༢༠༡༤ ཟླ་ ༥ ཚེས་ ༢༦ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་མཆོག་དང་དྲུང་ཆེས་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་སྤྱི་ཁྱབ་དྲུང་ཆེ་མཆོག་སོགས་དཔོན་རིག་ཁག་གཅིག་དང་མཇལ་འཕྲད་གནང་སྟེ། ༸གོང་མཆོག་གི་༸སྐུའི་འཁྲུངས་སྐར་སྲུང་བརྩི་ཞུ་ཕྱོགས་ཐོག་བཀའ་བསྡུར་གནང་འདུག
དེ་ཡང་ནང་སྲིད་བཀའ་བློན་རྒྱ་རི་སྒྲོལ་མ་མཆོག་དང་ནང་སྲིད་དྲུང་ཆེ་འཁོར་ལྷ་ཚང་བསོད་ནམས་སྟོབས་ལགས་གཉིས་ཀྱིས་རྒྱ་གར་ལྷོ་ཕྱོགས་ཀར་ན་ཊ་ཀ་མངའ་སྡེའི་སྤྱི་ཁྱབ་དྲུང་ཆེ་མཆོག་དང་མངའ་སྡེའི་འགྲིམ་འགྲུལ་ལས་ཁང་གི་ཟུང་དྲུང་། མངའ་སྡེའི་ཁྲལ་བསྡུ་ལས་ཁང་དང་། སོ་ནམ་ལས་ཁང་གི་འབྲེལ་ཡོད་དཔོན་རིགས་སོགས་དང་མཇལ་འཕྲད་ཞུས་ཏེ། གཙོ་བོ་གྲོང་ཁྱེར་སྦེང་ལོར་དུ་འདི་ལོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་ཞུ་ཕྱོགས་ཐོག་བཀའ་བསྡུར་གནང་ཡོད་པ་མ་ཟད། ཧི་མ་ལ་ཡའི་དུས་སྟོན་གྱི་ལས་རིམ་ཞིག་ཀྱང་སྤྱིར་བཏང་གཏན་འཁེལ་བྱུང་བའི་སྐོར་ལ་ཕྱི་ལོ་ ༢༠༡༤ ཟླ་ ༥ ཚེས་ ༢༣ ཉིན་ནང་སྲིད་དྲུང་ཆེ་བསོད་ནམས་སྟོབས་རྒྱལ་ལགས་ཀྱིས་བརྒྱུད་ལམ་ཁག་གཅིག་ནང་འགྲེལ་བརྗོད་གནང་གསལ། ཐེངས་འདིའི་མཇལ་འཕྲད་སྐབས་གཙོ་བོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་སྲུང་བརྩི་ཞུ་ཕྱོགས་ཀྱིས་མཚོན་ཧི་མ་ལ་ཡའི་དུས་སྟོན་འཚོགས་རྒྱུའི་ཐོག་གྲོས་བསྡུར་བྱུང་བ་རེད། ད་རེས་ཙམ་མ་ཟད། ལོ་འཆར་ཅན་ཀར་ན་ཊ་ཀ་མངའ་སྡེའི་ནང་བོད་པའི་རིག་གཞུང་སོགས་འགྲེམས་སྟོན་བྱེད་ཕྱོགས་ཐོག་གོ་བསྡུས་ཞུས་ཡོད། དེ་བཞིན་༸གོང་ས་མཆོག་སྐུའི་འཁྲུངས་སྐར་དུས་ཆེན་དང་ལྷན་ཧི་མ་ལ་ཡའི་དུས་སྟོན་སོགས་འཚོགས་རྒྱུའི་ཐད་འབུམ་ལྔ་བཅུ་དྲུག་ཅུ་ཙམ་ཞིག་གནང་རྒྱུའི་ཞལ་བཞེས་ཐོབ་ཡོད། དེ་བཞིན་གཞིས་ཆགས་ཁག་ནང་གི་ལམ་བཟོ་ཡར་རྒྱས་གཏོང་ཕྱོགས་ཀྱིས་མཚོན་སྤྲོ་འཆམ་པ་དང་འབྲེལ་བའི་ལས་གཞིའི་ཐོག་འབུམ་སུམ་བརྒྱ་ཙམ་གྱི་བཀའ་འཁྲོལ་དང་།
ཕྱོགས་མཚུངས་སྦེལ་ཀོབ་གོ་ལ་ཐ་ལ་སོགས་ཀྱི་ལམ་བཟོའི་ཆེད་འབུམ་བརྒྱ་ཙམ་བཀའ་འཁྲོལ་ཡོད་པ་རེད། དེར་བརྟེན་ཐེངས་འདིར་ང་ཚོ་འདི་གར་ཡོང་ནས་ཁོང་རྣམས་དང་མཇལ་འཕྲད་ཞུས་པ་བརྒྱུད་འབུམ་དྲུག་བརྒྱ་ཙམ་ཞིག་གི་ཞལ་བཞེས་རོབ་ཙམ་ཐོབ་ཡོད། དེ་བཞིན་སེ་ར་ཐེག་ཆེན་གླིང་དང་སྔ་འགྱུར་རྙིང་མའི་གདན་ས་རྣམ་གྲོལ་གླིང་ལ་རོགས་དངུལ་ཐོབ་ཡོད་སྐོར་གྱི་འགྲེལ་བརྗོད་ཀྱང་གནང་འདུག་པ་བཅས། །
