༢༠༡༤ ཟླ་ ༥ ཚེས་ ༢༠ རེས་གཟའ་མིག་དམར།
༄༅། །བོད་མིའི་སྒྲིག་འཛུགས་ཀྱི་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ཕྱི་ལོ་ 
༢༠༡༤ ཟླ་ ༥ ཚེས་ ༡༥ ནས་ ༢༥ བར་ཧི་མཱ་ཅལ་མངའ་སྡེའི་རྒྱལ་ས་སིམ་ལ་དང་། ལྡི་ལི། སྦེང་ལོར། མུམ་བྷེ་བཅས་སུ་གཞུང་འབྲེལ་ཕྱོགས་ཕེབས་གནང་ཡོད།
དེ་ཡང་སྤྱི་ཁྱབ་དྲུང་ཆེ་མཆོག་དང་ནང་སྲིད་བཀའ་བློན་མཆོག་ཧི་མཱ་ཅལ་མངའ་སྡེའི་རྒྱལ་སར་ཆེད་ཕེབས་ཀྱིས་མངའ་སྡེའི་འཕྲོད་བསྟེན་དང་ནང་མིའི་བདེ་དོན་བློན་ཆེན་སྐུ་ཞབས་ཀོལ་སིངྒ་ཁྲ་ཀུར་མཆོག་ (Kaul Singh Thakur) དང་། དེ་བཞིན་མངའ་སྡེའི་ཟ་འབྲུའི་བློན་ཆེན་སྐུ་ཞབས་ཇི་ཨེ་སི་བྷ་ལི་(G.S.Bali) མཆོག གྲོང་ཁྱེར་ཡར་རྒྱས་བློན་ཆེན་སྐུ་ཞབས་སུ་རྡིར་ཤཱར་མ་(Sudhir Sharma) མཆོག ཧི་མཱ་ཅལ་མངའ་སྡེའི་སྤྱི་ཁྱབ་དྲུང་ཆེ་སྐུ་ཞབས་པྲ་ཐཱ་སར་ཐི་མིཏྲཱ་ (Prathasarthi Mitra) མཆོག་བཅས་དང་མཇལ་འཕྲད་གནང་ཡོད།
དེ་ཡང་མཇལ་འཕྲད་སྐབས་ནང་སྲིད་བཀའ་བློན་མཆོག་གིས་ཧི་མཱ་ཅལ་དུ་གནས་སྡོད་བོད་མི་སྐྱབས་བཅོལ་བ་རྣམས་ཀྱི་བདེ་དོན་དང་འབྲེལ་བའི་གནད་དོན་ཡུན་རིང་ཐག་གཅོད་མ་བྱུང་བའི་དཀའ་ངལ་རྣམས་གང་མགྱོགས་ཐག་གཅོད་ཡོང་བའི་འབོད་སྐུལ་ཞུས་ཡོད། གནད་དོན་དེ་དག་ལས་གཙོ་ཆེ་ཤོས་ཁག་གཅིག་ཡོད་པ་རྣམས་ནི་སིམ་ལ་ཁུལ་དུ་གནས་སྡོད་བོད་མིའི་ཁྱིམ་ཚང་ ༡༢༥ ཡོད་པའི་སྡོད་གནས་ཉམས་གསོ་གནང་རྒྱུའི་སྐོར་དང་། བཞུགས་སྒར་ཁུལ་མེཀ་གྷན་ལམ་ཟུར་དུ་ཁྲོམ་སྟོན་མཁན་བོད་མི་རྣམས་ཀྱི་ཁྲོམ་སའི་དཀའ་ངལ། དེ་བཞིན་རྡ་ས་མེཀ་གྷན་བོད་ཀྱི་ཟློས་གར་གྱི་འགྲོ་ལམ་གཡས་གཡོན་དུ་གནས་སྡོད་བོད་མི་ཁྱིམ་ཚང་ ༢༡༠ ལ་སྡོད་ཁང་གི་དཀའ་ངལ་སོགས་ཇི་ལྟར་སེལ་དགོས་མིན་ཐད་བཀའ་བསྡུར་ལྷུག་པོ་གནང་ཡོད། ཕྱོགས་མཚུངས་སྐབས་དེར་ཧི་མཱ་ཅལ་མངའ་གཞུང་གིས་ར་ཇིབ་གྷན་རྡི་ཟ་འབྲུའི་རོགས་སྐྱོབ་ལས་གཞིའི་ (Rajiv Gandhi Anna Yojna) ཁོངས་བོད་མི་སྐྱབས་བཅོལ་བ་རྣམས་ལའང་ཟ་འབྲུའི་ཐོབ་ཐང་ལོངས་སུ་སྤྱོད་ཆོག་པའི་མཐུན་འགྱུར་གནང་བར་ཐུགས་རྗེ་ཆེ་ཞུས་ཡོད།།
