦྱོང་ཡག་པོ་བྱེད་དགོས་པའི་ལམ་སྟོན་བཀའ་སློབ་སྩལ་དོན། ངོ་རང་དེ་རིང་འདིར་ཡོང་སྟེ་ཁྱེད་རང་ཚོ་དང་ཁྱུག་ཙམ་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། ནང་ཆོས་ཀྱི་གོམས་གཤིས་དང་རིག་གཞུང་ཞེས་བརྗོད་སྐབས། འཚེ་བ་མེད་པ་དང་སྙིང་རྗེ་ལྡན་པའི་གོམས་གཤིས་དང་རིག་གཞུང་ཞིག་ཕལ་ཆེར་བརྗོད་ཆོག་གི་རེད། དེར་བརྟེན་རིག་གཞུང་འདིའི་ཐོག་ནས་ཕལ་ཆེར་འཛམ་གླིང་ནང་ཡོད་པའི་འགྲོ་བ་མི་སྤྱི་ལ་འབྲེལ་བ་ཡོད་པ་བཤད་ཐུབ་ཀྱི་རེད། འདི་ལྟ་བུའི་ནང་པའི་ཆོས་དང་རིག་གཞུང་འདི་ཕྱི་ལོགས་སུ་ཡོད་པ་ཞིག་མིན་པར་བསམ་བློའི་ནང་ཡོད་དགོས། དེ་ཡོང་བར་དགོས་པ་དང་རྒྱུ་མཚན། ཕན་ཐོགས་མཐོང་བའི་ཐོག་ནས་བསམ་བློའི་ནང་ཡོད་པ་ཞིག་དགོས་ཀྱི་རེད་མ་གཏོགས། བཙན་པོ་དང་དབང་ཡོད་བྱས་ནས་དེ་དགོས་ཀྱི་རེད་ཅེས་བརྗོད་ཐུབ་རྒྱུ་མེད། དེར་བརྟེན་སློབ་སྦྱོང་བྱེད་རྒྱུ་ཧ་ཅང་གལ་ཆེན་པོ་རེད། སློབ་སྦྱོང་བྱས་ཏེ་དགོས་པ་རྒྱུ་མཚན་དང་ཕན་ཐོགས་གང་ཡོད་པ་ཤེས་ཐུབ་པ་བྱས་ན་ཕན་ཐོགས་ཡོད། དེ་ལྟ་བུའི་ཕན་ཐོགས་ཡོད་པའི་ཆོས་དང་རིག་གཞུང་མ་ཡལ་བར་སྲུང་སྐྱོབ་བྱེད་རྒྱུར་དེ་སློབ་སྦྱོང་བྱས་པའི་སྒོ་ནས་སྲུང་རྒྱུ་རེད་མ་གཏོགས། ལྷ་ཁང་དང་། སྐུ་འདྲ། མཆོད་རྟེན་སོགས་བཞེངས་པ་ཙམ་གྱིས་ཕན་ཐོགས་མེད། ཅེས་སོགས་ཀྱི་བཀའ་སློབ་སྩལ།

དེ་ནས་ཕྱེད་ཡོལ་ཆུ་ཚོད་ ༡༢ ཐོག་༸གོང་ས་མཆོག་ལ་ལ་དྭགས་ཀྱི་གྲོང་ཁྱེར་སླེ་ནང་གི་ཁ་ཆེའི་ཚོགས་པས་ཇི་ལྟར་གསོལ་འདེབས་ཞུས་དོན་བཞིན། བཀའ་བཞེས་བཟང་པོ་ཐོབ་སྟེ་སླེ་གྲོང་ཁྱེར་ནང་རྟེན་གཞི་བྱས་པའི་ཌེ་རེ་གོན་གསོལ་མགྲོན་ཁང་ནང་ཆིབས་སྒྱུར་བསྐྱངས་ཏེ་མགོན་པོ་གང་ཉིད་མཆོག་གིས་ཁ་ཆེ་ཆོས་གྲོགས་ཕོ་མོ་བརྒྱ་ཙམ་ལ་བཀའ་སློབ་ཕེབས་དོན། ཁྱེད་རྣམ་པས་མགྲོན་འབོད་ལྟར་དེ་རིང་ངོས་རང་འདི་གར་ཡོང་སྟེ་ཁྱེད་རང་ཚོ་དང་ཐུག་རྒྱུ་བྱུང་བར་བརྟེན། ཐོག་མར་ཚང་མར་འཚམས་འདྲི་ཡོད། སྤྱིར་བཏང་རྒྱ་གར་ནི་ལོ་རྒྱུས་ཐོག་ཆོས་ལུགས་མཉམ་གནས་དང་ཆོས་ལུགས་མཐུན་སྒྲིལ་གྱི་མིག་དཔེ་ལྟ་བུ་ཞིག་ཆགས་ཡོད། དེར་བརྟེན་འཛམ་གླིང་འདིའི་ནང་གནས་པའི་ཆོས་ལུགས་ཚང་མས་མཐུན་སྒྲིལ་དང་། ཡང་སྒོས་ཆོས་ལུགས་བྱེ་བྲག་པ་རྣམས་ནང་ཕན་ཚུན་དབར་འཆམ་མཐུན་ཐོག་སྔར་ལྷག་གནས་ཐབས་བྱེད་རྒྱུ་ནི་ཧ་ཅང་གལ་ཆེན་པོ་ཆགས་ཡོད། བར་སྐབས་ཤིག་བྷར་མ་དང་ཤི་རི་ལངྐར་ནང་པ་འགའ་ཞིག་གིས་ཁ་ཆེ་རྗེ་འབྲང་པར་གནོད་འཚེ་བྱས་ཡོད་པའི་གནས་ཚུལ་ཐོན་ཡོད། བྱ་སྤྱོད་དེ་དག་ནི་ངོ་ཚ་དགོས་པ་དང་ཐབས་སྐྱོ་པོ་རེད། དེ་བཞིན་ཁ་ཆེ་ནང་ཁུལ་འཁྲུག་རྩོད་རྒྱག་བཞིན་ཡོད་པ་དེ་དག་ཐོག་གྲུབ་འབྲས་ཐོན་མིན་ལ་མ་ལྟོས་པར། ང་ཚོ་མི་རེ་ངོ་རེས་བཟང་སྤྱོད་ཀྱི་འགན་བླངས་ནས་དཀའ་ངལ་སེལ་ཐབས་བྱེད་རྒྱུ་ཤིན་ཏུ་ནས་གལ་ཆེན་པོ་ཆགས་ཡོད། ཅེས་སོགས་ཀྱི་ལམ་སྟོན་བཀའ་སློབ་སྩལ་ཡོད།།