༢༠༡༤ ཟླ་ ༦ ཚེས་ ༡༧ རེས་གཟའ་མིག་དམར།

༄༅། །འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཐེངས་ ༢༦ པ་འཚོགས་བཞིན་པ་དང་བསྟུན། ཕྱི་ལོ་ ༢༠༡༤ ཟླ་ ༦ ཚེས་ ༡༣ ཉིན་སུད་སིར་གནས་སྡོད་བོད་རིགས་དང་བོད་དོན་རྒྱབ་སྐྱོར་ཚོགས་པའི་ཚོགས་མི་བཅས་ཁྱོན་མི་གྲངས་བརྒྱ་བརྒལ་བས་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་ཐང་དུ་བོད་དོན་ཞུ་གཏུག་གི་ལས་འགུལ་སྤེལ་འདུག སྐབས་དེར་ཁོང་རྣམ་པས་མཉམ་འབྲེལ་རྒྱལ་ཚོགས་ཀྱི་དྲུང་ཆེ་སྐུ་ཞབས་བྷན་ཀི་མུན་ Ban Ki Moonམཆོག་གིས་བོད་རྒྱ་འབྲེལ་མོལ་བསྐྱར་མཐུད་ཡོང་སླད་བར་བཞུགས་གནང་སྟེ་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུས་ཡོད་པ་མ་ཟད། བོད་མི་ ༡༧ ཙམ་གྱིས་མཉམ་འབྲེལ་རྒྱལ་ཚོགས་ཀྱི་ཚོགས་མི་རྣམས་ནས་བོད་དོན་ཐོག་ཐུགས་སྣང་ཆེ་ཙམ་ཡོང་ཆེད། ཉིན་གྲངས་བཞི་རིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་ལས་ཁུངས་དང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཁང་གི་མདུན་དུ་བོད་དོན་ཞུ་གཏུག་གི་ལས་འགུལ་ཡང་སྤེལ་འདུག

དེ་བཞིན་སུད་སི་དང་ལིཀ་ཊེན་སི་ཊེན་བོད་རིགས་ཚོགས་པའི་ལོ་འཁོར་གཅིག་རིང་ནས་བོད་ཀྱི་དཀའ་རྙོག་སེལ་ཆེད་མཉམ་འབྲེལ་རྒྱལ་ཚོགས་ཀྱི་དྲུང་ཆེ་བྷན་ཀི་མུན་མཆོག་དང་རྒྱལ་ཚོགས་ཀྱི་འཐུས་མི་རྣམས་ཀྱིས་བོད་རྒྱ་གྲོས་མོལ་བསྐྱར་མཐུད་ཡོང་སླད་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་ལོ་འཁོར་གཅིག་གི་ཞུ་གཏུག་ལས་འགུལ་གྱི་ཆ་ཤས་སུ་ཐེངས་འདིའི་བོད་དོན་ཞུ་གཏུག་གི་ལས་འགུལ་སྤེལ་འདུག ཕྱོགས་མཚུངས་ཐེངས་འདིའི་བོད་དོན་ཞུ་གཏུག་སྐབས་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཆེས་མཐོའི་འགྲོ་བ་མིའི་ཐོབ་ཐང་ལྷན་ཁང་གི་འགན་འཛིན་མཆོག་བོད་ནང་མགྱོགས་མྱུར་ཕེབས་ཐུབ་ཆེད་རྒྱ་ནག་གཞུང་གིས་ཆོག་མཆན་སྤྲོད་དགོས་པའི་འབོད་སྐུལ་ཡང་ཞུས་འདུག

སྐབས་དེར་ཡུན་རིང་ནས་བོད་དོན་ཐོག་རྒྱབ་སྐྱོར་གནང་མཁན་སྐུ་ཞབས་རེ་ནེ་ Mr René Longet ལགས་ཀྱིས་བོད་དོན་ཐོག་གདུང་སེམས་མཉམ་སྐྱེ་ཡོད་སྐོར་གསུངས་འདུག་པ་མ་ཟད། སུད་སི་སྐུ་ཚབ་དོན་ཁང་གི་ལས་བྱེད་ཟླ་བ་རྒྱ་མཚོ་ལགས་ཀྱིས་ཀྱང་མཛད་སྒོ་དང་འབྲེལ་བའི་གསུང་བཤད་གནང་འདུག་པ་བཅས།།