༢༠༡༤ ཟླ་ ༦ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༦ ཚེས་ ༡༠ སྔ་དྲོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཨི་ཊ་ལིའི་ཊུ་སི་ཀན་ནི་མངའ་སྡེའི་པི་ས་ Pisa རྫོང་གི་པོ་མ་ཡ་ Pomaia གྲོང་གསེབ་ནང་རྟེན་གཞི་བྱས་པའི་བླ་མ་ཙོང་ཁ་པའི་ཆོས་ཚོགས་སུ་༸ཞབས་སོར་བདེ་བར་འཁོད་སྐབས་པི་ས་རྫོང་སྲིད་གཞུང་གི་སྐུ་ཚབ་འཐུས་མི་སྐུ་ཞབས་ཕ་རན་སི་སི་ཤབ་ Dr. Francis Sharp མཆོག་དང་པི་ས་རྫོང་ཁོངས་ཀྱི་གཙོ་འཛིན་ President of the Province of Pisa སྐུ་ཞབས་ཨེན་ཌི་རི་ཡ་པི་ཡ་རོ་ནི་ Dr. Andrea Pieroni མཆོག
དེ་བཞིན་པི་ས་གྲོང་སྡེའི་སྤྱི་ཁྱབ་པ་ Mayor of Pisa སྐུ་ཞབས་མར་ཁོ་ཕི་ལི་པེ་ཆི་ Dr. Marco Filippeschi མཆོག་བཅས་གནད་ཡོད་མི་སྣས་གཙོས་ས་གནས་དད་ལྡན་སེར་སྐྱ་མང་ཚོགས་དང་བོད་རིགས་བཅས་ཀྱིས་ལག་ཏུ་དཀར་གཙང་མཇལ་དར་དང་བདུག་སྤོས། མེ་ཏོག་སོགས་ཐོགས་ཏེ་དགའ་དད་སྤྲོ་གསུམ་གྱི་སྒོ་ནས་ཕེབས་བསུའི་སྣེ་ལེན་གཟབ་རྒྱས་ཞུས་འདུག
བརྙན་འཕྲིན་གཟིགས་ཆེད་འདིར་གནོན།
དེ་ཡང་༸གོང་ས་མཆོག་གིས་ཕྱི་ཟླ་ ༦ ཚེས་ ༡༠ ནས་དབུ་འཛུགས་ཀྱིས་ཕྱི་ཚེས་ ༡༦ བར་ཁྱོན་ཉིན་གྲངས་དྲུག་རིང་གི་མཛད་འཆར་ཁྲོད་ཆོས་ཚོགས་དེ་ནས་བཞེངས་སྐྲུན་ཞུས་པའི་མཐོ་ཚད་མི་ཊར་ ༥ ཅན་གྱི་འཕགས་པ་ཐུགས་རྗེ་ཆེན་པོ་ཕྱག་བཞི་པའི་སྐུ་བརྙན་དབུ་འབྱེད་རབ་གནས་བཀའ་དྲིན་བསྐྱང་རྒྱུ་དང་སྦྲགས། ཕྱི་ཚེས་ ༡༣ ཉིན་བྱམས་བརྩེའི་ཉམས་ལེན་གོང་མཐོར་གཏོང་ཐབས་སྐོར་བཀའ་སློབ་སྩལ་རྒྱུ་མ་ཟད། ཕྱི་ཚེས་ ༡༤ ཉིན་ཨི་ཊ་ལིའི་གྲོང་ཁྱེར་ལི་ཝོར་ནོ་ (Livorno) ནང་དད་ལྡན་མང་ཚོགས་རྣམས་ལ་དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བཤེས་སྤྲིངས་དང་འཕགས་པ་ཐུགས་རྗེ་ཆེན་པོའི་བཀའ་དབང་སྩལ་རྒྱུ་དང་།
ཕྱི་ཚེས་ ༡༥ ཉིན་གྱི་སྔ་དྲོ་མགོན་པོ་གང་ཉིད་མཆོག་གིས་བླ་མ་ཙོང་ཁ་པའི་ཆོས་ཚོགས་ཀྱི་གླེང་སྟེགས་ཤིག་གི་ཐོག་དབུ་བཞུགས་དང་། ཕྱེད་ཡོལ་བྱམས་བརྩེ་ལྡན་པའི་བཟང་སྤྱོད་ཅེས་པའི་བརྗོད་གཞིའི་ཐོག་མང་ཚོགས་ལ་བཀའ་སློབ་བཀའ་དྲིན་སྩལ་རྒྱུ་ཡིན་འདུག བཀའ་སློབ་དེ་དག་ཨི་ཊ་ལི་དང་དབྱིན་སྐད། ཕ་རན་སི། སི་པེན། ཨུ་རུ་སུ། རྒྱ་སྐད་སོགས་ནང་གསུང་བསྒྱུར་ཞུ་རྒྱུ་མ་ཟད། ཨི་ཊ་ལིའི་གྲོང་ཁྱེར་མི་ལན་ནང་བཙོན་པ་གྲངས་ ༡༢༠༠ ལྷག་གིས་བཀའ་སློབ་ཐད་ཀར་གཟིགས་ཐུབ་རྒྱུའི་མཐུན་རྐྱེན་བསྐྲུན་ཡོད་འདུག ཐེངས་འདིར་ཨི་ཊ་ལིར་ཆིབས་སྒྱུར་ཐེངས་ ༢༥ པ་ཡིན་པ་དང་། ཆིབས་སྒྱུར་ཐོག་མ་དེ་ཕྱི་ལོ་ ༡༩༧༣ ལོར་བསྐྱངས་ཡོད། དེ་བཞིན་ཊུ་སི་ཀན་ནི་མངའ་སྡེའི་པི་ས་ Pisa རྫོང་གི་པོ་མ་ཡ་ Pomaia གྲོང་གསེབ་ནང་ཆིབས་སྒྱུར་བསྐྱངས་ཐེངས་ ༥ པ་དེ་ཆགས་ཡོད།
