༢༠༡༤ ཟླ་ ༦ ཚེས་ ༡༠ རེས་གཟའ་མིག་དམར།
༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་གིས་ཕྱིལོ་ ༢༠༡༤ ཟླ་ ༦ ཚེས་ ༢ ཉིན་འཇིགས་བྲལ་གློག་བརྙན་བཟོ་སྐྲུན་པའི་ལས་རོགས་ཆབ་སྲིད་བཙོན་ཟུར་མགོ་ལོག་འཇིགས་མེད་ལགས་དང་ཐུག་འཕྲད་གནང་སྟེ་ཆུ་ཚོད་ ༢ ཙམ་རིང་གསུང་མོལ་ལྷུག་པོ་གནང་ཡོད། མགོ་ལོག་འཇིགས་མེད་ལགས་སུ་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས་དཔའ་བོའི་གཟེངས་རྟགས་ཕུལ་ཡོད། དེ་ཡང་ཁོང་སྲིད་སྐྱོང་མཆོག་དང་མཇལ་འཕྲད་སྐབས་རྒྱ་ནག་གི་བཙོན་ཁང་ནང་དཀའ་སྡུག་ཇི་འདྲ་མྱངས་མིན་སྐོར་དང་ཕྱིས་སུ་རྒྱ་གར་ལ་བྲོས་བྱོལ་དུ་ཕེབས་སྟངས། དེ་བཞིན་ད་ལྟའི་བོད་ནང་གི་ཆབ་སྲིད་ཐོག་ཛ་དྲག་གི་གནས་སྟངས་སྐོར་སོགས་ཞིབ་ཕྲ་གསལ་བཤད་ཞུས་འདུག སྐབས་དེར་སྲིད་སྐྱོང་མཆོག་གིས་མགོ་ལོག་འཇིགས་མེད་ལགས་རྒྱ་གར་དུ་བདེ་ཐང་ངང་བྲོས་བྱོལ་ལ་ཕེབས་ཐུབ་པར་ཧ་ཅང་དགའ་ཚོར་བྱུང་ཡོད་སྐོར་དང་། ལྷག་པར་དུ་འཇིགས་བྲལ་གློག་བརྙན་བཟོ་སྐྲུན་པ་དོན་གྲུབ་དབང་ཆེན་ལགས་རྒྱ་ནག་གཞུང་གིས་ལོ་དྲུག་གི་ཁྲིམས་ཐག་བཅད་རྗེས་གློད་བཀྲོལ་བཏང་བའི་ཐོག་དགའ་ཚོར་ཆེན་པོ་བྱུང་ཡོད་སྐོར་གསུངས་པ་དང་སྦྲགས། མགོ་ལོག་འཇིགས་མེད་ལགས་ལ་ཁོང་གི་མྱོང་ཚོར་རྣམས་དང་བོད་ནང་ཛ་དྲག་གནས་སྟངས་སྐོར་སོགས་བཙན་བྱོལ་བོད་མིའི་སློབ་གྲྭ་དང་། རྒྱ་གར་མཐོ་སློབ་ཁག་ནང་སློབ་གཉེར་བྱེད་བཞིན་པའི་བོད་པའི་སློབ་ཕྲུག་བཅས་ལ་འགྲེལ་བཤད་གནང་ཐུབ་ཚེ་དགེ་མཚན་ཡོད་སྐོར་གསུངས་ཡོད།