༢༠༡༤ ཟླ་ ༦ ཚེས་ ༢ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༦ ཚེས་ ༢ ཉིན་རྡ་ས་བཞུགས་སྒར་བོད་ཀྱི་སྨན་རྩིས་ཁང་གི་ཚོགས་ཁང་ནང་དབུས་སྨན་རྩིས་མཐོ་སློབ་ཁང་དབུ་བརྙེས་ནས་མི་ལོ་ ༥༣ འཁོར་བའི་རིག་གཞུང་སྲུང་བརྩིའི་དུས་དྲན་མཛད་སྒོར་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་གསུང་བཤད་གནང་དོན། དེ་རིང་སྨན་རྩིས་མཐོ་སློབ་ཁང་དབུ་བརྙེས་ནས་ལོ་ ༥༣ འཁོར་བའི་རིག་གཞུང་སྲུང་བརྩིའི་མཛད་སྒོ་ཚོགས་ཀྱི་ཡོད། ཕྱོགས་མཚུངས་ཕྱི་ལོ་ ༢༠༡༤ ལོ་འདི་བཞིན་འཛིན་སྐྱོང་བཀའ་ཤག་ངོས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་ཞུ་རྒྱུར་རྩི་བཞིན་ཡོད་པ་དང་སྟབས་བསྟུན་དུས་དྲན་སྲུང་བརྩི་ཞུ་གི་ཡོད། དེ་རིང་མཛད་སྒོར་ཕེབས་པའི་སྐྱབས་གནས་དགེ་འདུན་གྱི་སྡེ། སྐུ་མགྲོན་གཙོ་བོ་འཕྲོད་བསྟེན་བཀའ་བློན་མཆོག་དང་། སྨན་རྩིས་ཁང་གི་འགན་འཛིན་སོགས་རྣམ་པ་ལྷན་རྒྱས་ལ། ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
འདི་ལོ་༸གོང་ས་༸སྐྱབས་མགོན་ཆེན་པོ་མཆོག་གིས་ནོ་བེལ་ཞི་བདེའི་གཟེངས་རྟགས་བཞེས་ནས་ལོ་ ༢༥ འཁོར་བཞིན་ཡོད་པ་མ་ཟད། ལྷག་པར་བོད་བསྟན་སྲིད་ཀྱི་དབུ་ཁྲིད་མཛད་དེ་མི་ལོ་ ༦༠ ལྷག་ཕྱིན་པའི་རིང་ལ་སྐུ་ལས་འཛད་མེད་བསྐྱོན་ཡོད་པ་ང་ཚོས་ཤེས་གསལ་རེད། དེར་བརྟེན་འདི་ལོ་བོད་མིའི་སྒྲིག་འཛུགས་ངོས་ནས་༸གོང་ས་མཆོག་ལ་བཀའ་དྲིན་རྗེས་དྲན་ཞུ་རྒྱུའི་ལོར་སྲུང་བརྩི་ཞུ་བཞིན་ཡོད་སྟབས། དེ་རིང་སྨན་རྩིས་ཁང་གི་དུས་དྲན་མཛད་སྒོ་འདི་ཡང་༸གོང་ས་མཆོག་གི་མཛད་འཕྲིན་ལ་བསྔགས་བརྗོད་ཐོག་མགོན་པོ་གང་ཉིད་མཆོག་ལ་བཀའ་དྲིན་རྗེས་དྲན་ཞུ་བཞིན་ཡོད་པ་ནི་ཧ་ཅང་ཡག་པོ་རེད། དེ་ལས་ཀྱང་༸གོང་ས་མཆོག་གི་བཀའ་གསུང་ཅི་སྒྲུབ་གནང་ཐུབ་པ་དགོས་རྒྱུ་ཧ་ཅང་གལ་ཆེན་པོ་རེད། གོང་དུ་སློབ་སྤྱིས་གསུང་གསལ་ལྟར། ༸གོང་ས་མཆོག་གི་ཐུགས་དགོངས་གཞིར་བཟུང་སྨན་གྱི་ཐོག་ལ་ཡིན་རུང། སྨན་གྱི་རིག་པའི་གནས་དེ་རྒྱ་ཆེན་གཏིང་ཟབ་ཡིན་པར་བརྟེན། དེའི་ནང་ད་ལྟ་བར་དུ་དམིགས་བསལ་རིགས་གཅིག་རྐང་འཛིན་གྱི་ལས་རིམ་ཐོག་ཕྱིན་པ་ཞིག་མངོན་མ་སོང་། དེའི་ཐོག་འབད་བརྩོན་གནང་གི་ཡོད། ཅེས་གསུངས་པ་ནི་ཡག་པོ་རེད།
ཕྱི་ལུགས་ཀྱི་འགྲོ་སྟངས་གཞིར་བཟུང་འདི་ལོ་ནས་འགོ་བཙུགས་ཏེ། སློབ་མཐར་སོན་པ་རྣམས་ལ་རང་ཉིད་ཀྱི་ཤེས་ཚད་དང་མཐུན་པའི་གྱོན་ཆས་གསར་གཏོད་གནང་བ་ཧ་ཅང་ཡག་པོ་རེད། དེ་བཞིན་ཕྱིའི་གྱོན་ཆས་ཁོ་ནར་མ་ཡིན་པར་ནང་གི་ལས་ཀ་བྱེད་སྟངས་ལ་འགྱུར་བ་ཤུགས་ཆེ་ཙམ་གཏོང་ཐབས་བྱེད་དགོས། ལོ་མང་པོ་ཞིག་ནས་སྨན་རྩིས་ཁང་ནང་ཡར་རྒྱས་གཏོང་འོས་པ་དང་གཏོང་ཐུབ་པ་གང་ཞིག་ཡོད་མེད་ཐོག་སྐབས་དུས་སོ་སོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་ཡོད། དེར་བརྟེན་ད་ལྟའི་གནས་བབ་དང་བསྟུན་ནས་ལག་ལེན་བསྟར་ཐུབ་པ་དང་མི་ཐུབ་པའི་གནས་སྟངས་ག་འདྲ་ཆགས་འདུག སྤྱིར་བཏང་སྨན་རྩིས་ཁང་ནས་ཏན་ཏན་ཐུགས་ཞིབ་གནང་གི་ཡོད་ངེས་རེད། དངོས་སུ་དེའི་ཐོག་ཁྱེད་རང་ཚོའི་ནང་ནས་ཆེད་མཁས་པའི་ཚོགས་ཆུང་བཙུགས་ཏེ། ད་ལྟ་བར་༸གོང་ས་མཆོག་གིས་བཀའ་སློབ་གང་ཞིག་ཕེབས་འདུག ད་ལྟ་དངོས་སུ་ལག་བསྟར་ཞུ་ཐུབ་པ་དང་རྗེས་སོར་ཞུ་རྒྱུ་ཁག་བང་རིམ་ཞིག་སྒྲིག་ཐུབ་ན་ཡག་པོ་ཡོད། ཕྱི་ལུགས་ཀྱི་སྨན་དང་མཐུན་པའི་སྒོ་ནས་མཉམ་འབྲེལ་བྱེད་དགོས་རིགས་གང་ཡོད་མེད་དེ་དག་གི་ཐོག་ཐུགས་ཞིབ་གནང་དགོས་རྒྱུ་ནི། ༸རྒྱལ་བ་རིན་པོ་ཆེར་བཀའ་དྲིན་རྗེས་དྲན་དངོས་གནས་དེ་ཆགས་ཀྱི་ཡོད། དེ་རིང་གི་གོ་སྐབས་འདི་དང་སྟབས་བསྟུན་ཏེ་འདི་གཅིག་ཞུ་འདོད་བྱུང་།
དེ་མིན་སློབ་སྤྱིས་ལས་བསྡོམས་སྙན་སེང་ཞུས་སྐབས་ད་བར་སྨན་པ་དཀའ་བཅུ་པ་ ༢༩༦ ཙམ་ཐོན་ཡོད་པ་དང་། རྩིས་པ་དཀའ་བཅུ་པ་ ༥༣ ཙམ། ད་ལྟ་སློབ་སྦྱོང་བྱེད་བཞིན་པའི་སློབ་ཕྲུག་གི་གྲངས་སྐབས་སོ་སོ་དང་། མ་འོངས་པར་ཡིན་རུང་སྦེང་ལོར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་མཚན་ཐོག་ཡོད་པའི་མཐོ་སློབ་སློབ་གཉེར་ཁང་དེའི་ནང་གྲངས་འབོར་མང་དུ་གཏོང་རྒྱུའི་འཆར་གཞི་ཡོད་པ་སོགས་ཆ་ཚང་བ་ཞིག་འདུག ཁྱེད་རང་ཚོ་སློབ་མ་ཚོ་ཡིན་ནའང་ཐོག་མར་སྨན་རྩིས་ཁང་དུ་འཛུལ་ཞུགས་བྱེད་སྐབས་བསམ་བློར་གཞན་ཕན་ཀུན་ནས་བླང་སྟེ་ཕེབས་ཡོད། དེའི་ཐོག་སོ་སོས་རིག་པའི་གཞུང་ལུགས་དང་གནད་ལུགས་དེ་དག་རྩ་ཆེན་བརྩིས་ནས་འདིར་སློབ་སྦྱོང་ཞིག་བྱས་བསམས་ཏེ་ཕེབས་ཀྱི་ཡོད། སློབ་སྦྱོང་ཐོན་ཟིན་པ་རབ་འབྱམས་པ་ལྟ་བུ་ཡིན་ན་སྤྱི་ཚོགས་ནང་ཕྱག་ལས་གནང་སྟེ་བསྐྱར་དུ་སློབ་སྦྱོང་བྱེད་པར་ཕེབས་རྒྱུ་དང་། དེ་བཞིན་དཀའ་བཅུ་པ་ཚོ་ཡིན་ན་སྤྱི་ཚོགས་ནང་ཕེབས་དགོས་ཀྱི་ཡོད།
མདོར་ན། སོ་སོ་སྒེར་གྱི་མི་ཚེ་ནང་ལའང་མདུན་བསྐྱོད་དང་ཀྱོག་མཚམས་ཆེན་པོ་ཞིག་ལ་བསླེབས་ཡོད། དེར་བརྟེན་ད་ལྟ་བར་སྨན་རྩིས་ཁང་གི་དབུས་འཛིན་སྐྱོང་དང་། སློབ་སྤྱིས་དབུས་སློབ་སྤྱི་གཞོན་པ། དགེ་ལས། ད་ལྟ་དངོས་སུ་ཡོད་པ་དང་དངོས་སུ་མེད་པའི་དགེ་རྒན་བཀའ་དྲིན་ཅན་ཚང་མའི་ཐུགས་རྗེའི་བཀའ་དྲིན་སེམས་ལ་བཅངས་ཏེ་བོད་པའི་སྤྱི་ཚོགས་ཙམ་མ་ཟད། ཧི་མ་ལ་ཡའི་རི་རྒྱུད་དང་། རྒྱ་གར་བ། ཕྱི་རྒྱལ་བ་སོགས་མང་པོ་ཞིག་ལ་བོད་ཀྱི་གསོ་བ་རིག་པ་བརྒྱུད་ནས་ཕན་གྱི་ཡོད་པ་དེ་བཤད་མི་དགོས་པ་རེད། དེར་བརྟེན་མ་འོངས་པར་ཡང་རིག་གནས་ཆེན་པོ་ལྔའི་ནང་ནས་གསོ་བ་རིག་པའི་གནས་དེ་རྒྱུན་འཁྱོངས་དང་དར་འཕེལ་ཡོང་རྒྱུ། འགྲོ་བ་སེམས་ཅན་ཐམས་ཅད་དང་ལྷག་པར་མིའི་རིགས་ལ་ཕན་ཐོགས་ཡོང་བ་ཞིག་བྱེད་དགོས། སྤྱིར་བཏང་འཇིག་རྟེན་འཁོར་བའི་ནང་གནས་པའི་སྐྱེ་འགྲོ་ཡོངས་རྫོགས་ལ་སྐྱེ་རྒ་ན་འཆིའི་སྡུག་བསྔལ་ཡོད་པའི་ནང་ནས་ན་བའི་སྡུག་བསྔལ་དེ་སེམས་གཟུགས་གཉིས་ཀར་དཀའ་ངལ་ཤུགས་ཆེན་པོ་ཞིག་སྤྲོད་མཁན་ཞིག་ཡིན་སྟབས། དེ་ལས་ཐར་པའི་ཐབས་ལམ་སྨན་པ་ཚོས་སྨན་གྱི་མཐུན་རྐྱེན་དང་རིག་པས་དཔྱད་དེ་གནང་གི་ཡོད་སྟབས། ནད་པར་ཧ་ཅང་ཕན་ཐོགས་ཆེན་པོ་ཡོང་གི་ཡོད་པ་སྨྲོས་མི་དགོས་པ་རེད། དེར་བརྟེན་དེ་དག་ཚང་མར་ངས་རྗེས་སུ་ཡི་རང་ཞུ་རྒྱུ་ཡིན། ཞེས་སོགས་ཀྱི་གསུང་བཤད་གནང་ཡོད།
