༢༠༡༤ ཟླ་ ༥ ཚེས་ ༢༨ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༢༧ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས་རྡ་ས་མེག་གྷན་དུ་ཡོད་པའི་ཀ་ལབ་ཧ་འུ་སི་ (Club House) ནང་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་བོད་ཀྱི་གྲོས་ཚོགས་དང་སྲིད་བྱུས་ཉམས་ཞིབ་ཁང་གི་གོ་སྒྲིག་འོག་རྒྱ་གར་ས་གནས་ཁག་བཅུའི་ནང་མཐོ་སློབ་འགྲིམ་བཞིན་པའི་སློབ་ཕྲུག་གྲངས་ ༥༣ རྣམས་ལ་༼དེང་གི་ན་གཞོན་དང་མ་འོངས་འགོ་ཁྲིད།༽ཅེས་པའི་ཟབ་སྦྱོང་ཐེངས་ ༡༣ པའི་ཉིན་ ༨ ཐོག་སློབ་ཕྲུག་རྣམས་ཐུག་འཕྲད་དང་བསམ་ཚུལ་བརྗེ་ལེན་གནང་སོང་། དེ་ཡང་གོང་ཚེས་ཉིན་གྱི་ཕྱི་དྲོ་ཆུ་ཚོད་ ༤།༡༥ ཐོག་སྲིད་སྐྱོང་མཆོག་གིས་བཀའ་ཤག་གི་ལྟ་གྲུབ་གསུམ་གྱིས་གཙོས་ལྔ་དང་ལྔ་བཅུའི་ལས་འཆར་དེ་བཞིན་བོད་ཉིས་སྟོང་ཉི་ཤུ་བཅས་ཀྱི་སྐོར་ངོ་སྤྲོད་དང་འབྲེལ་གསུང་བཤད་གནང་དོན།
ལྔ་དང་ལྔ་བཅུ་ཟེར་ན། བཀའ་ཤག་སྐབས་ ༡༤ དུས་ཡུན་ལོ་ལྔ་ཡིན་པར་བརྟེན། ཆིག་སྒྲིལ་དང། གསར་གཏོད། རང་ཁ་རང་གསོ་བཅས་བཀའ་ཤག་གི་ལྟ་གྲུབ་གསུམ་གཞིར་བཞག་པའི་ཐོག་ནས་ལོ་ལྔའི་ནང་འབྲེལ་མོལ་དང་ཞི་མོལ་ཐོག་ནས་བོད་དོན་བདེན་མཐའ་གསལ་ཐབས་བྱ་རྒྱུ་དང་། གལ་ཏེ་བཙན་བྱོལ་ནང་སླར་ཡང་ལོ་ལྔ་བཅུ་གནས་དགོས་བྱུང་བ་ཡིན་ན། ཚགས་ཚུད་པོ་དང་ནུས་པ་ལྡན་པའི་ཐོག་ནས་གནས་ཐུབ་པ་བྱ་རྒྱུ་ཡིན། ང་ཚོར་གདོང་ལེན་བྱེད་དགོས་པ་མང་པོ་ཡོད་པའི་ནང་ནས་བོད་ཉིས་སྟོང་ཉི་ཤུ་ཞེས་པ་དེ་ང་ཚོའི་མདུན་དུ་དངོས་སུ་མིག་མཐོང་ལག་ཟིན་གྱིས་གདོང་ལེན་བྱེད་དགོས་པའི་གནད་དོན་ཞིག་ཆགས་ཡོད། རྒྱ་ནག་དང་། བོད་མི་རིགས་ཀྱི་གྲངས་འབོར་གྱི་བརྒྱ་ཆ་གཉིས་བསྡུར་ན་བོད་མི་རེ་རེས་རྒྱ་མི་གྲངས་ ༡༩༩ ལ་གདོང་ལེན་བྱེད་དགོས་ཀྱི་ཡོད་པར་བརྟེན། བཀའ་ཤག་གི་ལྟ་གྲུབ་གསུམ་གཞིར་བཟུང་ནས་བོད་མི་ཚོས་རྡོག་རྩ་ཆིག་སྒྲིལ་བྱེད་དགོས་པ་དང་། དེ་བཞིན་ཤེས་ཡོན་ཐོག་འབད་བརྩོན་བྱེད་རྒྱུ་ཧ་ཅང་གལ་ཆེན་པོ་རེད། ཤེས་ཡོན་ལ་འབད་བརྩོན་བྱས་པ་བརྒྱུད་ནས་ནུས་པ་ཆ་ཚང་འདོན་ཐབས་བྱེད་དགོས། སློབ་སྦྱོང་བྱེད་བཞིན་པའི་སྐབས་སུ་སློབ་སྦྱོང་ལ་འབད་བརྩོན་བྱ་རྒྱུ་དེ་ཧ་ཅང་གལ་ཆེན་པོ་རེད་དྲན་གྱི་འདུག
ཉི་མ་རེར་ཉུང་མཐར་ཆུ་ཚོད་ ༡༠ སློབ་སྦྱོང་བྱས་པ་ཡིན་ན་དངོས་གནས་སློབ་སྦྱོང་བྱེད་ཀྱི་འདུག་བརྗོད་རྒྱུ་དེ་རེད། ཉི་མ་རེར་ཉུང་མཐར་ཆུ་ཚོད་ ༡༠ སློབ་སྦྱོང་མ་བྱས་པ་ཡིན་ན་སློབ་སྦྱོང་ལ་མཐའ་གཅིག་ཏུ་འབད་བརྩོན་བྱེད་ཀྱི་མེད་པའི་རྣམ་པ་ཧ་ཅང་གསལ་པོ་རེད། མཐའ་ན་སོ་སོའི་འཚོ་བ་སྐྱེལ་ཆེད་ལག་འཁྱེར་ཡག་པོ་དགོས། ལག་འཁྱེར་ཡག་པོ་ཐོབ་པར་སློབ་སྦྱོང་ཡག་པོ་བྱེད་དགོས། བོད་ཕྱི་ལོ་ ༢༠༢༠ ཞུས་དགོས་དོན་གཙོ་བོ་དེ། ཕྱི་ལོ་ ༡༩༥༠ ལོར་རྒྱ་མིའི་དམག་མི་བོད་ནང་བསླེབས་པར་བརྩིས་ན། ཕྱི་ལོ་ ༡༩༥༠ ནས་ ༢༠༢༠ བར་བརྩིས་པས་ལོ་ ༧༠ ཆགས་ཀྱི་ཡོད་པར་བརྟེན། ཕྱི་ལོ་ ༢༠༢༠ ལོར་བོད་ནང་འགོ་འཁྲིད་མཁན་དང་། འགན་འཁུར་གནང་མཁན་ལོ་བདུན་ཅུ་མན་རྣམས་ཀྱི་བོད་རང་བཙན་རྒྱལ་ཁབ་ཡིན་སྐབས་ཀྱི་ལུང་པ་མཐོང་མྱོང་མཁན་དང་ཉམས་མྱོང་ཡོད་མཁན་མེད་པ་ཆགས་ཀྱི་རེད། བཙན་བྱོལ་དང་ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་མི་ཡིན་ནའང་དེ་ལྟར་རེད། ང་ཚོའི་དམིགས་ཡུལ་གཅིག་ནི། སྲོལ་རྒྱུན་གྱི་བོད་དང་། ལོ་རྒྱུས་ལྡན་པའི་བོད་བསྐྱར་གསོ་བྱེད་རྒྱུ་དེ་རེད། བོད་དངོས་སུ་མཐོང་མྱོང་མཁན་གཅིག་ཀྱང་མེད་པ་ཡིན་ན། འགོ་ཁྲིད་མཁན་གྱི་བོད་བསྐྱར་གསོ་བྱེད་ཆེད་བསམ་བློ་དང་། འགན་འཁུར་ག་འདྲ་འཁྱེར་དགོས་རེད།
དེ་ལྟར་བསམ་བློ་གཞི་བཞག་པའི་ཐོག་ནས་བོད་བསྐྱར་གསོ་བྱེད་ཀྱི་ཡིན་བརྗོད་རྒྱུ་ཙམ་མ་གཏོགས་སྔོན་མ་བོད་དེ་འདི་འདྲ་ཡོད་ཅེས་དངོས་སུ་མཐོང་པའི་ཉམས་མྱོང་ཐོག་ནས་བསྐྱར་གསོ་བྱེད་མཁན་མེད་པ་ཆགས་ཀྱི་རེད། འོན་ཀྱང་བོད་ནང་ཡོད་པའི་བོད་མི་ཚོར་བོད་བཙན་བཟུང་དང་། གདུག་རྩུབ་མནར་གཅོད་འོག་འཚར་ལོངས་བྱས་པའི་ཉམས་མྱོང་ཡོད། རྒྱ་བལ་འབྲུག་གསུམ་ནང་ཡོད་པའི་བོད་མི་ཚོར་རང་གི་ལུང་པ་མེད་པར་སྐྱབས་བཅོལ་བ་ཡིན་པའི་ཉམས་མྱོང་ཡོད། ཕྱི་རྒྱལ་ཡུལ་གྲུ་ཁག་ཏུ་ཡོད་པའི་བོད་མི་ཚོ་མང་ཆེ་བ་རྒྱལ་ཁབ་དེ་དང་དེའི་མི་སེར་ཡིན་པའི་ཆ་རྐྱེན་ཡོད་ནའང་བོད་མི་ཞིག་ཡིན་པའི་ཉམས་མྱོང་ཐ་དད་གཅིག་ཡོད། ཕྱི་ལོ་ ༢༠༢༠ རྗེས་ཕྱི་རྒྱལ་དང་། བོད་ནང་། དེ་བཞིན་བཙན་བྱོལ་དུ་ཡོད་པའི་བོད་པའི་གཞོན་སྐྱེས་གསུམ་འཛོམས་པ་ཡིན་ན། སྐད་ཆ་ཤོད་པའི་སྐབས་སུ་ཁ་ཤས་ཀྱིས་རྒྱ་སྐད་དང་། ཧིན་སྐད། བོད་སྐད་བསྲེས་ཏེ་བརྒྱབ་པ་དང་། ཁ་ཤས་དབྱིན་སྐད་བརྒྱབ་སྟེ་གོ་བརྡ་མི་འཕྲོད་པའི་དཀའ་ངལ་འཕྲད་སྲིད། ལྷག་པར་ཕྱི་ལོ་ ༢༠༢༠ ལོར་༸གོང་ས་མཆོག་དགུང་གྲངས་ ༨༥ ཕེབས་ཀྱི་ཡོད་པར་བརྟེན་མི་རབས་གསར་པ་ཚོར་འགན་ཧ་ཅང་ཆེན་པོ་ཡོད། ང་ཚོའི་ལས་འགན་དང་དཀའ་ངལ་ཆེ་རུ་འགྲོ་ཡི་ཡོད། ཅེས་སོགས་ཀྱི་གསུང་བཤད་དང་དྲི་བ་ཁག་ལ་ལན་འདེབས་ཞིབ་ཕྲ་གནང་།
