༢༠༡༤ ཟླ་ ༥ ཚེས་ ༡༢ རེས་གཟའ་ཟླ་བ།
འཕགས་པ་རྒྱལ་མཚན་ལགས།
༄༅། །འདི་གར་ཁུངས་ལྡན་གནས་ཚུལ་འབྱོར་དོན་ལྟར་ན། མདོ་ཁམས་མཛོ་སྒང་རྫོང་ཚ་བ་སྟོབས་འབངས་(འབོ་མི་)གེ་བར་གྲོང་ཚོ་རུ་རྒྱ་ནག་གཞུང་གིས་རྒྱལ་མོ་རྔུལ་ཆུའི་ཉེ་འགྲམ་དུ་གཏེར་ཁ་སྔོག་འདོན་གྱི་ལས་འཆར་ལ་ཁུལ་དེའི་བོད་མི་ཚོས་ངོ་རྒོལ་ཤུགས་ཆེན་གནང་ཡོད་པ་དང༌། ཕྱི་ལོ་ ༢༠༡༤ ཟླ་ ༥ ཚེས་ ༧ ཉིན་གྱི་ཕྱི་དྲོར་ཁུལ་དེའི་ཛ་དྲག་གི་གནས་སྟངས་དང་རྒྱལ་གཅེས་པ་འཕགས་པ་རྒྱལ་མཚན་ལགས་འདས་གྲོངས་སུ་ཕྱིན་པའི་ཡིད་སྐྱོའི་གནས་ཚུལ་སོགས་ལ་བརྟེན་ནས་བོད་མི་གཞན་ཞིག་གིས་རང་ལུས་ལ་གྲི་བརྒྱབ་ནས་རྒྱ་གཞུང་གི་གཏེར་ཁ་བསྔོག་འདོན་གྱི་ལས་འཆར་ལ་ངོ་རྒོལ་གནང་རྗེས་སྨན་ཁང་དུ་ཛ་དྲག་སྨན་བཅོས་བྱེད་བཞིན་ཡོད་འདུག
དེ་ཡང་ཟླ་ ༥ ཚེས་ ༧ ཉིན་གྱི་ཞོགས་པར་མདོ་ཁམས་མཛོ་སྒང་རྫོང་ཚ་བ་སྟོབས་འབངས་གྲོང་ཚོའི་ཁུལ་དུ་རྒྱ་གཞུང་གི་རྒྱལ་མོ་རྔུལ་ཆུའི་ཉེ་འགྲམ་དང་ས་གནས་གེ་བར་གྲོང་དུ་གསེར་གྱི་གཏེར་ཁ་སྔོག་འདོན་ལས་འཆར་ཡོད་པའི་ཐད་ཡུལ་མི་ཚོས་ངོ་རྒོལ་སྐད་འབོད་ཤུགས་ཆེན་གནང་ཡོད་པ་དང༌། ཟླ་ ༥ ཚེས་ ༧ ཉིན་རང་ལོ་ ༣༩ ཡིན་པའི་རྒྱལ་གཅེས་པ་འཕགས་པ་རྒྱལ་མཚན་ལགས་ནས་ས་གནས་སུ་ཡོད་པའི་རྒྱ༌ནག་གཞུང་གི་ལས་བྱེད་གཏན་སྡོད་བྱེད་ཡུལ་གྱི་ཁང་པའི་ཐོག་སྟེང་དུ་བསྐྱོད་དེ་༸རྒྱལ་བ་རིན་པོ་ཆེ་སྐུ་ཚེ་བརྟན་པར་ཤོག བོད་རང་བཙན་དགོས། བོད་ནང་དུ་རང་དབང་མི་འདུག་ཅེས་སོགས་ཀྱི་འབོད་ཚིག་བསྒྲག་སྐབས་རྒྱ་གཞུང་འབྲེལ་ཡོད་ལས་བྱེད་ནས་འཛིན་བཟུང་བྱ་ཉེའི་མཚམས་སུ་འཕགས་པ་རྒྱལ་མཚན་ལགས་ནས་༼རྒྱ་ཁྱེད་ཚོའི་ལག་པར་འཆི་བ་ལས་ང་རང་གིས་རང་སྲོག་གཅོད་པ་དགའ། ཞེས་ངོ་རྒོལ་སྐད་འབོད་གནང་བ་དང་ཆབས་ཅིག་རང་ལུས་ལ་གྲི་ཐེངས་གསུམ་བརྒྱབ་ནས་སྟོབས་འབངས་གྲོང་དུ་ཡོད་པའི་རྒྱ་གཞུང་གི་ཁང་པ་ཐོག་བརྩེགས་ཅན་ཞིག་གི་རྩེ་ཐོག་ནས་མར་མཆོངས་རྗེས་འདས་གྲོངས་སུ་གྱུར་ཡོད་འདུག
རིག་འཛིན་ལགས།
གནས་ཚུལ་དེ་ཐོན་མ་ཐག་ས་གནས་དེ་ག་ནས་ཡིན་པའི་བོད་མི་རིག་འཛིན་ལགས་ཀྱིས་གཙོས་ཡུལ་མི་འགས་ཁོང་གི་སྐུ་ཕུང་ནང་ལ་བསྐྱལ་ཡོད་པ་དང༌། ཉིན་དེའི་ཕྱི་དྲོར་ཁུལ་དེའི་ཛ་དྲག་གི་གནས་སྟངས་དང་རྒྱལ་གཅེས་པ་འཕགས་པ་རྒྱལ་མཚན་ལགས་འདས་གྲོངས་སུ་ཕྱིན་པའི་ཡིད་སྐྱོའི་གནས་ཚུལ་དང་རྒྱ་གཞུང་གི་གཏེར་ཁ་སྔོག་འདོན་ལ་ངོ་རྒོལ་སླད་རིག་འཛིན་ལགས་ནས་འཕགས་པ་རྒྱལ་མཚན་གྱི་ཁང་པའི་རྩེ་ཐོག་ནས་རང་ལུས་ལ་གྲི་ཐེངས་གསུམ་ཙམ་བརྒྱབ་སྟེ་མཆོང་གྲབས་གནང་སྐབས། ཡུལ་མི་འགས་ཁོང་བཀག་འགོག་བྱས་ཏེ་མྱུར་སྐྱོབ་རླངས་འཁོར་ནང་བླུགས་ཏེ་ཆབ་མདོ་ས་ཁུལ་གྱི་སྨན་ཁང་ཞིག་ཏུ་བསྐྱལ་ཡོད་འདུག་ཀྱང་། ད་ལྟའི་ཆར་འཆི་གསོན་ཇི་ཡོང་ཤེས་རྟོགས་མེད་པའི་གནས་སྟངས་ཛ་དྲག་འོག་ལུས་ཡོད་འདུག་པ་དང་། རྒྱ་ནག་གཞུང་ཉེན་རྟོགས་པས་སྨན་ཁང་གི་མཐའ་སྐོར་ནས་སྲུང་སྟེ་སོ་ལྟ་བྱ་བཞིན་ཡོད་འདུག
རིག་འཛིན་ལགས་ནི་ད་ལྟ་རང་ལོ་ ༣༤ ཡས་མས་ཡིན་པ་་དང༌། ཁོང་ལ་ཡང་བཟའ་ཟླ་དང་ཟླ་བ་ ༥ ལ་སོན་པའི་ཕྲུ་གུ་བུ་ཞིག་ཀྱང་ཡོད་འདུག ད་ལྟའི་ཆར་སྟོབས་འབངས་གྲོང་ཚོའི་ཁུལ་དུ་རྒྱ་གཞུང་གིས་གཏེར་ཁ་སྔོག་འདོན་བྱ་འཆར་ཡོད་པ་དེར་འཕགས་པ་རྒྱལ་མཚན་ལགས་དང་རིག་འཛིན་ལགས་གཉིས་ནས་སྔ༌རྗེས་ངོ་རྒོལ་གནང་སྟེ་གཅིག་འདས་གྲོངས་སུ་གྱུར་བ་དང་གཅིག་སྨན་ཁང་དུ་ལུས་ཡོད་པ་སོགས་ལ་གདུང་སེམས་མཉམ་སྐྱེ་དང་རྒྱབ་སྐྱོར་མཚོན་ཆེད་ཡུལ་མི་རྒན་གཞོན་བར་གསུམ་ཚང་མས་རྒྱ་གཞུང་གི་གཏེར་ཁ་སྔོག་འདོན་གྱི་ལས་འཆར་ལ་མུ་མཐུད་ངོ་རྒོལ་བྱེད་བཞིན་ཡོད་འདུག་ཀྱང་། རྒྱ་ནག་གཞུང་གི་འབྲེལ་ཡོད་ཚན་པས་སྟོབས་འབངས་ས་ཁུལ་གྱི་ཛ་དྲག་གནས་སྟངས་ཕྱི་གྱར་མི་ཡོང་བའི་ཆེད་དུ་ས་གནས་དེ་ནས་ཕྱི་ཕྱོགས་སུ་འབྲེལ་བ་བྱ་རྒྱུར་དོགས་ཏེ་ཁ་དཔར་ཨང་གྲང་བསྡུ་རུབ་དང་སྐད་འཕྲིན་སོགས་ཆ་ཚང་བཀག་འགོག་བྱས་ཏེ་དམ་བསྒྲགས་བྱེད༌འགོ་བཙུགས་ཡོད་པའི་གནས་ཚུལ་འདུག་པ་མ་ཟད། གཏེར་ཁ་སྔོག་རྒྱུའི་ལས་གཞི་མུ་མཐུད་གྲུབ་ཐབས་ཆེད་ས་གནས་ཡུལ་མིར་འཇིགས་སྐུལ་དང་བསླུ་བྲིད་ཀྱིས་དངུལ་སྤྲོད་རྒྱུ་དང་། དང་ལེན་མ་བྱས་ཚེ་ཆབ་སྲིད་ཀྱི་གནད་དོན་དུ་བརྩིས་ཏེ་བཙོན་འཇུག་བྱ༌རྒྱུ་སོགས་ཀྱི་འཇིགས་སྐུལ་ཡང་མུ་མཐུད་བྱ་བཞིན་ཡོད་པའི་གནས་ཚུལ་འདུག
སྟོབས་འབངས་(འབོ་མི་)གེ་བར་གྲོང་ཚོ་
གཏེར་ཁ་སྔོག་ཡུལ།
