༢༠༡༤ ཟླ་ ༧ ཚེས་ ༧ རེས་གཟའ་ཟླ་བ།

༄༅། །བཞུགས་སྒར་རྡ་རམ་ས་ལར་སྐུའི་འཁྲུངས་སྐར་དུས་ཆེན་གཟབ་རྒྱས་ཚོགས་སྐབས་ཀྱི་སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་ཟ་འབྲུའི་བློན་ཆེན་སྐུ་ཞབས་ཇི་སི་བྷ་ལི་མཆོག་གིས་གསུང་བཤད་གནང་དོན། ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་མཆོག་གིས་གཙོས་མངའ་སྡེའི་གཞུང་དམངས་གཉིས་ནས་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་གི་སྐུ་ཚེ་ཡུན་རིང་བརྟན་པའི་སྨོན་འདུན་ཞུ་བཞིན་ཡོད། ང་ཚོས་༸གོང་ས་ཏཱ་ལའི་བླ་མ་མཆོག་གི་སྐུའི་འཁྲུངས་སྐར་ལ་ལེགས་སྐྱེས་ཡག་ཤོས་ནི། སྐུ་ཉིད་མཆོག་གི་བཀའ་སློབ་ལམ་སྟོན་རྣམས་འགྲུབ་དགོས། མངའ་སྡེའི་གཞུང་དང་མི་མང་གིས་གང་ཉིད་མཆོག་ས་གནས་འདིར་མུ་མཐུད་བཞུགས་ནས་བྱིན་གྱི་རློབ་པའི་གསོལ་འདེབས་ཞུ་ཡི་ཡོད། ཧི་མཱ་ཅལ་མངའ་སྡེ་གཙོས་པའི་རྒྱ་གར་ནང་བོད་མིའི་སྤྱི་ཚོགས་དེ་དག་ཆུང་ངུ་ལས་མེད་ནའང་བོད་མི་དེ་དག་ཞི་བདེ་ལ་དགའ་ཞིང་ཡུལ་མི་མཉམ་མཛའ་མཐུན་ངང་རང་གི་སྐད་ཡིག་སྲུང་སྐྱོབ་བྱེད་བཞིན་ཡོད།

ལོ་རྗེས་མའི་ཕྱི་ཟླ་ ༦ ཚེས་ ༢༡ ཉིན་ནི་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་བོད་ཀྱི་ལོ་ཐོ་ལྟར་དགུང་གྲངས་ ༨༠ ཕེབས་པའི་དགའ་སྟོན་གྱི་ཉིན་མོ་ཡིན་སྟབས། ང་ཚོ་ཚང་མས་གལ་ཆེན་གྱི་ཉིན་མོ་དེ་སྒུག་བཞིན་ཡོད། ཧི་མཱ་ཅལ་མངའ་སྡེ་གཞུང་གིས་ (The National Food Security Act) ཞེས་པའི་འོག་མངའ་སྡེ་འདིའི་ནང་ཡོད་པའི་བོད་མི་ཚང་མས་གྲོ་ཀེ་ལོ་གཅིག་ལ་ཧིན་སྒོར་ ༢ དང་། འབྲས་ཀེ་ལོ་གཅིག་ལ་ཧིན་སྒོར་ ༣ བྱས་ཏེ་ཉོ་ཆོག་པའི་ཐོབ་ཐང་སྤྲད་ཡོད་སྐོར་སོགས་ཀྱི་གསུང་བཤད་གནང་བ་མ་ཟད། སྐུའི་འཁྲུངས་སྐར་གྱི་ཉིན་མོ་དང་བསྟུན་ཧི་མཱ་ཅལ་མངའ་སྡེའི་གཞུང་གིས་མེཀ་ལོ་གྷན་ཇི་ནས་རྡ་ཤོད་བར་གྱི་ལམ་བཟོའི་ཆེད་ཧིན་སྒོར་འབུམ་ ༣༠༠ གནང་རྒྱུ་དང་། ཟླ་བ་རྗེས་མ་ནས་མེཀ་ལོ་གྷན་ཇི་ནས་ཅཱན་རྡི་སྒར་བར་དང་། ཅཱན་རྡི་སྒར་ནས་མེཀ་ལོ་གྷན་ཇི་བར་ Volvo Bus ཞེས་འགྲུལ་སྐྱེལ་རླངས་འཁོར་ཞིག་འགོ་འཛུགས་ཞུ་རྒྱུའི་གསལ་བསྒྲགས་གནང་ཡོད། གཞན་ཡང་བློན་ཆེན་མཆོག་སྐུ་སྒེར་ངོས་ནས་བོད་ཕྲུག་ཁྱིམ་སྡེའི་སློབ་ཕྲུག་ཚོའི་ཆེད་སྐུའི་འཁྲུངས་སྐར་གྱི་རྔན་པ་ཧིན་སྒོར་འབུམ་གཅིག་གནང་རྒྱུ་སོགས་ཀྱི་གསུང་བཤད་གནང་།