༢༠༡༤ ཟླ་ ༥ ཚེས་ ༦ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༥ ཚེས་ ༣ ཉིན་གྱི་དགོང་དྲོ་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དང་བོད་ཀྱི་ཟློས་གར་ཚོགས་པ་གཉིས་ཟུང་འབྲེལ་ཐོག་འཛམ་གླིང་གསར་འགོད་རང་དབང་གི་ཉིན་མོ་དང་སྟབས་བསྟུན་བཞུགས་སྒར་དུ་རྟེན་གཞི་བྱས་པའི་བོད་ཀྱི་ཟློས་གར་ཚོགས་པའི་རྩེད་ཐང་དུ་ཚོགས་པའི་བཀག་སྡོམ་ལ་འཐབ་རྩོད་བྱོས། ཞེས་པའི་རོལ་དབྱངས་འདུ་འཛོམས་ཐོག་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་མི་དམངས་ལ་བོད་ནང་གི་གསར་འགོད་རང་དབང་གི་གནས་སྟངས་སྐོར་གསུང་བཤད་གནང་དོན། དེ་རིང་འཛམ་གླིང་གསར་འགོད་རང་དབང་གི་ཉིན་མོ་འདིར་རྒྱ་ནག་གཞུང་གི་འགོ་ཁྲིད་ཚོར་འབོད་སྐུལ་ཞུ་རྒྱུར། རྒྱ་ནག་རྒྱལ་ཁབ་ཀྱི་ཁེ་ཕན་ཆེད་རྒྱ་ནག་དང་བོད་ནང་གསར་འགོད་རང་དབང་སྤྲོད་དགོས་ཀྱི་འདུག ཅེས་ཞུ་རྒྱུ་ཡིན། དེ་བཞིན་བོད་ནང་གི་དངོས་ཡོད་གནས་ཚུལ་གང་ཡིན་པ་རྣམས་འཛམ་གླིང་ནས་ཤེས་རྟོགས་ཐུབ་པ་བཟོ་དགོས་རྒྱུ་ཧ་ཅང་གལ་ཆེན་པོ་ཆགས་ཡོད། འདི་ལོ་རྒྱལ་མཚམས་མེད་པའི་གསར་འགོད་པའི་ཚོགས་པས་འདོན་སྤེལ་གནང་བའི་སྙན་ཐོའི་ནང་རྒྱལ་ཁབ་བརྒྱ་དང་བརྒྱད་ཅུའི་ནང་ནས་རྒྱ་ནག་རྒྱལ་ཁབ་བརྒྱ་དང་བདུན་ཅུ་དོན་ལྔ་པ་དེ་ཆགས་ཡོད། དེ་ནི་རྒྱ་ནག་སྤྱི་ཡོངས་ཀྱི་སྐད་ཆ་རེད། ལྷག་པར་བོད་སྤྱི་དང་ཡང་སྒོས་བོད་རང་སྐྱོང་ལྗོངས་ས་ཁུལ་དུ་གསར་འགོད་པ་རྣམས་རང་དབང་ཐོག་རྩ་ནས་འགྲོ་ཆོག་གི་མེད། དེར་བརྟེན་བཀག་སྡོམ་ཤུགས་ཆེ་ཤོས་དེ་བོད་རང་སྐྱོང་ལྗོངས་ས་ཁུལ་དང་དེའི་ཕྱི་ལོགས་སུ་གནས་པའི་བོད་མིའི་ས་ཁུལ་ཁག་ནང་བཀག་སྡོམ་ཤུགས་ཆེ་བྱེད་ཀྱི་ཡོད་པ་མ་ཟད། ཤིང་ཅང་ཁུལ་དུའང་དེ་ལྟར་བྱེད་བཞིན་འདུག རྒྱ་ནག་གི་འགོ་ཁྲིད་གསར་པ་ཞི་ཅིན་ཕིང་ལ་ཆ་མཚོན་ན། ལོ་གཉིས་སྔོན་ཁོང་རང་རྒྱལ་ཁབ་ཀྱི་སྲིད་འཛིན་ཆགས་སྐབས་ང་ཚོའི་གནས་སྟངས་འཛམ་གླིང་ནས་ཤེས་ཐུབ་པ་ཞིག་བཟོ་དགོས་པ་མ་ཟད། འཛམ་གླིང་གི་གནས་སྟངས་ཀྱང་ང་ཚོས་ཤེས་པ་བཟོ་དགོས་སྐོར་གསར་འགོད་པར་བརྗོད་ཡོད། འོན་ཀྱང་འདས་པའི་ལོ་གཉིས་ནང་གསར་འགོད་རང་དབང་ཐོག་རྒྱ་ནག་གིས་བཀག་སྡོམ་ཤུགས་ཆེ་བྱེད་བཞིན་ཡོད་སྐོར་བརྗོད་ཀྱི་འདུག ཅེས་སོགས་ཀྱི་གསུང་བཤད་གནང་།
