༢༠༡༤ ཟླ་ ༧ ཚེས་ ༣ རེས་གཟའ་ཕུར་བུ།
༄༅། །ལ་དྭགས་བོད་ཁྱིམ་སློབ་ཟུར་རྣམས་ནས་དགའ་སྤྲོ་འཁོལ་བའི་ངང་སྐུའི་གཅུང་མོ་བཀའ་ཟུར་རྗེ་བཙུན་པདྨ་མཆོག་དང་རྒན་བློ་བཟང་བསྟན་འཛིན་ལགས་ཀྱིས་བཙན་བྱོལ་བོད་ཕྲུག་རྣམས་ལ་བྱམས་སྐྱོང་དང་། ཤེས་ཡོན་ཐོག་འགྲན་ཟླ་བྲལ་བའི་བྱས་རྗེས་ལ་ཡི་རང་གི་ཆེ་བསྟོད་གཟེངས་རྟགས་འདི་བཞིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ཁུལ་གྱི་བོད་མི་རྣམས་ལ་ཕྱི་ལོ་ ༢༠༡༤ ཟླ་ ༧ ཚེས་ ༣ ཉིན་དམིགས་བསལ་བཀའ་སློབ་ཀྱི་མཛད་སྒོའི་སྐབས་གསོལ་རས་སྩལ་གཏན་འཁེལ་ཡོད།
སློབ་གསོའི་ལས་དོན་གྱི་ཕུལ་བྱུང་དབུ་ཁྲིད་དེ། ཨ་མ་རྗེ་བཙུན་པདྨ་མཆོག་གིས་བཙན་བྱོལ་ནང་ཤེས་ཡོན་གྱི་ལྟེ་གནས་ཆེ་ཤོས་བོད་ཕྲུག་ཁྱིམ་སྡེ་འཛུགས་སྐྲུན་གནང་བར་ཐུགས་འགན་གཙོ་བཞེས་གནང་ཡོད། ཁོང་གི་རླབས་ཆེའི་དབུ་ཁྲིད་འོག་བཙན་བྱོལ་བོད་ཕྲུག་ཧ་ཅང་མང་པོར་རང་མི་རིགས་ཀྱི་རིག་གཞུང་ལ་གཅེས་སྐྱོང་གནང་བ་དང་ཆབས་ཅིག དེང་རབས་ཀྱི་ཤེས་ཡོན་ལ་སློབ་སྦྱོང་བྱེད་རྒྱུའི་གོ་སྐབས་བཟང་པོ་ཐོབ་ཡོད། ཁོང་ལ་ང་ཚོས་གཅེས་པའི་ངང་ཨ་མ་ལགས་ཞེས་འབོད་པ་བཞིན། ཁོང་གིས་ཀྱང་སློབ་གསོའི་སྙིང་པོ་སྟེ། བྱམས་བརྩེས་བཟུང་བའི་ཤེས་ཡོན་སྤྲོད་ཐབས་ལ་གཙིགས་ཆེན་དང་རྒྱུན་འཛིན་གྱིས་སློབ་གྲྭའི་ལམ་སྲོལ་ཞིག་བཏོད་གནང་ཡོད། གཟེངས་རྟགས་འདིས་ལ་དྭགས་ཁུལ་དུ་དཀའ་ཚེགས་འོག་འཚོ་དང་འཚོ་བཞིན་པའི་བཙན་བྱོལ་བོད་ཕྲུག་རྣམས་དང་ས་གནས་ཡུལ་མིའི་ཕྲུ་གུ་མི་ཉུང་བ་ཞིག་གི་སློབ་གསོའི་ལས་དོན་ཆེད། ཁོང་གིས་དམིགས་བསལ་ལེགས་སྐྱེས་ཕུལ་གནང་བར་བཀའ་དྲིན་རྗེས་དྲན་མཚོན་ཆེད་ཡིན།
གཞན་ཡང་ལ་དྭགས་བོད་ཕྲུག་ཁྱིམ་སྡེའི་དབུ་འཛིན་ཐོག་མ་སྟེ། རྒན་བློ་བཟང་བསྟན་འཛིན་ལགས་ཀྱིས་སློབ་གྲྭ་འདི་ཐོག་མར་འགོ་འཛུགས་དུས་ནས། ད་ལྟའི་གནས་སྟངས་བར་ཡར་རྒྱས་གོང་འཕེལ་ཐད་ཐུགས་འགན་གཙོ་བཞེས་གནང་ཡོད། ཁོང་གི་རླབས་ཆེའི་ཕུལ་བྱུང་གི་དབུ་ཁྲིད་འོག་སློབ་གྲྭ་འདི་བཞིན་ཁུལ་འདིའི་ཤེས་ཡོན་ལྟེ་གནས་རྩེ་ཕུད་ཅིག་ཏུ་འཕེལ་རྒྱས་བྱུང་ཡོད། གཞན་གྱིས་བགྲོད་པར་དཀའ་བའི་ལམ་བུ་དེད་དེ། རྒན་བསྟན་འཛིན་ལགས་དང་ཁོང་གི་ལྷག་བསམ་དག་པའི་དགེ་ལས་ཀྱི་དཔུང་ཁག་གིས། ལ་དྭགས་ཁུལ་གྱི་བཙན་བྱོལ་བོད་ཕྲུག་ཡོངས་ལ་སློབ་སྦྱོང་གི་གོ་སྐབས་ཐབས་འཚོལ་ཡོད་ཚད་གནང་ཡོད། ཁོང་གིས་སློབ་གྲྭ་འདིའི་རྨང་གཞི་ཧ་ཅང་བརྟན་པོ་བཏིང་གནང་བའི་བཀའ་དྲིན་ལ་བརྟེན་ནས། ད་ལྟའི་གནས་སྟངས་འདིར་སླེབས་ཐུབ་པ་བྱུང་ཡོད། ང་ཚོར་དཔལ་དུས་ཀྱི་འཁོར་ལོའི་དབང་ཆེན་ཐེངས་ ༣༣ པའི་དུས་བཟང་དང་བསྟུན་ནས་གཟེངས་རྟགས་འདི་བཞིན་འབུལ་རྒྱུའི་སྐལ་བཟང་གི་གོ་སྐབས་ཐོབ་པར་དགའ་སྤྲོ་དཔག་མེད་དུ་ཆེ། ལ་དྭགས་བོད་ཁྱིམ་སློབ་ཟུར་རྣམས་ནས་ཕྱི་ལོ་ ༢༠༡༤ ཟླ་ ༧ ཚེས་ ༣ ཉིན།
