༢༠༡༤ ཟླ་ ༦ ཚེས་ ༡༨ རེས་གཟའ་ལྷག་པ།
༄༅། །ཕྱི་ལོ་༢༠༡༤ ཟླ་༦ ཚེས་ ༡༦ ཉིན་བོད་ཀྱི་དཔའ་བོའི་ཁྱུ་མཆོག་ཨ་འབྲུག་མགོན་པོ་བཀྲ་ཤིས་མཆོག་གིས་དབུ་ཁྲིད་པའི་རྒྱལ་གཅེས་པ་རྣམས་ཀྱིས་བོད་བསྟན་སྲིད་དང་མི་རིགས་རང་དབང་བཅས་ཀྱི་ཆེད་དུ། བོད་ཀྱི་བསྟན་སྲུང་དང་བླངས་དམག་གི་སྒྲིག་འཛུགས་འདི་ཉིད་ལྕགས་ཚ་གྲུ་གུ་ཐང་དུ་དངོས་སུ་གསར་འཛུགས་ཞུས་ནས་ལོ་ ༥༦ འཁོར་བའི་དུས་དྲན་སྲུང་བརྩི་ཐེངས་ ༥༥ པའི་མཛད་སྒོ་འདི་བཞིན། 
གོང་ཚེས་ཉིན་གྱི་སྔ་དྲོ་ཆུ་ཚོད་༧།༣༠ ཐོག་བཞུགས་སྒར་རྡ་སའི་ཕོ་བྲང་གི་སྐུ་རྒྱབ་ལྷ་རྒྱལ་རིའི་རྟེན་མཁར་མདུན་དུ་སྔར་ལམ་བཞིན་ཞུས་པ་ལྟར། བོད་མི་མང་སྤྱི་འཐུས་རྒྱུན་ལས་ཀྱི་སྐུ་ཚབ་སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་ཆུ་ཚོད་ ༧ ཐོག་མཛད་སྒོའི་སྐུ་མགྲོན་གཙོ་བོར་ཕེབས་ཡོད་འདུག
དེ་ཡང་ཆུ་ཚོད་༧། ༣༠ ཐོག་སྐུ་མགྲོན་རྣམས་བཞུགས་གྲལ་དུ་འཁོད་མཚམས། གནས་ཆུང་གྲྭ་ཚང་གི་ཆོག་གྲྭ་བཞི་ནས་དབུ་བསྐུལ་གྱིས་བསང་གསོལ་རྒྱས་པ་ཆུ་ཚོད་༡ ཙམ་རིང་བཏོན་ཅིང་། དེ་ནས་སྐུ་མགྲོན་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས། སྐུ་གཤེགས་རྒྱལ་གཅེས་པ་རྣམས་ལ་མྱ་ངན་ངག་བཅད་སྐར་མ་གཅིག་རིང་གནང་སྟེ། གསོལ་ཇ་དང་འབྲས་སིལ་ཕུལ་གྲུབ་མཚམས། ཆུ་སྒང་དབུས་རྒྱུན་ལས་ཁང་གི་གསུང་བཤད་སྒྲོགས་སྦྱང་གྲུབ་རྗེས། བོད་མི་མང་སྤྱི་འཐུས་རྒྱུན་ལས་ཀྱི་སྐུ་ཚབ་སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང་དང་། དེ་ནས་ཐུགས་རྗེ་ཆེ་ཞུའི་གསུང་བཤད་ཀྱི་མཇུག་ཏུ་ཀི་བསོ་ལྷ་རྒྱལ་འཐེན་ཏེ་མཛད་སྒོ་རྒྱལ་ཁའི་ངང་གྲོལ་ཡོད།
