༢༠༡༤ ཟླ་ ༥ ཚེས་ ༡༩ རེས་གཟའ་ཟླ་བ།
༄༅། །ཉེ་ལམ་རྒྱ་གར་བྷ་ར་ཏི་ཡ་ཆབ་སྲིད་ཚོགས་པའི་དབུ་ཁྲིད་སྐུ་ཞབས་ན་རེན་དྲ་མོ་དི་ Narendra Modi མཆོག་ལ་རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་སྡུའི་སྐབས་རྒྱལ་ཁ་ཆེན་པོ་ཐོབ་པར་བོད་མི་མང་སྤྱི་འཐུས་ལྷན་ཚོགས་ཀྱིས་སྐུ་ཞབས་ན་རེན་དྲ་མོ་དི་མཆོག་དང་བྷ་ར་ཏི་ཡ་ཇན་ཏ་ཚོགས་པར་ Bharatiya Janata Party འཚམས་འདྲིའི་བཀྲ་ཤིས་བདེ་ལེགས་ཞུས་ཡོད།

དེ་ཡང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་གསུང་དོན། ངས་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་སྐུ་ཉིད་མཆོག་ལ་ཕྱི་ལོ་ ༢༠༡༤ ལོའི་རྒྱ་གར་རྒྱལ་ཡོངས་གྲོས་ཚོགས་འོག་མའི་འོས་བསྡུའི་སྐབས་ལོ་རྒྱུས་ཐོག་འཁོད་འོས་པའི་རྒྱལ་ཁ་ཆེན་པོ་ཐོབ་པར་སྙིང་ཐག་པ་ནས་སྐུ་ཉིད་མཆོག་དང་སྐུ་ཉིད་མཆོག་གི་དབུ་ཁྲིད་པའི་ཆབ་སྲིད་ཚོགས་པ་བྷ་ར་ཏི་ཡ་ཇན་ཏ་ཚོགས་པར་འཚམས་འདྲི་ཞུ་རྒྱུ་ཡིན། སྐུ་ཉིད་མཆོག་བྷ་ར་ཏི་ཡ་ཇན་ཏ་ཚོགས་པའི་སྲིད་བློན་གྱི་འོས་མིར་བཞེངས་ཏེ་འོས་ཤོག་ནང་མཉམ་ཞུགས་གནང་སྐབས་ནས་བཟུང་རྒྱ་གར་ནང་ཆོལ་ཁ་དང་རིགས་རུས་ཀྱི་འཐེན་འཁྱེར་ལས་མང་གཙོར་རྒྱལ་ཁ་ཐོབ་པ་ང་ཚོས་ཤེས་རྟོགས་བྱུང་བར་བརྟེན་འདོད་བློ་ཁེངས་པ་ཞིག་བྱུང་།

ང་ཚོས་སྐུ་ཉིད་མཆོག་གི་རྣམ་དཔྱོད་དང་སྙིང་སྟོབས་ལ་བརྟེན་ནས་རྒྱ་གར་ཞི་བདེ་དང་ཡར་རྒྱས་ཀྱི་ཕྱོགས་སུ་མདུན་སྐྱོད་ཐུབ་རྒྱུར་ཡིད་ཆེས་ཞུ་རྒྱུ་དང་ཆབས་ཅིག ལས་དོན་ཆ་ཚང་ཐོག་བྱ་བ་ལམ་ལྷོང་ཡོང་བའི་སྨོན་འདུན་ཞུ་རྒྱུ་དང་། བོད་དོན་ཐོག་སྐུ་ཉིད་མཆོག་གིས་མུ་མཐུད་རྒྱབ་སྐྱོར་གནང་སྐྱོང་ཡོང་བ་མ་ཟད། བོད་ཀྱི་གནད་དོན་སེལ་ཆེད་འབད་བརྩོན་ཤུགས་ཆེ་གནང་རྒྱུའི་རེ་བ་ཞུ་བཞིན་ཡོད། ཅེས་གསུངས། འཚམས་འཕྲིན་ངོ་མ་དབྱིན་ཡིག་ནང་ཡོད་པ་ནས་འདི་ག་ཕྱི་དྲིལ་བོད་ཡིག་ཚན་པས་ཕབ་བསྒྱུར་ཞུས་པས་དབྱིན་ཡིག་ལ་རྩ་འཛིན་གནང་རོགས།།