༢༠༡༤ ཟླ་ ༧ ཚེས་ ༡༡ རེས་གཟའ་པ་སངས།
༄༅། །སྐབས་ ༡༥ 
པའི་བོད་མི་མང་མདོ་སྨད་སྤྱི་འཐུས་ཀིརྟི་སྒྲོལ་དཀར་ལྷ་མོ་ལགས་ཀྱིས་ཕྱི་ལོ་ ༢༠༡༣ ཟླ་ ༡༡ ཚེས་ ༢༥ ཉིན་སྤྱི་འཐུས་ཚོགས་གཙོ་སྦྲེལ་པོ་མཆོག་གི་མཚན་ཐོག་སྙན་ཞུ་ཕུལ་ཏེ། ཁོ་མོ་སྒེར་གྱི་གནད་དོན་མང་པོ་ཞིག་ལ་བརྟེན་སྤྱི་འཐུས་མཚན་གནས་ནས་རྩ་དགོངས་ཞུས་ཡོད་པར་བརྟེན། མདོ་སྨད་སྤྱི་འཐུས་གཅིག་གིས་བར་མའི་འོས་བསྡུའི་རྒྱལ་ཁ་དེ་བལ་ཡུལ་དུ་གནས་སྡོད་བཀྲ་ཤིས་དོན་གྲུབ་ལགས་སུ་ཐོབ་སྟེ། ཕྱི་ལོ་ ༢༠༡༤ ཟླ་ ༧ ཚེས་ ༡༡ ཉིན་གྱི་སྔ་དྲོ་ཆུ་ཚོད་ ༩།༣༠ ཐོག་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གི་མདུན་སྤྱི་འཐུས་གྲོས་ཚོགས་ཀྱི་ཚོགས་ཁང་ཆེན་མོའི་ནང་མདོ་སྨད་སྤྱི་འཐུས་ཀྱི་ལས་ཁུར་དམ་འབུལ་ཞུས་སོང་དེ་ཡང་གོང་ཚེས་ཉིན་བོད་མི་མང་སྤྱི་འཐུས་ཚོགས་གཙོ་སྦྲེལ་པོས་དབུས་སྤྱི་འཐུས་རྒྱུན་ལས་རྣམ་པ་གྲོས་ཚོགས་རྭ་བར་ལྷན་འཛོམས་ཀྱི་ཐོག་མར་ཚོགས་གཙོ་མཆོག་གིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེའི་དྲུང་དུ་གུས་ཕྱག་དང་མཇལ་དར་སྒྲོན་འབུལ་ཞུས་རྗེས་བཀྲ་ཤིས་དོན་གྲུབ་ལགས་ཀྱིས་ཀྱང་དེ་མཚུངས་ཞུས་གྲུབ་མཚམས་སྤྱི་འཐུས་ཚོགས་གཙོའི་མདུན་དུ་ལས་ཁུར་དམ་འབུལ་ཞུས་ཡོད།
དེ་ནས་སྤྱི་འཐུས་ཚོགས་གཙོ་མཆོག་དང་ཚོགས་གཞོན་རྒྱུན་ལས་རྣམ་པ། དེ་བཞིན་ཚོགས་དྲུང་སོགས་ནས་སྤྱི་འཐུས་བཀྲ་ཤིས་དོན་གྲུབ་ལགས་ཀྱིས་སྤྱི་འཐུས་ཀྱི་ལས་ཁུར་དམ་འབུལ་ཞུས་པར་རྟེན་འབྲེལ་མཚོན་ཆེད་དཀར་གཙང་མཇལ་དར་རིམ་བཞིན་བསྒྲོན་གྲུབ་མཚམས་གསོལ་ཇ་དང་འབྲས་སིལ་ཕུལ་ཏེ་རྟེན་འབྲེལ་མཛད་སྒོ་སྟབས་བདེ་དེ་བཞིན་གྲོལ་ཏེ་སྤྱི་འཐུས་བཀྲ་ཤིས་དོན་གྲུབ་ལགས་ཀྱིས་གསར་འགོད་གསལ་བསྒྲགས་ཤིག་ཀྱང་སྤེལ། སྤྱི་འཐུས་བཀྲ་ཤིས་དོན་གྲུབ་ལགས་ཀྱི་ལོ་རྒྱུས་སྙིང་བསྡུས། ཁོང་ནི་མཐོ་སློབ་ཐོན་རྗེས་ཐོག་མར་བལ་ཡུལ་སྤོག་ར་གློ་སྒྲིག་ཁྱབ་ཁོངས་ཚོང་ལས་སྡེ་ཚན་ཨ་པུར་མགྲོན་ཁང་ནང་ལས་འགན་འདྲ་མིན་ཐོག་ལོ་ ༡༠ ལྷག་ཕྱག་ལས་གནང་མྱོང་ཡོད་པ་དང་། ཕྱི་ལོ་ ༡༩༩༨ ནས་ ༢༠༠༠ བར་དུ་སྤོག་ར་བྱམས་པ་གླིང་ས་གནས་གཞོན་ནུའི་རྒྱུན་ལས་གནང་། དེ་རྗེས་རང་གཞུང་དཔལ་འབྱོར་ལས་ཁུངས་ཀྱི་བཀའ་འབྲེལ་ཐོག་ཕྱི་ལོ་ ༢༠༠༠ ནས་ ༢༠༠༣ བར་བལ་ཡུལ་བོད་ཀྱི་གསོལ་མགྲོན་ཁང་གི་འགན་འཛིན་ལས་རོགས་དང་།
དེ་རྗེས་གནས་སྤར་གྱིས་འགན་འཛིན་གནང་། ཕྱི་ལོ་ ༢༠༠༣ ནས་ ༢༠༠༦ དང་ ༢༠༠༨ བར་བལ་ཡུལ་ཀཐ་མན་གྲུའི་ནང་སྐར་མ་གསུམ་ལྡན་ཅན་གྱི་མགྲོན་ཁང་གངས་ལྗོངས་དང་། མ་ནང་གཉིས་ཀྱི་སྤྱི་ཁྱབ་འགན་འཛིན་གནང་། ཕྱི་ལོ་ ༢༠༠༠ ནས་བལ་ཡུལ་མདོ་སྨད་སྐབས་ ༥།༦།༧ བཅས་ཀྱི་ས་གནས་རྒྱུན་ལས་དང་དྲུང་ཆེ། ཚོགས་གཞོན་ལས་འགན་བཅས་བསྟུད་མར་གནང་ཡོད། བལ་ཡུལ་མཆོད་འཇོར་ས་གནས་འཐུས་ཚོགས་སྐབས་དྲུག་པའི་རྩིས་པ། གཞན་ཡང་བལ་ཡུལ་ཀཐ་མན་གྲུའི་ས་གནས་འོས་བསྡུ་ལས་ཁང་གི་སྐབས་གཉིས་པའི་མདོ་སྨད་ཆོལ་ཁའི་ཚོགས་མི་དང་ཚེ་རིང་རྒན་གསོ་ཁང་གི་འགན་འཛིན་བཅས་གནང་མྱོང་། ད་ལྟ་མདོ་སྨད་དབུས་རྒྱུན་གྱི་ཕྱི་འབྲེལ་འགན་འཛིན་དང་། ༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་གྱ་སྟོན་གོ་སྒྲིག་ཚོགས་ཆུང་གི་ཚོགས་མི། བལ་ཡུལ་མཆོད་འཇོར་ས་གནས་འཐུས་ཚོགས་སྐབས་ ༧ པའི་དྲུང་ཆེ། ཚེ་རིང་རྒན་གསོ་ཁང་གི་འགན་འཛིན། བལ་ཡུལ་མདོ་སྨད་ས་གནས་རྒྱུན་ལས་ཀྱི་ཚོགས་གཞོན་སོགས་ཀྱི་ལས་འགན་གནང་མུས་ཡིན་འདུག་པ་བཅས་ཀྱི་ལོ་རྒྱུས་སྙིང་བསྡུས་སུ།།
