༢༠༡༤ ཟླ་ ༦ ཚེས་ ༡༢ རེས་གཟའ་ཕུར་བུ།

༄༅། །ཕྱི་ལོ་ ༢༠༡༤ ཟླ་ ༦ ཚེས་ ༡༠ ཉིན་གྱི་ཕྱེད་ཡོལ་ཨོ་སི་ཊོ་ལི་ཡར་རྟེན་གཞི་བྱས་པའི་ས་གནས་བོད་རིགས་མཐུན་ཚོགས་ཀྱིས་གོ་སྒྲིག་འོག་ཨོ་སི་ཊོ་ལི་ཡའི་གྲོས་ཚོགས་གོང་མའི་འཐུས་མི་ལྕམ་སྐུ་ཌེ་བི་ར་ལགས་ཀྱིས་ (Deborah O’Neill) གྲོང་ཁྱེར་ (Sydney) སི་ཌེ་ནི་ཁུལ་དུ་གནས་སྡོད་བོད་མི་བརྒྱ་སྐོར་ཞིག་དང་ཐུག་འཕྲད་གནང་སྟེ་བོད་དོན་ལ་རྒྱབ་སྐྱོར་ཡོད་སྐོར་གྱི་གསུང་བཤད་གནང་དོན། སྤྱིར་བཏང་ང་རང་གྲོང་ཁྱེར་སི་ཌེ་ནི་ཁུལ་དུ་ལས་དོན་གལ་ཆེན་ཞིག་གི་ཆེད་དུ་ཡོང་བ་ཡིན། དེ་རིང་ས་གནས་འདིར་གནས་བཞུགས་བོད་མི་ཚོ་དང་ཐུག་རྒྱུ་བྱུང་བར་ཧ་ཅང་དགའ་པོ་བྱུང། དེ་སྔའི་གཞུང་འཛིན་ཚོགས་པའི་ངོས་ནས་རྒྱ་ནག་གཞུང་དང་མཉམ་དུ་ཡང་སྐོར་བསྐྱར་སྐོར་ཀྱིས་བོད་ཀྱི་གནད་དོན་གླེང་སློང་བྱས་ཡོད་པ་མ་ཟད། བོད་ནང་གི་བོད་མིས་བོད་ཀྱི་བདེན་དོན་ཆེད་རང་ལུས་མེར་བཏང་བའི་གནད་དོན་ཐོག་རྒྱ་ནག་གཞུང་དང་ལྷན་གླེང་སློང་ཐེངས་མང་བྱས་ཡོད།

ལྷག་པར་བོད་མིའི་རང་ལུས་མེར་སྲེག་གཏོང་དགོས་ཐུག་པའི་གནས་ཚུལ་སྐོར་ལ་རྒྱ་ནག་གཞུང་ནས་ཞིབ་འཇུག་བྱེད་དགོས་པའི་བསྐུལ་མ་ཡང་མང་པོ་བྱས་ཡོད། དེ་བཞིན་རྒྱ་ནག་གཞུང་ལ་བོད་ནང་ཡུལ་སྐོར་སྤྲོ་འཆམ་པ་དང་གསར་འགོད་པ་རྣམས་རང་དབང་ཐོག་ནས་འགྲོ་བསྐྱོད་བྱེད་ཆོག་པའི་ཆོག་མཆན་སྤྲོད་དགོས་སྐོར་བཤད་ཡོད། ཕྱོགས་མཚུངས་བོད་ནང་བོད་མིའི་འགྲོ་བ་མིའི་ཐོབ་ཐང་སྐོར་ལ་གཞུང་འཛིན་ཚོགས་པས་གླེང་སློང་མང་པོ་ཞིག་བྱས་མྱོང་ཡོད། ད་ལྟའི་ཆར་གཞུང་འཛིན་ཚོགས་པ་གསར་པ་བསླེབས་རུང་ང་ཚོའི་ངོས་ནས་བོད་ཀྱི་གནད་དོན་ཐོག་ལས་དོན་གང་འདྲ་ཞིག་བསྒྲུབ་ཀྱི་ཡོད་མེད་ཐོག་དོ་སྣང་སྔར་ལྷག་བྱེད་བཞིན་ཡོད། ང་ཚོ་ཨོ་སི་ཊོ་ལི་ཡ་ནི་མང་གཙོ་དང་རང་དབང་ལ་རྒྱབ་སྐྱོར་བྱེད་མཁན་ཆགས་ཡོད་སྟབས། བོད་ཀྱི་གནད་དོན་ཐོག་མ་འོངས་པར་ཡང་མུ་མཐུད་རྒྱབ་སྐྱོར་བྱེད་ངེས་ཡིན། ཞེས་སོགས་ཀྱི་གསུང་བཤད་གནང་ཡོད། །