༢༠༡༤ ཟླ་ ༧ ཚེས་ ༥ རེས་གཟའ་སྤེན་པ།
༄༅། །ཕྱི་ལོ་ ༢༠༡༤ ཟླ་ ༧ ཚེས་ ༦ ཉིན་རང་ཅག་གངས་ཅན་པ་ཡོངས་ཀྱི་མགོན་སྐྱབས་དཔུང་གཉེན་བླ་ན་མ་མཆིས་པ་འཛམ་གླིང་ཞི་བདེའི་དེད་དཔོན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༧༩ ཕེབས་བཞིན་ཡོད་པའི་ཉིན་མོར། རྒྱ་གར་བོད་ཀྱི་གྲོགས་པོ་ཚོགས་པས་རྒྱ་གར་གྱི་གྲོང་ཁྱེར་མུམ་བྷེའི་ནང་རྟེན་གཞི་བྱས་པའི་བོད་ཀྱི་སྨན་རྩིས་ཁང་གི་ཡན་ལག་ལས་ཁུངས་ནང་མགོན་པོ་གང་ཉིད་མཆོག་གི་སྐུའི་འཁྲུངས་སྐར་དེ་བཞིན་འཛམ་གླིང་བོད་ཀྱི་ཉིན་མོར་སྲུང་བརྩི་ཞུ་རྒྱུ་ཡིན་འདུག
དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༡༠།༣༠ ཉིན་གྱི་ཐོག་མར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་ཞབས་པད་བསྐལ་བརྒྱར་བརྟན་ཅིང་ཐུགས་ཀྱི་བཞེད་དགོངས་མཐའ་དག་འབད་མེད་ལྷུན་འགྲུབ་ཡོང་ཆེད་སྨོན་ལམ་གསུང་འདོན་གནང་རྒྱུ་དང་། དེ་བཞིན་བོད་བསྟན་སྲིད་ཆེད་རང་ལུས་མེར་སྲེག་གཏོང་མཁན་གྱི་རྒྱལ་གཅེས་པ་ཕོ་མོ་འདས་གསོན་སྤྱི་དང་། བྱེ་བྲག་དུས་ད་ལྟ་བར་བོད་དོན་སླད་རང་ལུས་བློས་གཏོང་གནང་མཁན་ཡོངས་ལ་གདུང་སེམས་མཉམ་སྐྱེ་མཚོན་ཕྱིར་སྨོན་ལམ་གསུང་འདོན་གནང་རྒྱུ་ཡིན་པ་མ་ཟད། སྐབས་དེར་རྒྱ་གར་བོད་ཀྱི་གྲོགས་པོ་ཚོགས་པའི་ལས་འགུལ་གྱི་འབྲེལ་མཐུད་པས་མང་ཚོགས་ལ་གསུང་བཤད་ཀྱང་གནང་རྒྱུ་ཡིན་འདུག་པ་བཅས། །
