༢༠༡༤ ཟླ་ ༦ ཚེས་ ༥ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༦ ཚེས་ ༥ ཉིན་རྡ་སྟེང་བོད་ཁྱིམ་སློབ་གྲྭའི་ཚོགས་ཁང་ནང་༸གོང་ས་༸སྐྱབས་མགོན་ཆེན་པོ་མཆོག་གི་ཆོས་འབྲེལ་ཉིན་གཉིས་པའི་སྔ་དྲོའི་ཆོས་ཐུན་གྲུབ་མཚམས་སྲིད་སྐྱོང་བློ་བཟང་སེང་གེ་མཆོག་གིས་བོད་མིའི་སྒྲིག་འཛུགས་ཀྱི་རྒྱལ་སྤྱིའི་སྟེང་དབུ་མའི་ལམ་གྱི་གོ་རྟོགས་ལས་འགུལ་རྒྱ་སྐྱེད་གཏོང་རྒྱུའི་ལས་གཞི་དང་འབྲེལ་བའི་ཡིག་ཆ་ཁག་གསུམ་མགོན་པོ་གང་ཉིད་མཆོག་ལ་སྤྱན་བསྟར་ཞུས་རྗེས་༸གོང་ས་མཆོག་གིས་བཀའ་སློབ་སྙིང་བསྡུས་ཤིག་སྩལ་ཏེ་ཆིབས་སྒྱུར་བསྐྱངས་གྲུབ་མཚམས་ཆུ་ཚོད་ ༡༢། ༡༥ ཐོག་གྲུབ་མཚམས་སྲིད་སྐྱོང་མཆོག་དང་ཕྱི་དྲིལ་བཀའ་བློན་མཆོག དྲུང་ཆེ་རྣམ་གཉིས་ལྷན་ཞུགས་ཐོག་སྲིད་སྐྱོང་བློ་བཟང་སེང་གེ་མཆོག་གིས་དེར་འདུས་ཕྱི་ནང་གི་གསར་འགོད་པ་ཁྱོན་མི་གྲངས་ ༤༠ བརྒལ་བའི་དབུས་སུ་དབུ་མའི་ལམ་གྱི་དྲ་རྒྱ་དབུ་འབྱེད་དང་གསར་འགོད་གསལ་བསྒྲགས་སྤེལ་དོན། ཚང་མར་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་འདི་གར་བོད་མིའི་སྒྲིག་འཛུགས་ཐོག་ནས་དབུ་མའི་ལམ་གྱི་གོ་རྟོགས་སྤེལ་རྒྱུའི་ལས་འགུལ་ཞིག་དབུ་འབྱེད་བྱེད་ཀྱི་ཡོད། གང་ལ་ཞེ་ན། བོད་པའི་སྤྱི་ཚོགས་དང་དམིགས་བསལ་ཕྱི་རྒྱལ་གྱི་ལུང་པ་མང་དག་ཅིག་ལ་བཅར་ཏེ་གནད་ཡོད་མི་སྣ་མང་པོ་ཞིག་དང་མཇལ་སྐབས། མང་པོ་ཞིག་གིས་དབུ་མའི་ལམ་གྱི་སྐོར་ཤེས་ཀྱི་འདུག་ཀྱང་ཁག་གཅིག་གིས་ཤེས་ཀྱི་མི་འདུག
དེ་བཞིན་གོ་ནོར་ཐེབས་མཁན་ཡང་མང་པོ་འདུག དེར་བརྟེན་ང་ཚོའི་ངོས་ནས་དབུ་མའི་ལམ་གང་འདྲ་ཞིག་ཡིན་མིན་རྒྱལ་སྤྱིའི་སྡིངས་ཆའི་ཐོག་ཁ་གསལ་པོ་ཞིག་ཞུ་ཐུབ་ན་དགེ་མཚན་ཆེན་པོ་མཐོང་བྱུང། དམིགས་བསལ་རྒྱ་ནག་གཞུང་གི་སྐུ་ཚབ་དང་གཞུང་ཚབ་བརྒྱུད་ནས་ཕྱི་རྒྱལ་ཁག་གི་གནད་ཡོད་མི་སྣ་དང་མི་དམངས་ནང་དབུ་མའི་ལམ་གྱི་སྐོར་ལ་འགྲེལ་བཤད་ལོག་པ་བརྒྱབ་སྟེ་གོ་ནོར་ཐེབས་པ་མང་པོ་ཞིག་ཡོང་གི་འདུག དེར་བརྟེན་དེ་རིང་གི་ལས་འགུལ་འདི་བརྒྱུད་ནས་དྲ་རྒྱ་དང་བརྙན་འཕྲིན། དེ་བཞིན་ཡིག་ཐོག་ལ་ང་ཚོས་དབུ་མའི་ལམ་གྱི་སྐོར་ཁ་གསལ་བཀོད་པ་དེ་རྒྱལ་སྤྱིའི་སྡིངས་ཆ་དང་བོད་རིགས་ནང་ཁུལ། ཕྱོགས་མཚུངས་བོད་ནང་ཙམ་མ་ཟད། རྒྱ་ནག་ནང་ནས་ཤེས་རྟོགས་བྱུང་བ་ཡིན་ན། དགེ་མཚན་ཆེན་པོ་ཡོད་པའི་ཐོག་ནས་ལས་འགུལ་འདི་སྤེལ་བ་ཡིན། ཞེས་རིམ་བཞིན་བོད་དབྱིན་གཉིས་ནང་གསར་འགོད་གསལ་བསྒྲགས་སྤེལ་ཡོད། དེ་རྗེས་ཕྱི་དྲིལ་ལས་ཁུངས་ནས་དབུ་མའི་ལམ་གྱི་སྐོར་ཆེད་མངགས་བཟོ་སྐྲུན་གནང་བའི་སྐར་མ་ ༧ ཅན་གྱི་བརྙན་འཕྲིན་དེ་བསྟན་རྗེས་སྲིད་སྐྱོང་མཆོག་གིས་དབུ་མའི་ལམ་གྱི་དྲ་རྒྱ་དབུ་འབྱེད་གནང་ཡོད། དེ་ནས་ཕྱི་དྲིལ་བཀའ་བློན་བདེ་སྐྱིད་ཆོས་དབྱངས་མཆོག་གིས་དབུ་མའི་ལམ་གྱི་དྲ་རྒྱའི་ནང་བོད་རྒྱ་དབྱིན་གསུམ་གཙོ་བོར་གྱུར་བའི་ཇར་མན་སྐད་དང་། ཕ་རན་སི། དེ་བཞིན་སེ་པན་ཡི་གེ་བཅས་ཁྱོན་ཡིག་རིགས་ཁག་བདུན་ཐོག་ཡིག་ཆ་གྲ་སྒྲིག་གནང་ཡོད་སྐོར་སོགས་ཀྱི་ངོ་སྤྲོད་གསུང་བཤད་གནང་། དེ་ནས་སྲིད་སྐྱོང་མཆོག་གིས་གསར་འགོད་པའི་དྲི་བར་ལན་འདེབས་གནང་གྲུབ་མཚམས་ཕྱི་དྲིལ་དྲུང་ཆེ་བཀྲ་ཤིས་ཕུན་ཚོགས་ལགས་ཀྱིས་ཐུགས་རྗེ་ཆེ་ཞུས་ཏེ་གསར་འགོད་གསལ་བསྒྲགས་གྲོལ།
གསར་དུ་དབུ་འབྱེད་གནང་བའི་དབུ་མའི་ལམ་གྱི་དྲ་རྒྱའི་ཁ་བྱང་ནི། www.middlewayapproach.org ཞེས་པ་ཡིན་འདུག
