༢༠༡༤ ཟླ་ ༥ ཚེས་ ༢༦ རེས་གཟའ་ཟླ་བ།
༄༅། །བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་སྣེ་ཁྲིད་འོག་སྤྱི་འཐུས་ཀརྨ་ཆོས་འཕེལ་ལགས་དང་། སྤྱི་འཐུས་ཟླ་བ་ཕུན་སྐྱིད་ལགས། སྤྱི་འཐུས་འཇམ་དབྱངས་བཟོད་པ་ལགས། ཡུ་རོབ་སྤྱི་འཐུས་བཀྲས་མཐོང་དབང་པོ་ལགས་བཅས་ལས་གྲུབ་པའི་ཚོགས་ཆུང་ཞིག་ཡུ་རོབ་རྒྱལ་ཁབ་གཅིག་ནང་བོད་དོན་ཞུ་གཏུག་ཆེད་གཞུང་འབྲེལ་ཕྱོགས་བསྐྱོད་གནང་རྒྱུ་ཡིན་འདུག
གནད་དོན་དེའི་སྐོར་སྤྱི་འཐུས་ཚོགས་གཞོན་མཆོག་གིས་གསུང་གསལ། སྤྱིར་བཏང་སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ནས་བོད་མིའི་ཁྲིམས་བཟོའི་ལས་དོན་ཙམ་མ་ཟད། རྒྱ་གར་གྱིས་གཙོས་ཕྱི་རྒྱལ་ཡུལ་གྲུ་ཁག་ནང་བོད་དོན་ཞུ་གཏུག་གི་ལས་དོན་སྤེལ་དང་སྤེལ་མུས་ཡིན་པར་བརྟེན། ང་ཚོ་སྤྱི་འཐུས་ལྔ་ལས་གྲུབ་པའི་ཚོགས་ཆུང་ཞིག་ཕྱི་ལོ་ ༢༠༡༤ ཟླ་ ༥ ཚེས་ ༢༧ ནས་དབུས་འཛུགས་ཀྱིས་ཕྱི་ཟླ་ ༦ ཚེས་ ༡༡ བར་བདུན་ཕྲག་གཉིས་ལྷག་རིང་ཡུ་རོབ་རྒྱལ་ཁབ་བདུན་ནང་བོད་དོན་ཞུ་གཏུག་ཆེད་སྐྱོད་མཁན་རེད། ང་ཚོས་གཙོ་བོ་ཡུལ་དེ་དག་ནང་གི་གྲོས་ཚོགས་འཐུས་མི་དང་ཆབ་སྲིད་མི་སྣ། དེ་བཞིན་བོད་དོན་ལ་རྒྱབ་སྐྱོར་གནང་མཁན་གྱི་ཚོགས་པའི་མི་སྣ་དང་མཇལ་འཕྲད་ཀྱིས་བོད་ནང་གི་ད་ལྟའི་ཛ་དྲག་གནས་སྟངས་ངོ་སྤྲོད་དང་། ཆབ་སྲིད་བཙོན་པའི་གནས་སྟངས། ཁོར་ཡུག ཆོས་དང་རིག་གཞུང་སོགས་སྲུང་སྐྱོབ་ཐོག་སྔར་ལྷག་རོགས་རམ་གནང་སྐྱོང་ཡོང་བའི་འབོད་སྐུལ་ཞུ་རྒྱུ་དང་། ཕྱོགས་མཚུངས་གལ་ཆེ་བ་ཞིག་ལ་རྒྱ་ནག་གཞུང་ཕྱོགས་ནས་བོད་ནང་འཛིན་བཞིན་པའི་ཆབ་སྲིད་ཀྱི་ལངས་ཕྱོགས་ངོ་སྤྲོད་དང་འབྲེལ་བོད་ནང་ཁོང་རྣམ་པའི་ངོས་ནས་སྐུ་ཚབ་ཚོགས་ཆུང་གཏོང་ཐབས་ཙམ་མ་ཟད། ཁ་ཡོད་ལག་ཡོད་ཀྱིས་བོད་ནང་ཕན་ཐོགས་ཡོད་པའི་ལས་དོན་གང་ཞིག་བསྒྲུབ་རྒྱུ་འདུག་པའི་སྐོར་ལ་གོ་བསྡུར་བྱ་རྒྱུ་ལྟ་བུ་གཙོ་བོ་ཆགས་ཀྱི་ཡོད། ཅེས་སོགས་ཀྱི་འགྲེལ་བརྗོད་གནང་འདུག་པ་བཅས། །
