༢༠༡༤ ཟླ་ ༥ ཚེས་ ༩ རེས་གཟའ་པ་སངས།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ནོར་ཝེའི་རྒྱལ་ས་ཨོ་སི་ལོར་རྟེན་གཞི་བྱས་པའི་ཨོ་སི་ལོ་གཙུག་ལག་སློབ་གཉེར་ཁང་ (Oslo University) དུ་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མའི་ཆོས་འབྲེལ་དང་།
ཕྱེད་ཡོལ་དུ་སློབ་ཕྲུག་ཁག་གཅིག་ལ་མི་རབས་གསར་པའི་ལས་འགན་ (Taking Responsibility for Tomorrow’s World) ཞེས་པའི་བརྗོད་གཞིའི་ཐོག་བཀའ་སློབ་སྩལ་འདུག དེ་ཡང་རྒྱལ་ས་ཨོ་སི་ལོའི་ཁུལ་དུ་མཛད་འཕྲིན་ཉིན་དང་པོའི་ཐོག་མར་ནོར་ཝེའི་སྒེར་གྱི་དཔེ་དེབ་གསོག་འཇོག་བྱེད་མཁན་སྐུ་ཞབས་མར་ཊིན་ཤོ་ཡན་ Martin Schøyen ལགས་ཀྱིས་༸གོང་ས་མཆོག་ལ་བོད་ཀྱི་གནའ་བོའི་དཔེ་ཆའི་དཔེ་མཚོན་ཞིག་ཕྱག་རྟགས་སུ་འབུལ་ལམ་ཞུས་པའི་ནང་ཚེ་དཔག་མེད་ཀྱི་གཟུངས་སྔགས་ཤོག་ལྷེ་གཅིག་ཅན་ཞིག་ཀྱང་ཡོད་འདུག དེ་ནས་མགོན་པོ་གང་ཉིད་མཆོག་ནོར་ཝེའི་ཨོ་སི་ལོ་གཙུག་ལག་སློབ་གཉེར་ཁང་དུ་༸ཞབས་སོར་འཁོད་སྐབས་ནོར་ཝེའི་མི་མང་དང་བོད་རིགས་རྣམས་ཀྱིས་ཕེབས་བསུ་གཟབ་རྒྱས་ཞུས་འདུག
དེ་ཡང་༸གོང་ས་མཆོག་གིས་གཙུག་ལག་སློབ་གྲྭར་ཆིབས་སྒྱུར་མ་བསྐྱངས་གོང་ཡི་ཤུའི་དབུ་བླ་དང་ཆོས་དཔོན་ཁག་གཅིག་ལ་མཇལ་ཁ་དང་བཀའ་སློབ་སྩལ་དོན། སེམས་ཞི་བདེ་བསྐྲུན་མཁན་གཙོ་བོ་གཅིག་ཆོས་ཆགས་ཡོད། སེམས་འཁྲུག་ནས་སྡོད་སྐབས་ཆོས་ཀྱིས་སེམས་ལྷོད་པོ་བཟོ་བཞིན་ཡོད། དེར་བརྟེན་ཆོས་འདི་རྙོག་གྲྭ་བཟོ་མཁན་ལྟ་བུ་ཆགས་ན་ཧ་ཅང་བློ་ཕམ་རེད། དེ་ནི་གཙོ་བོ་ཕན་ཚུན་འབྲེལ་བ་དང་གོ་རྟོགས་དེ་ཙམ་སྤེལ་མ་ཐུབ་པའི་དབང་གིས་ཡིན། རྒྱ་གར་ནང་ཆོས་ལུགས་འདྲ་མིན་འཆམ་མཐུན་ཐོག་མཉམ་གནས་བྱེད་བཞིན་ཡོད་པ་དེ་ནས་ང་ཚོས་མི་དཔེ་བླང་སྟེ་ཆོས་ལུགས་མཐུན་སྒྲིལ་གོང་མཐོར་གཏོང་རྒྱུར་འབད་བརྩོན་ཤུགས་ཆེ་ཙམ་བྱེད་དགོས། ཨ་རིའི་ནང་ཕྱི་ལོ་ ༢༠༠༡ ཟླ་ ༩ ཚེས་ ༡༡ ཉིན་གྱི་དོན་རྐྱེན་བྱུང་སྟེ་ལོ་གཅིག་འཁོར་བའི་དུས་དྲན་སྐབས་ངོས་ཀྱིས་མི་མང་པོ་ཞིག་གིས་ཁ་ཆེའི་ཆོས་ལུགས་ལ་དྲག་རྩུབ་ཀྱི་ཆོས་ལུགས་ལྟ་བུར་ངོས་འཛིན་བྱེད་བཞིན་པ་དེ་ནོར་འཁྲུལ་ཡིན་སྐོར་གསལ་སྟོན་བྱས་པ་ཡིན། མི་རེ་ཟུང་གི་བྱ་སྤྱོད་ལ་བརྟེན་ནས་ཆོས་ལུགས་ཡོངས་རྫོགས་ལ་ཁག་དཀྲི་བྱས་པ་འདི་ནོར་འཁྲུལ་རེད། ཅེས་བཀའ་སློབ་སྩལ་གྲུབ་བསྟུན། ནོར་ཝེའི་ཡི་ཤུའི་ལྷ་ཁང་གི་ཆོས་དཔོན་ཧེལ་གྷ་ཧུག་ལེན་ཌི་ Helga Haugland Byfuglen མཆོག་གིས་དེར་ཡོད་ཡི་ཤུའི་ཆོས་དཔོན་རྣམ་པའི་ཚབ་ཞུས་ཏེ་ཁུལ་དེར་ཆིབས་སྒྱུར་བསྐྱངས་པར་ཐུགས་རྗེ་ཆེ་ཞུས་པ་མ་ཟད། ༸གོང་ས་མཆོག་གིས་བཀའ་སློབ་ལམ་དོན་ཕེབས་སྟོན་ལྟར་ཆོས་ལུགས་ཕན་ཚུན་དབར་འབྲེལ་ལམ་སྔར་བས་གོང་མཐོར་གཏོང་རྒྱུ་གལ་ཆེ་ཡིན་པ་ངོས་འཛིན་ཞུ་རྒྱུ་ཡིན་སྐོར་སྙན་སྒྲོན་ཞུས་ཡོད།
དེ་རྗེས་༸གོང་ས་མཆོག་གིས་ཨོ་སི་ལོ་གཙུག་ལག་སློབ་ཁང་གི་ཤེ་ཏུ་ནུབ་ Chateau Neuf theatreཞེས་པའི་ཚོགས་ཁང་ཆེན་མོའི་ནང་ཁྱོན་མི་གྲངས་ ༡༢༢༠ བརྒལ་བ་འདུ་འཛོམས་ཐོག་བཀའ་སློབ་སྩལ་དོན།
ངོས་རང་དེ་རིང་འདིར་ལེགས་སྦྱར་དང་པཱ་ལིའི་ཆོས་བརྒྱུད་ཐོག་ནས་ནང་ཆོས་སློབ་གཉེར་གནང་མཁན་དགེ་བཙུན་རྣམ་པ་དང་། ཡི་ཤུའི་ཆོས་གྲོགས་ཕོ་མོ་རྣམས་དང་ལྷན་འདིར་བཅར་རྒྱུ་བྱུང་བར་ཧ་ཅང་དགའ་པོ་བྱུང་། ཆོས་ལུགས་མཐུན་སྒྲིལ་གཏོང་རྒྱུ་ཟེར་བ་དེ་ཁ་ནས་འདྲ་ཆགས་པོ་བཤད་ནས་སྡོད་རྒྱུ་ཙམ་ཞིག་མིན་པར། ཆོས་ལུགས་ཕན་ཚུན་དབར་ཁ་ཞེ་གཉིས་མེད་ཀྱིས་གུས་བརྩི་དང་ཡི་རང་སྔགས་བརྗོད་ཞུ་རྒྱུ་ཡིན། འཛམ་གླིང་འདིའི་སྟེང་གི་མི་ཐེར་འབུམ་བདུན་ཡོད་པ་ཚང་མ་ནང་པ་བྱེད་དགོས་པ་དང་ཡང་ན་ཡི་ཤུ་བྱེད་དགོས་རེད། ཅེས་ཟེར་ན་དངོས་ཡོད་གནས་ཚུལ་དང་མི་མཐུན་པ་ཞིག་རེད། ཆོས་ལུགས་དེ་དག་ལོ་ངོ་བརྒྱ་ཕྲག་མང་པོའི་རིང་ནས་ཡོད་པ་དང་མ་འོངས་པར་ཡང་མུ་མཐུད་གནས་རྒྱུ་ཡིན་པར་བརྟེན། ང་ཚོས་འདོད་ཀྱང་རུང་མ་འདོད་ཀྱང་རུང་གང་ལྟར་འཛམ་གླིང་འདིའི་ནང་མཉམ་དུ་སྡོད་དགོས། ཞེས་བཀའ་སློབ་སྩལ།
ཕྱེད་ཡོལ་དུ་༸གོང་ས་མཆོག་གིས་སློབ་ཕྲུག་ཁག་གཅིག་ལ་མི་རབས་གསར་པའི་ལས་འགན། ཞེས་པའི་བརྗོད་གཞིའི་བགྲོ་གླེང་ཚོགས་མགོན་དུ་ཆིབས་སྒྱུར་བསྐྱངས་ཏེ་བཀའ་སློབ་སྩལ། སྐབས་དེར་ཐོག་མར་གཙུག་ལག་སློབ་གྲྭའི་རེག་ཊར་ཨོ་ལེ་པི་ཊར་ཨོ་ཊེར་སན་ Ole Petter Ottersen ལགས་ཀྱིས་༸གོང་ས་མཆོག་ངོ་སྤྲོད་ཀྱི་གསུང་བཤད་གནང་དོན། ལོ་ངོ་བཅུ་ཕྲག་མང་པོའི་རིང་བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་ནི་བོད་ཀྱི་མཚོན་དོན་ཞིག་ཆགས་ཡོད་པ་དང་། གལ་ཏེ་ཁོང་གི་བཀའ་གསུང་ལྟར་འཛམ་གླིང་ནང་གི་དཀའ་རྙོག་རྣམས་འཚེ་བ་མེད་པ་གྲོས་མོལ་གྱི་ལམ་ནས་སེལ་ཐུབ་ཡོད་ན། དེང་སྐབས་འཛམ་གླིང་གི་གནས་སྟངས་ད་ལྟ་ལས་བཟང་བ་ཡོད་ངེས། ཞེས་སོགས་གསུངས་གྲུབ་མཚམས་༸གོང་ས་མཆོག་གིས་བཀའ་སློབ་སྩལ་དོན། འབྱུང་འགྱུར་འཛམ་གླིང་ནང་ཞི་བདེ་བསྐྲུན་རྒྱུའི་འགན་འདི་ཁྱེད་རང་ཚོ་གཞོན་སྐྱེས་ཚོར་ཡོད། ངོས་རང་དུས་རབས་ ༢༠ མི་ཆགས་ཡོད། གཞོན་སྐྱེས་ཁྱེད་རང་ཚོ་དུས་རབས་ ༢༡ མི་རབས་ཡིན། དེར་བརྟེན་འབྱུང་འགྱུར་འཛམ་གླིང་ཞི་བདེ་དང་འཆམ་མཐུན་ལྡན་པ་ཞིག་ཡོང་རྒྱུར་ཁྱེད་ཚོར་འཆར་སྣང་ངེས་པར་དུ་དགོས། འཆར་སྣང་དེར་གཞི་བཅོལ་ཏེ་ཆོད་སེམས་བརྟན་པོས་འབད་བརྩོན་བྱེད་དགོས། ཞེས་སོགས་ཀྱི་བཀའ་སློབ་སྩལ་བ་མ་ཟད། གོ་ལའི་ཚ་དྲོད་དང་དབུལ་ཕྱུག་གི་བར་ཁྱད་སོགས་ཀྱི་གནད་དོན་ཐོག་ཞིབ་ཕྲ་བཀའ་སློབ་སྩལ།
སྐབས་དེར་གཞོན་སྐྱེས་རྣམས་ཀྱིས་གོ་ལའི་ཁོར་ཡུག་དང་རང་འབྱུང་ཁོར་ཡུག་བདག་གཅེས་བྱེད་ཚུལ་སྐོར་བསམ་ཚུལ་ཞིབ་ཕྲ་སྙན་གསེང་ཞུས། སང་ཉིན་༸གོང་ས་མཆོག་ནོར་ཝེའི་གྲོས་ཚོགས་དང་ནོ་བེལ་ཞི་བདེའི་ཚོགས་ཁང་དུ་ཆིབས་སྒྱུར་བསྐྱངས་རྒྱུ་ཡིན་འདུག
དེ་ཡང་ལོ་ལྟར་ཕྱི་ཟླ་ ༥ ཚེས་ ༨ ཉིན་ནོར་ཝེའི་རང་བཙན་ཐོབ་པའི་ཉིན་མོར་སྲུང་བརྩི་ཞུ་བཞིན་ཡོད། ལོ་ངོ་དྲུག་ཅུ་རེ་དགུའི་གོང་ན་ཛི་ Nazi གཅིག་བསྡུས་དབང་བསྒྱུར་འོག་ནས་ནོར་ཝེར་རང་བཙན་ཐོབ་ཡོད། །
