༢༠༡༤ ཟླ་ ༥ ཚེས་ ༡༦ རེས་གཟའ་པ་སངས།

༄༅། །བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་ཕྱི་ལོ་ ༢༠༡༤ ཟླ་ ༥ ཚེས་ ༡༢ ནས་ ༡༥ བར་རྒྱ་གར་གྱི་རྒྱལ་ས་ལྡི་ལིར་ཆེད་ཕེབས་ཀྱིས། རྒྱ་གར་གྱི་བདེ་སྲུང་སློབ་སྟོན་པ་ཤི་བ་ཤངྐར་མི་ནོན་ (Shiv Shankar Manon) གཙོ་བོར་གྱུར་པའི་རྒྱ་གར་གྱི་དཔོན་རིགས་ཁག་གཅིག་དང་མཇའ་འཕྲད་ཀྱིས་ཁོང་རྣམ་པས་ད་བར་བོད་ཀྱི་གནད་དོན་ཐོག་ཐུགས་འཁུར་ཆེ་བཞེས་གནང་བར་བཀའ་དྲིན་རྗེས་དྲན་དང་འབྲེལ་སླད་ཕྱིན་མུ་མཐུད་རྒྱབ་སྐྱོར་དང་མཐུན་འགྱུར་གནང་སྐྱོང་ཡོང་བ་ཞུས་ཡོད།
དེ་ཡང་དཔལ་ལྡན་སྲིད་སྐྱོང་མཆོག་གིས་ཕྱི་ཚེས་ ༡༣ དང་ ༡༤ ཉིན་རྒྱ་གར་དབུས་གཞུང་གི་ཤེས་རིག་དྲུང་ཆེ་སོགས་ལ་གསུང་མོལ་དང་། རྒྱ་གར་གྱི་བདེ་སྲུང་སློབ་སྟོན་པ་ཤི་བ་ཤངྐར་མི་ནོན་ (Shiv Shankar Manon) མཆོག་གིས་བོད་དོན་ཐོག་ཐུགས་འཁུར་དང། རྒྱབ་སྐྱོར། ཤ་ཚ་ཧ་ཅང་ཆེན་པོ་ཡོད་པ་དང་། འཕགས་བོད་གཉིས་དུས་རབས་མང་པོའི་རིང་ནས་འབྲེལ་བ་བཟང་པོ་ཡོད་པ་མ་ཟད། ད་བར་རྒྱ་གར་གཞུང་མང་གཉིས་ཀྱི་རྒྱབ་སྐྱོར་དང་མཐུན་འགྱུར་རོགས་རམ་གནང་བར་ཐུགས་རྗེ་ཆེ་ཞུས་ཡོད། དེ་ནས་སྲིད་སྐྱོང་མཆོག་རྒྱ་གར་དབུས་གཞུང་གི་ཤེས་རིག་བློན་ཆེན་གྱི་ལས་ཁུངས་སུ་ཆེད་ཕེབས་ཀྱིས་རྒྱ་གར་དབུས་གཞུང་གི་བོད་སློབ་འཛིན་ཚོགས་ཀྱིས་འཛིན་སྐྱོང་གནང་བཞིན་པའི་བོད་པའི་གཏན་ཉིན་སློབ་གྲྭ་ཁག་དབུས་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་སུ་རིམ་བཞིན་རྩིས་སྤྲོད་གནང་གཏན་འཁེལ་ཡོད་པ་ལྟར། དབུས་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་རྒྱ་གར་དབུས་གཞུང་ཤེས་རིག་ལས་ཁུངས་དང་དབུས་བོད་སློབ་འཛིན་སྐྱོང་ཚོགས་པ་བཅས་ལ་བཀའ་བསྡུར་རིམ་པ་ཞུས་ཏེ་བོད་མིའི་སྒྲིག་འཛུགས་ཀྱི་བཀའ་ཤག་གི་དགོངས་དོན་གཞིར་བཟུང་བོད་སློབ་འཛིན་ཚོགས་ཀྱི་གཏན་ཉིན་སློབ་གྲྭ་ཁག་རིམ་བཞིན་རྩིས་སྤྲོད་གནང་ཕྱོགས་སྐོར་བཀའ་བསྡུར་ལྷུག་པོ་གནང་ཡོད་འདུག