༢༠༡༤ ཟླ་ ༥ ཚེས་ ༡༤ རེས་གཟའ་ལྷག་པ།

༄༅། །ཕྱི་ལོ་ ༢༠༡༤ ཟླ་ ༥ ཚེས་ ༡༢ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཧོལ་ལེན་ཌིའི་གྲོང་ཁྱེར་ཧེག་The Hague ནང་ཆིབས་སྒྱུར་བསྐྱངས་ཏེ་དེར་རྟེན་གཞི་བྱས་པའི་ཡུལ་དེའི་གྲོས་ཚོགས་ཀྱི་ཚོགས་ཁང་ནང་ཧོལ་ལེན་ཌིའི་ཕྱི་འབྲེལ་ལས་དོན་ཚན་པའི་ Dutch Parliament’s Foreign Affairs Committee ཚོགས་མི་རྣམ་པས་གཙོས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མི་རྣམས་དང་མཇལ་འཕྲད་མཛད་ཡོད། སྐབས་དེར་ཧོལ་ལེན་ཌིའི་ཕྱི་འབྲེལ་ལས་དོན་ཚན་པའི་ཚོགས་གཙོ་ལྕམ་སྐུ་ཨེན་ཇི་ལེན་ཨེ་ཇི་སིང་ Angeline Eijsink མཆོག་གིས་ཕེབས་བསུ་གཟབ་རྒྱས་ཞུས་པ་མ་ཟད། ཚོགས་ཁང་ནང་དུ་༸ཞབས་སོར་འཁོད་བསྟུན་ཕྱི་འབྲེལ་ལས་དོན་ཚན་པའི་ཚོགས་གཙོ་ལྕམ་སྐུ་ཨེན་ཇི་ལེན་ཨེ་ཇི་སིང་མཆོག་གིས་༸གོང་ས་མཆོག་ངོ་སྤྲོད་ཀྱི་གསུང་བཤད་གནང་དོན།

བོད་ཀྱི་༸སྐྱབས་མགོན་ཏཱ་ལའི་བླ་མ་མཆོག་དེ་རིང་འདིར་ལོ་ལྔའི་རྗེས་སུ་སླར་ཡང་༸ཞབས་སོར་འཁོད་ཐུབ་པ་འདིས་ང་ཚོར་ཧ་ཅང་དགའ་ཚོར་ཆེན་པོ་སྐྱེས་བྱུང་། སྐུ་ཉིད་མཆོག་གིས་འཚེ་མེད་ཞི་བ་དང་འགྲོ་བ་མིའི་ཐོབ་ཐང་གོང་མཐོར་གཏོང་ཐབས་མཛད་བཞིན་པའི་རླབས་ཆེན་གྱི་མཛད་འཕྲིན་ལ་ང་ཚོས་བསྔགས་བརྗོད་ཞུ་བཞིན་ཡོད། ཅེས་ཞུས་གྲུབ་མཚམས་༸གོང་ས་མཆོག་གིས་བཀའ་སློབ་སྩལ་དོན། བཀུར་འོས་གྲོས་ཚོགས་འཐུས་མི་རྣམ་པར་ཐོག་མར་འཚམས་འདྲི་ཞུ་རྒྱུ་ཡིན། ངོས་རང་ཆུང་བྱིས་པའི་དུས་ནས་མང་གཙོའི་ལམ་ལུགས་ལ་ཧ་ཅང་འདོད་མོས་ཆེན་པོ་བྱེད་མཁན་ཞིག་ཡིན། ངོས་ཀྱིས་བོད་མིའི་ཆབ་སྲིད་ཀྱི་འགོ་ཁྲིད་ལས་འགན་མ་བླང་སྔོན་དུ་གད་པ་དང་གཡོག་པོ་དེ་དག་ངོས་ཀྱི་གྲོགས་པོ་རེད། ཁོང་ཚོ་དང་སྐད་ཆ་ཉན་བཤད་བྱེད་སྐབས་གཞུང་ཞབས་པ་ཚོས་ལས་ཀ་དྲང་པོ་མ་བྱས་པ་དང་། ཐུབ་ཚོད་བཤད་པ། དབང་ཆ་བེད་སྤྱོད་ལོག་པ་བཏང་བའི་སྐོར་སོགས་མང་པོ་ཞིག་གོ་ཐོས་ཡོང་གི་ཡོད།

དེ་རྗེས་ངོས་ཀྱིས་ཆབ་སྲིད་ཀྱི་ལས་འགན་འཁྱེར་ནས་རིང་པོར་མ་སོང་བར་ཕྱི་ལོ་ ༡༩༥༡ ལོར་ལེགས་བཅོས་ཚོགས་ཆུང་བཙུགས་པ་ཡིན། འོན་ཀྱང་རྒྱ་ནག་གཞུང་གིས་ངོས་ལེན་མ་བྱས་པ་རེད། ཕྱིས་སུ་ཕྱི་ལོ་ ༡༩༥༩ ལོར་རྒྱ་གར་དུ་བཙན་བྱོལ་ལ་བསླེབས་རྗེས་བོད་མིའི་སྤྱི་ཚོགས་ཁྲོད་མང་གཙོའི་ལམ་ལུགས་རིམ་བཞིན་དར་སྤེལ་གཏོང་རྒྱུར་འབད་བརྩོན་བྱས་མཐར་ཕྱི་ལོ་༢༠༠༡ ལོར་བཙན་བྱོལ་བོད་མིའི་ཆབ་སྲིད་ཀྱི་དབུ་ཁྲིད་ཐད་ཀར་འོས་འདེམས་བྱས་རྗེས་ངོས་རང་ཕྱེད་རྒན་ཡོལ་ཆགས་པ་དང་། ཕྱི་ལོ་ ༢༠༡༡ ལོར་བཀའ་བློན་ཁྲིད་པ་མི་མང་གིས་ཐད་ཀར་འོས་འདེམས་བྱས་རྗེས་ངོས་རང་བོད་མིའི་ཆབ་སྲིད་ཀྱི་ལས་འགན་ནས་རྒན་ཡོལ་ཆ་ཚང་ཞུས་པ་ཡིན། ངོས་ཀྱིས་མང་གཙོའི་ལམ་ལུགས་དེར་ཡིད་ཆེས་བྱེད་བཞིན་ཡོད། རྒྱལ་ཁབ་སུ་འདྲ་ཞིག་ཡིན་ནའང་རྒྱལ་ཁབ་དེ་ནི་རྒྱལ་ཁབ་དེའི་ནང་གནས་སྡོད་བྱེད་མཁན་ཡུལ་མི་ཚོར་བདག་པ་ལས་འགོ་ཁྲིད་ཚོར་བདག་མེད། ཧོལ་ལེན་ཌིའི་ཡུལ་འདི་ཧོལ་ལེན་ཌིའི་མི་མང་ཚོར་བདག་ཡོད་པ་ལས་ཚོགས་པ་བྱེད་བྲག་པ་ལ་བདག་མེད། ཅེས་སོགས་ཀྱི་བཀའ་སློབ་སྩལ་ཏེ་འགྲོ་བ་མིའི་གཞི་རིམ་བཟང་སྤྱོད་དང་ཆོས་ལུགས་མཐུན་སྒྲིལ། དེ་བཞིན་བོད་བརྒྱུད་ནང་བསྟན་དང་བོད་ཀྱི་ཁོར་ཡུག་སྲུང་སྐྱོབ་སྐོར་སོགས་མགོན་པོ་གང་ཉིད་མཆོག་གི་སྐུའི་རླབས་ཆེན་གྱི་མཛད་ཁུར་གཙོ་བོ་གསུམ་གྱི་སྐོར་བཀའ་སློབ་སྩལ་བ་མ་ཟད། ཧོལ་ལེན་ཌི་དང་ཡུ་རོབ་སྤྱི་མཐུན་རྒྱལ་ཁབ། དེ་བཞིན་ཨ་རི་དང་ཁེ་ན་ཌ་སོགས་ཀྱིས་ད་བར་ལོ་ངོ་བཅུ་ཕྲག་རིང་ནས་བོད་མི་དང་བོད་དོན་ལ་སེམས་ཁུར་ཆེན་པོས་ལྷག་བསམ་ཟོལ་མེད་ཀྱིས་རྒྱབ་སྐྱོར་གནང་བར་སྙིང་ཐག་པ་ནས་བཀའ་དྲིན་ཆེ་ཞུ་རྒྱུ་ཡིན།

ཞེས་སོགས་ཀྱི་བཀའ་སློབ་དང་། དྲི་བ་ཁག་གཅིག་ལ་བཀའ་ལན་ཡང་སྩལ། དེ་རྗེས་ཧོལ་ལེན་ཌིའི་ཕྱི་འབྲེལ་ལས་དོན་ཚན་པའི་ཚོགས་གཙོ་ལྕམ་སྐུ་ཨེན་ཇི་ལེན་ཨེ་ཇི་སིང་མཆོག་གིས་༸གོང་ས་༸སྐྱབས་མགོན་ཆེན་པོ་མཆོག་ལ་ཐུགས་རྗེ་ཆེ་ཞུས་པ་དང་སྦྲགས་ལྷན་ཚོགས་མཇུག་བསྡོམས་ཞུས་ཡོད། གྲོས་ཚོགས་ཀྱི་ཕྱི་རོལ་དུ་གསར་འགོད་པ་དང་སློབ་ཕྲུག་རྣམས་༸གོང་ས་མཆོག་ཞལ་མཇལ་གསུང་ཐོས་ཆེད་ངང་སྒུག་བྱས་ནས་བསྡད་ཡོད་སྟབས་༸གོང་ས་མཆོག་གིས་དེ་གར་ཆིབས་སྒྱུར་བསྐྱངས་ཏེ་མཇལ་ཁ་དང་འཚམས་འདྲི་མཛད་ཡོད།