༢༠༡༤ ཟླ་ ༥ ཚེས་ ༡༣ རེས་གཟའ་མིག་དམར།
བོད་དོན་རྒྱབ་སྐྱོར་ཚོགས་པར་བཀའ་སློབ་སྩོལ་བཞིན་པ།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༡༢ ཉིན་གྱི་སྔ་དྲོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནེ་དར་ལེན་ཌིའི་གྲོང་ཁྱེར་་རོ་ཊར་ཌམ་ Rotterdam ནང་རྟེན་གཞི་བྱས་པའི་ (Park Builder berg) མགྲོན་ཁང་དུ་བོད་དོན་རྒྱབ་སྐྱོར་བ་ཁག་གཅིག་ལ་མཇལ་འཕྲད་དང་། དེ་རྗེས་རྒྱ་རིགས་ཁག་གཅིག་ལ་ཟུར་དུ་མཇལ་ཁ་དང་བཀའ་སློབ་སྩལ་འདུག
དེ་ཡང་༸གོང་ས་མཆོག་གིས་རྒྱ་རིགས་གསར་འགོད་པ་དང་། སློབ་ཕྲུག དེ་བཞིན་བོད་དོན་ཐོག་དོ་སྣང་ཡོད་མཁན་རྒྱ་རིགས་ཁག་གཅིག་ལ་བཀའ་སློབ་སྩལ་དོན། ངོས་རང་དེ་རིང་འདིར་ཡོང་སྟེ་ཁྱེད་རང་ཚོ་ཐུག་རྒྱུ་བྱུང་བར་ཧ་ཅང་དགའ་པོ་བྱུང་། ཁྱེད་རང་ཚོ་ཚང་མར་འཚམས་འདྲི་ཡོད། ངོས་རང་ས་གནས་འདྲ་མིན་དུ་བསྐྱོད་སྐབས་རྒྱ་རིགས་མང་པོ་ཐུག་གི་ཡོད། ང་ཚོ་ཕན་ཚུན་ངོ་ཤེས་པ་བཟོ་རྒྱུ་དེ་ཧ་ཅང་གལ་ཆེན་པོ་འདུག གཞན་གནས་ཚུལ་ངོ་མ་དེ་མ་ཤེས་པར་གཅིག་གི་གཅིག་ལ་སེམས་ཐག་རིང་པོ་བྱས་ནས་བསྡད་ན་ཕན་ཐོགས་ཁྱོ་ནས་མི་འདུག ངོས་རང་རྒྱ་རིགས་མང་པོ་ཐུག་གི་ཡོད། འགོ་སྟོད་དུ་རྒྱ་རིགས་འགའ་ཤས་གདོང་ནག་པོ་བསྟན་ནས་བསྡད་ཀྱི་འདུག དེ་ནས་ང་ཚོ་སྐད་ཆ་མང་པོ་བཤད་རྗེས་གྲོགས་པོ་ཆགས་ཀྱི་འདུག ཁྱེད་རང་ཚོ་དྲི་བ་དང་བསམ་འཆར་ཡོད་ན་ཤོད་ཤོག ཅེས་བཀའ་སློབ་སྩལ་རྗེས་རྒྱ་རིགས་གཅིག་གིས་ཉེ་སྔོན་ནེ་དར་ལེན་ཌིའི་བོད་དོན་རྒྱབ་སྐྱོར་བ་རྣམས་ཀྱིས་རྒྱ་ནག་གི་སྲིད་འཛིན་ཞི་ཅིན་ཕིང་ལ་༸གོང་ས་མཆོག་དང་ལྷན་མཇལ་འཕྲད་གནང་དགོས་པའི་ལས་འགུལ་སྤེལ་ཡོད་སྐོར་ལུང་འདྲེན་དང་སྦྲགས་རྒྱ་ནག་གི་སྲིད་འཛིན་དང་མཇལ་མོལ་ཞུ་འདོད་ཡོད་མེད་སྐོར་གྱི་དྲི་བར་བཀའ་ལན་སྩལ་དོན། ང་ཚོས་ཕྱི་ལོ་ ༡༩༧༤ ལོ་ནས་རྒྱ་ནག་དབུས་གཞུང་དང་བཀའ་མོལ་ཞུ་དགོས་རེད་ཅེས་སྐབས་དེ་དུས་ནས་ཐག་གཅོད་བྱས་པ་རེད། དེ་ནས་ཕྱི་ལོ་ ༡༩༧༩ ལོར་ཏིང་ཞའོ་ཕིང་གིས་ངོས་དང་འབྲེལ་བ་བྱེད་རྒྱུའི་བརྡ་ལན་ཞིག་འབྱོར་ཡོད།
སྐབས་དེར་ང་ཚོས་ལམ་སེང་འབྲེལ་བ་བྱས་པ་རེད། དེ་ནས་བཟུང་སྐབས་རེ་ང་ཚོ་འབྲེལ་བ་ཡག་པོ་བྱུང་ཡོད་པ་དང་། སྐབས་རེ་འབྲེལ་བ་སྐྱོ་རུ་ཕྱིན་པ་ལྟ་བུ་བྱུང་ཡོད། ངོས་རང་རྒྱ་ནག་ལ་ཆོས་ཕྱོགས་ཁོ་ནའི་ཐོག་ནས་རི་བོ་རྩེ་ལྔར་གནས་སྐོར་འགྲོ་རྒྱུའི་འདོད་པ་ཡོད། ཅེས་རེ་འདུན་ཞུས་པ་རེད། ངོས་རང་རི་བོ་རྩེ་ལྔར་གནས་སྐོར་འགྲོ་རྒྱུའི་འདོད་པ་དེ་ཕྱི་ལོ་ ༡༩༥༤ ལོ་ནས་ཡོད། འོན་ཀྱང་ཏཱ་ལའི་བླ་མ་ནི་ཆབ་སྲིད་ཀྱི་གནས་ཚུལ་ཡོད་པ་རེད། དེ་འགྲིག་གི་མ་རེད་ཅེས་ཟེར་བ་རེད། ཕྱི་ལོ་ ༢༠༠༡ ནས་ངོས་རང་ཕྱེད་རྒན་ཡོལ་དུ་ཕྱིན་པ་རེད། ཕྱི་ལོ་ ༢༠༡༡ ལོ་ནས་རྒས་ཡོལ་ཆ་ཚང་ཞུས་ཏེ་ཆབ་སྲིད་ཀྱི་འགན་འཁྱེར་གྱི་མེད། ངོས་རང་རི་བོ་རྩེ་ལྔར་འགྲོ་རྒྱུའི་འདོད་པ་ཤུགས་ཆེ་བྱས་པར་བརྟེན་ཐེ་ཝན་གྱི་དགེ་སློང་ཏ་ཝེས་ངེད་གཉིས་དམ་བཅའ་བཞག་པ་རེད། ཉིན་གཅིག་ངེད་གཉིས་རི་བོ་རྩེ་ལྔར་གནས་སྐོར་འགྲོ་ཐུབ་ངེས་རེད། སྐབས་དེར་ཁོང་གིས་རྩ་བ་ཤེས་རབ་རྒྱ་ཡིག་ཐོག་དང་ངོས་ཀྱི་བོད་ཡིག་ཐོག་འདོན་རྒྱུ་བྱས། རྒྱ་གར་མཁས་པ་ཞིག་ཏན་ཏན་ཡོང་གི་རེད། ཁོང་གིས་ལེགས་སྦྱར་གྱི་ཐོག་ནས་འདོན་རྒྱུ་བྱས། ད་ཆ་ཁོང་འདས་གྲོངས་སུ་གྱུར་ཟིན་ཡོད། དེང་སང་རྒྱ་ནག་ཏུ་ནང་པ་མང་པོ་འདུག དེར་བརྟེན་ངོས་ཀྱིས་ནང་པ་ཚོར་ཕྲན་བུ་ཞབས་འདེགས་བསྒྲུབ་ཐུབ་ཀྱི་རེད། ང་ཚོ་བོད་པ་ཚོས་ཞི་ཅིན་ཕིན་དང་ང་ཚོ་ཐུག་རྒྱུའི་རེ་འདུན་དེ་སྒྲུབ་ཐུབ་ན་ཧ་ཅང་ཡག་པོ་ཡོད། རེ་འདུན་དེ་སྒྲུབ་ཐུབ་པའི་རེ་བ་ཡང་ཡོད། ཞི་ཅིན་ཕིན་གྱི་ཨ་མ་ལགས་ནང་པ་རེད་འདུག ཁྱེད་རང་ཚོ་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་རྒྱ་ནག་མི་མང་དུང་ཕྱུར་ ༡༣ ཡོད་པ་ཚོས་དངོས་ཡོད་གནས་ཚུལ་ཤེས་རྒྱུའི་ཐོབ་ཐང་ཡོད། དངོས་ཡོད་གནས་ཚུལ་ཤེས་ན་བཟང་ངན་གྱི་རྣམ་དབྱེ་འཕྱེ་ཐུབ་ཀྱི་རེད། དེར་བརྟེན་དམ་བསྒྲགས་བྱེད་རྒྱུ་དེ་ནོར་འཁྲུལ་རེད། དེ་ནས་རྒྱ་ནག་གི་ཁྲིམས་འདི་རྒྱལ་སྤྱིའི་ཁྲིམས་ཀྱི་གནས་ཚད་བཟོ་རྒྱུ་དེ་ཧ་ཅང་གལ་ཆེན་པོ་རེད། ངོས་ཀྱིས་ལོ་ཤས་ནང་རྒྱ་རིགས་སྟོང་ཕྲག་བཅུ་གྲངས་ཤིག་ཐུག་ཡོད། དེ་ཚོའི་ནང་ཞིང་པ་སྐྱོ་པོ་དེ་འདྲ་ཡང་ཡོང་གི་འདུག ཁོང་ཚོའི་གནས་ཚུལ་ཧ་ཅང་སྐྱོ་པོ་འདུག ཁྲིམས་ཀྱི་དབང་འགྱུར་མེད་པར་བརྟེན་ས་གནས་ཀྱི་དཔོན་རིགས་ཚོས་དངུལ་གྱི་དོན་དག་བསམ་བློ་བཏང་། སོ་སོའི་དབང་ཤུགས་བེད་སྤྱོད་བྱས་ཏེ་དངུལ་བཟའ་རྒྱུ་མ་གཏོགས་མི་མང་ལ་བལྟ་རྟོགས་བྱེད་རྒྱུ་ཁག་པོ་ཡིན་འདུག ཅེས་བཀའ་ལན་སྩལ།
སྐབས་དེར་རྒྱ་རིགས་དེ་དག་ཁོངས་དམག་སྡེ་ཨང་བཅོ་བརྒྱད་པའི་མི་བརྒྱུད་བོད་ནང་འཚར་ལོངས་བྱུང་བའི་རྒྱ་རིགས་ཤིག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་སྙན་གསན་ཞུས་དོན། ང་རང་དམག་སྡེ་ཨང་བཅོ་བརྒྱད་པའི་མི་བརྒྱུད་ཅིག་ཡིན། བོད་ནང་སྐྱེས་ཏེ་འཚར་ལོངས་བྱུང་བ་མ་ཟད། ལོ་ཉི་ཤུ་བོད་ནང་བསྡད་པ་ཡིན། ང་ཚོས་དུས་རྟག་ཏུ་༸གོང་ས་ཏཱ་ལའི་བླ་མ་མཆོག་ལ་དགའ་མོས་ཆེན་པོ་ཡོད། བོད་རྒྱ་མི་རིགས་གཉིས་གྲོགས་པོ་དང་སྤུན་ཟླ་རེད། ད་རེས་ངས་ཞུ་དོན་གཙོ་བོ་ནི་སེམས་གཏིང་ནས་སྐུ་ཉིད་མཆོག་ལ་གུས་བཀུར་ཆེན་པོ་ཡོད། ཅེས་ཞུས། དེ་ནས་མགོན་པོ་གང་ཉིད་མཆོག་གིས། ཀྲང་གོ་ཧཱའི་ཕྲུ་གུ་ངོས་རང་ཐུག་པར་བསླེབས་བྱུང་། ཁོ་རང་གི་ཕྲུ་གུ་ཡང་མཉམ་དུ་འཁྲིད་འདུག ཁོ་རང་གི་ཕྲུ་གུའི་མི་རབས་འདི་༸རྒྱལ་བ་རིན་པོ་ཆེ་ངོ་ཤེས་པ་བཟོས་དགོས་ཀྱི་འདུག་པར་བརྟེན་ཆེད་མངགས་འཁྲིད་ཡོང་བ་ཡིན་ཞེས་བརྗོད་ཀྱི་འདུག ངོས་ཀྱི་ངོ་ཤེས་པ་ཞིག་གིས་དམག་སྡེ་ཨང་བཅོ་བརྒྱད་སྐབས་ཀྱི་དཔོན་པོ་དེ་ཚོའི་ཕྲུ་གུ་དེ་དག་ང་སྒུག་བཞིན་ཡོད་སྐོར་བརྗོད་ཀྱི་འདུག ཅེས་བཀའ་སློབ་སྩལ།
དེ་རྗེས་མགོན་པོ་གང་ཉིད་མཆོག་ནེ་ངྷར་ལེན་ཌིའི་གཞུང་གི་ལས་ཁུངས་ཆགས་ས་ Hague ནང་ཆིབས་སྒྱུར་བསྐྱངས་ཏེ་ Dutch གྲོས་ཚོགས་ཀྱི་ཕྱི་འབྲེལ་ལས་དོན་ཚན་པའི་ཚོགས་མིརྣམ་པས་གཙོས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་ལ་མཇལ་ཁ་དང་བཀའ་སློབ་སྩལ་ཡོད་པ་མ་ཟད། ཨི་ར་སི་མུས་གཙུག་ལག་སློབ་གཉེར་ Erasmus University ཁང་དུ་ཆིབས་སྒྱུར་བསྐྱངས་ཏེ་དགེ་ལས་སློབ་ཕྲུག་རྣམས་ལ་སེམས་ཀྱི་སློབ་གསོའི་ Education of the Heart སྐོར་བཀའ་སློབ་སྩལ་ཡོད།
