༢༠༡༤ ཟླ་ ༦ ཚེས་ ༡༦ རེས་གཟའ་ཟླ་བ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་གཅོད་ཁང་ནས་ཕྱི་ལོ་ ༢༠༡༤ ཟླ་ ༦ ཚེས་ ༡༣ ཉིན་བཏང་གནས་ནང་འཁོད་དོན། ཕྱི་ཟླ་ ༦ ཚེས་ ༡༢ ཉིན་ཐེ་ཝན་ཤིན་ཀྲུའུ་གྲོང་ཁྱེར་དུ་ཆགས་པའི་རྒྱལ་གཉེར་ཆིན་ཧྭ་གཙུག་ལག་སློབ་གྲྭ་ཆེན་མོ་སྤྱི་ཚོགས་རིག་གནས་ཚན་རིག་སྡེ་ཚན་ནས་གདན་ཞུས་གནང་དོན་ལྟར། ཐེ་ཝན་བོད་ཀྱི་སྐུ་ཚབ་དོན་གཅོད་ཟླ་བ་ཚེ་རིང་ལགས་ཀྱིས་དུས་ཡུན་ཆུ་ཚོད་གསུམ་རིང་བོད་དོན་ངོ་སྤྲོད་ཀྱི་སློབ་འཁྲིད་གནང་ཡོད། དོན་གཅོད་ཟླ་བ་ཚེ་རིང་ལགས་ཀྱིས་གཙོ་བོ་བོད་ཀྱི་གནད་དོན་ངོ་སྤྲོད་གནང་སྐབས་བོད་ཀྱི་རྒྱལ་རབས་ལོ་རྒྱུས་དང་། ལོ་རྒྱུས་ཐོག་བོད་རང་བཙན་ཡིན་པའི་དཔང་རྟགས། རྒྱ་གཞུང་གིས་བོད་ཀྱི་ལོ་རྒྱུས་འགྲེལ་བཤད་རྒྱག་སྟངས། ༸གོང་ས་མཆོག་དང་བཙན་བྱོལ་བོད་མིས་བཏོན་པའི་དབུ་མའི་ལམ་གྱི་བརྒྱུད་རིམ་དང་སྲིད་བྱུས། ༸གོང་ས་མཆོག་གི་མཛད་འཕྲིན་སོགས་ངོ་སྤྲོད་སྙིང་བསྡུས་གནང་རྗེས། སློབ་ཕྲུག་རྣམས་ཀྱི་དྲི་བ་ཁག་ལ་ལན་འདེབས་གསལ་བཤད་གནང་། གཙོ་བོ་ཐེ་ཝན་གྱི་སློབ་ཕྲུག་དང་། དེ་མིན་རྒྱ་ནག་སྐམ་ས་དང་ཨོ་མན་ས་ཁུལ་ནས་བསླེབས་པའི་སློབ་ཕྲུག་སོགས་ཁྱོན་མི་གྲངས་སུམ་ཅུ་ཙམ་ཡོད་པ་དང་། རྒྱ་ནག་སྐམ་ས་ནས་བསླེབས་པའི་སློབ་ཕྲུག་གིས་དོ་སྣང་ཆེན་པོས་དྲི་བ་མང་དག་ཅིག་བཏོན་པར་ལན་འདེབས་ཁ་གསལ་གནང་ཡོད།
