༢༠༡༤ ཟླ་ ༦ ཚེས་ ༩ རེས་གཟའ་ཟླ་བ།

༄༅། །ཕྱི་ལོ་ ༢༠༡༤ ཟླ་ ༦ ཚེས་ ༨ ཉིན་གྱི་སྔ་དྲོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨི་ཊ་ལི་ཁུལ་དུ་ཆོས་འབྲེལ་གྱི་མཛད་འཕྲིན་ཆེད་བཞུགས་སྒར་ནས་ཕེབས་འགྲོའི་ཐོག་ག་གྷལ་དང་། དེ་ནས་མཁའ་ལམ་བརྒྱུད་ལྡི་ལིར་ཆིབས་སྒྱུར་བསྐྱངས་ཡོད།

དེ་ཡང་༸གོང་ས་མཆོག་ཉིན་གྲངས་གཉིས་རིང་གི་ལྡི་ལི་ཁུལ་གྱི་མཛད་འཆར་ལེགས་པར་གྲུབ་རྗེས། ཕྱི་ཚེས་ ༡༠ ཉིན་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་ཐོག་ཇར་མན་བརྒྱུད་ཨི་ཊ་ལིར་ཆིབས་སྒྱུར་བསྐྱང་རྒྱུ་ཡིན་འདུག དཔལ་ལྡན་དགའ་ལྡན་ཕོ་བྲང་ཡིག་ཚང་གི་དྲ་ཚིགས་ནང་སྤེལ་བའི་མཛད་འཆར་ལྟར་ན། ཐེངས་འདིའི་མགོན་པོ་གང་ཉིད་མཆོག་གི་ཨི་ཊ་ཁུལ་དུ་ཆོས་འབྲེལ་གྱི་མཛད་འཆར་འདི་བཞིན་ཁུལ་དེར་རྟེན་གཞི་བྱས་པའི་བླ་མ་ཙོང་ཁ་པ་ཆོས་ཚོགས་ (Istituto Lama Tzong Khapa) ཀྱིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་ཐོབ་སྟེ། ཕྱི་ཚེས་ ༡༤ ཉིན་ཨི་ཊ་ལིའི་གྲོང་ཁྱེར་ལི་ཝོར་ནོ་ (Livorno) ནང་དད་ལྡན་མང་ཚོགས་རྣམས་ལ་དཔལ་མགོན་ཀླུ་སྒྲུབ་ཀྱིས་མཛད་པའི་བཤེས་སྤྲིངས་དང་འཕགས་པ་ཐུགས་རྗེ་ཆེན་པོའི་བཀའ་དབང་སྩལ་རྒྱུ་མ་ཟད། ཕྱི་ཚེས་ ༡༥ ཉིན་གྱི་སྔ་དྲོ་མགོན་པོ་གང་ཉིད་མཆོག་གིས་བླ་མ་ཙོང་ཁ་པ་ཆོས་ཚོགས་ཀྱི་གླེང་སྟེགས་ཤིག་གི་ཐོག་དབུ་བཞུགས་དང་། ཕྱེད་ཡོལ་བྱམས་བརྩེ་ལྡན་པའི་བཟང་སྤྱོད་ (Compassionate Ethics) ཅེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བཀའ་དྲིན་སྩལ་རྒྱུ་ཡིན་འདུག་པ་བཅས།།