༢༠༡༤ ཟླ་ ༦ ཚེས་ ༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༣༡ ཉིན་༸གོང་ས་༸སྐྱབས་མགོན་ཆེན་པོ་མཆོག་གིས་རྒྱ་གར་མ་ཧཱ་རཱ་ཤི་ཊཱ་མངའ་སྡེའི་རྒྱལ་ས་མུམ་བྷེ་རུ་རྟེན་གཞི་བྱས་པའི་སོམ་ཡ་མཐོ་སློབ་ཀྱི་རྭ་བའི་ནང་སློབ་ཆུང་གསར་པ་Somaiya School ཞེས་པ་དབུ་འབྱེད་མཛད་ཡོད། སྐབས་དེར་ཐོག་མར་སློབ་ཕྲུག་ཚོས་༸གོང་ས་༸སྐྱབས་མགོན་ཆེན་པོ་མཆོག་ལ་གཞས་སྣ་འཁྲབ་སྟོན་གྱི་ལམ་ནས་ཕེབས་བསུ་གཟབ་རྒྱས་ཞུས་རྗེས་མགོན་པོ་གང་ཉིད་མཆོག་གིས་སློབ་གྲྭ་དབུ་འབྱེད་མཛད།
དེ་ནས་ཚོགས་ཁང་ནང་དུ་ཆིབས་སྒྱུར་བསྐྱངས་ཏེ་ཞབས་སྟེགས་ཐོག་༸ཞབས་སོར་འཁོད་བསྟུན། དགེ་ལས་སློབ་ཕྲུག་དང་། ཕ་མ་བཅས་ཚང་འཛོམས་ཀྱིས་ལེགས་སྦྱར་སྐད་ཐོག་ཤིས་བརྗོད་གསུང་འདོན་གནང་བ་མ་ཟད། རྒྱ་གར་ལྷོ་ཕྱོགས་ཀྱི་གཞས་སྣ་འཁྲབ་སྟོན་གཟིགས་འབུལ་ཞུས།
དེ་རྗེས་༸གོང་ས་མཆོག་གིས་བཀའ་སློབ་སྩལ་དོན། གཅེན་གཅུང་ཕོ་མོ་ཚོར་ཐོག་མར་འཚམས་འདྲི་ཞུ་རྒྱུ་ཡིན། ངོས་རང་དེ་རིང་འདིར་བཅར་རྒྱུ་བྱུང་བར་ཧ་ཅང་དགའ་པོ་བྱུང་། དེར་བརྟེན་གོ་སྐབས་འདི་བརྒྱུད་ནས་སོམ་ཡ་མི་རབས་གསུམ་གྱིས་ཤེས་ཡོན་ཐོག་ལྷག་བསམ་རྣམ་དག་ཐོག་འབད་བརྩོན་གནང་བར་ངོས་ཀྱིས་བསྔགས་བརྗོད་ཞུ་རྒྱུ་དང་། ངོས་ལ་མཛའ་བརྩེའི་ཐོག་སེམས་ཐག་ཉེ་པོ་གནང་བར་ཐུགས་རྗེ་ཆེ་ཞུ་རྒྱུ་ཡིན། རྒྱ་གར་ནི་འཛམ་གླིང་ནང་མི་འབོར་མང་ཤོས་ཅན་གྱི་མང་གཙོའི་རྒྱལ་ཁབ་ཚད་མཐོ་པོ་ཡོད་མཁན་ཞིག་ཆགས་ཡོད་པ་མ་ཟད། འཛམ་གླིང་ནང་གི་ཆོས་ལུགས་གཙོ་གྲས་འདྲ་མིན་མང་པོ་ཡོད་པ་རྣམས་ཞི་བདེ་དང་འཆམ་མཐུན་ངང་ནས་མཉམ་གནས་བྱེད་བཞིན་ཡོད། མི་ཚེའི་ནང་ཡར་རྒྱས་ཡོང་བར་ཤེས་ཡོན་ངེས་པར་དུ་དགོས། གཞུང་གིས་ཤེས་ཡོན་ཐོག་འགྲོ་གྲོན་བཏང་ཡོད་ཀྱང་གཅིག་བྱས་ན་ལྐོག་ཟ་བྱས་པར་བརྟེན་གཞུང་གི་དངུལ་དེ་དག་དམིགས་ཡུལ་གཞིར་བཟུང་དོན་འཁྱོལ་བྱུང་མེད། དེར་བརྟེན་སྒེར་གྱི་སློབ་གྲྭ་འདི་ལྟ་བུར་ལས་འགན་ཧ་ཅང་གལ་ཆེན་པོ་ཡོད། གཞུང་འབྲེལ་མིན་པའི་ཚོགས་པ་མང་པོས་རྒྱ་གར་གྲོང་གསེབ་ས་ཁུལ་ཁག་ཏུ་དོན་སྨིན་ལྡན་པའི་ལས་འཆར་འདྲ་མིན་སྤེལ་བཞིན་ཡོད་པ་ངོས་ཀྱིས་མཐོང་བྱུང་བ་མ་ཟད། སྐབས་དེར་ངོས་ཀྱིས་ད་དུང་ཚོགས་པ་དེ་དག་ནང་ཕན་ཚུན་བསམ་ཚུལ་དང་ཉམས་མྱོང་བརྗེ་ལེན་བྱས་ཚེ་ཧ་ཅང་ཕན་ཐོགས་ཆེན་པོ་ཡོད་སྐོར་བརྗོད་རྒྱུ་བྱུང་། ཞེས་བཀའ་སློབ་སྩལ་བ་དང་སྦྲགས། སྤྱིར་རྒྱ་ནག་དེ་ད་ལྟ་མང་གཙོའི་རྒྱལ་ཁབ་གཅིག་ཆགས་མེད་ཀྱང་རྒྱ་ནག་ནང་དུ་བཟང་ཕྱོགས་ཀྱི་འགྱུར་བ་ཧ་ཅང་འགྲོ་བཞིན་ཡོད་པ་དང་། རྒྱ་གར་གྱིས་རྒྱ་ནག་ནས་བློ་སྐྱེས་ལེན་རྒྱུའི་གོ་སྐབས་མང་པོ་ཡོད། མིའི་སྤྱི་ཚོགས་ཀྱི་དཔལ་ཡོན་རྙིང་གྲས་འགའ་ཤས་ཡོད་ཁོངས་ནས་རྒྱ་གར་གཅིག་ཆགས་ཡོད་པ་མ་ཟད། འཛམ་གླིང་ནང་དུ་སེམས་འགུལ་གཏོང་ཐུབ་མཁན་གྱི་ལྟ་གྲུབ་དང་རིག་པ་སྨྲ་བ་མང་ཤོས་རྒྱ་གར་ནས་བྱུང་ཡོད་པ་དང་།
དེ་བཞིན་རྒྱ་གར་ནང་འཚེ་མེད་ཞི་བ་དང་ཆོས་ལུགས་མཐུན་སྒྲིལ་གྱི་རིག་གཞུང་དེ་དག་ལ་རྟེན་ནས་ཆོས་ལུགས་འདྲ་མིན་འཆམ་མཐུན་ངང་མཉམ་གནས་ཐུབ་ཡོད། འོན་ཀྱང་འདས་པའི་དུས་སྐབས་དེ་བསྐྱར་ཟློས་བྱ་ཐབས་མེད་པར་བརྟེན་ང་ཚོས་གོམ་པ་མདུན་སྤོ་བྱེད་དགོས། སྲོལ་རྒྱུན་གྱི་རིན་ཐང་རྨང་གཞིར་བཞག་པའི་ཐོག་ནས་རྒྱ་གར་འདི་དུས་རབས་ ༢༡ པའི་ཕྱོགས་སུ་ཡར་རྒྱས་ཀྱི་གོམ་སྟབས་སྤོ་དགོས། དེ་ལྟར་བྱ་ཐུབ་ཚེ་རྒྱ་གར་མི་འབོར་ཐེར་འབུམ་གཅིག་ལྷག་ཡོད་པ་ཙམ་ལ་ཕན་ཐོགས་ཡོང་རྒྱུ་མ་ཟད། ཨེ་ཤི་ཡ་དང་འཛམ་གླིང་ཁྱོན་ཡོངས་ལ་ཕན་ཐོགས་ཡོང་རྒྱུ་ཡིན། རྒྱ་གར་གྱིས་ཤེས་ཡོན་ཐོག་རིག་པ་འགྲིམས་ནས་འབད་བརྩོན་བྱེད་དགོས། དེང་དུས་ཀྱི་ཤེས་ཡོན་གཅིག་པུས་འགྲིག་ཐབས་མེད། དེའི་སྟེང་ནང་བསམ་བློ་དང་འབྲེལ་བའི་བཟང་པོའི་རིན་ཐང་དེ་དག་ཐོག་སློབ་སྦྱོང་བྱེད་དགོས། ངོས་ཀྱིས་ཚན་རིག་པ་དང་ལྷན་གྲོས་མོལ་བྱེད་སྐབས་རྒྱ་གར་གནའ་རབས་ནས་དར་བའི་ནང་གི་བསམ་བློ་དང་སེམས་ཚོར་གྱི་རྣམ་གཞག་དང་འབྲེལ་བའི་ལྟ་གྲུབ་ཧ་ཅང་ཕྱུག་པོ་ཡོད་པ་དེ་དག་ལ་བསྔགས་བརྗོད་ཆེན་པོ་ཞུས་དང་ཞུ་བཞིན་ཡོད་པ་མ་ཟད། ལྟ་གྲུབ་དེ་ལ་སློབ་སྦྱོང་བྱས་པ་བརྒྱུད་ནས་ང་ཚོའི་སེམས་རྒྱུད་ཀྱི་ཆགས་སོགས་ཉོང་མོངས་རྣམས་ཆུང་དུ་བཏང་ནས་བྱམས་བརྩེའི་བསམ་བློ་གོང་མཐོར་གཏོང་དགོས་པ་རྗོད་བཞིན་ཡོད། ང་ཚོས་ལུས་པོའི་འཕྲོད་བསྟེན་གལ་ཆེར་བརྩིས་པ་ལྟར་སེམས་ཁམས་ཀྱི་འཕྲོད་བསྟེན་ཐོག་དེ་མཚུངས་གཙིགས་ཆེར་འཛིན་དགོས། ཞེས་སོགས་ཀྱི་བཀའ་སློབ་སྩལ་བསྟུན་ཆོས་འབྲེལ་འཕྲོ་སྐྱོང་མཛད།
