༢༠༡༤ ཟླ་ ༤ ཚེས་ ༡༠ རེས་གཟའ་ཕུར་བུ།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༡༠ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་ཤུ་ཆིན་མི་ཀྱོ་གཙུག་ལག་སློབ་གཉེར་ཁང་དུ་གསང་སྔགས་སྐོར་ལ་བཀའ་སློབ་སྩལ་ཡོད། དེ་ཡང་༸གོང་ས་མཆོག་གིས་དེ་ཉིན་སྔ་དྲོ་མཐོ་སློབ་ཀྱི་གནད་ཡོད་མི་སྣས་ཚོགས་ཁང་ཆེ་མོའི་ནང་ཕེབས་བསུ་དང་སྦྲགས་༸ཞབས་སོར་འཁོད་རྗེས་བཀའ་སློབ་ཕེབས་དོན། དེ་རིང་ཁྱེད་རྣམ་པས་བོད་ཀྱི་གསང་སྔགས་སྐོར་འགྲེལ་བཤད་བྱེད་རོགས་གསུངས་པ་ལྟར། བོད་པས་སངས་རྒྱས་པའི་ཆོས་ལ་དོ་སྣང་ཡོང་རྒྱུ་དེ་དུས་རབས་བདུན་པར་ཆོས་རྒྱལ་སྲོང་བཙན་སྒམ་པོ་ཡོད་པའི་སྐབས་ནས་རྒྱ་བཟའ་དང་བལ་བཟའ་ཞེས་རྒྱ་ནག་རྒྱལ་པོའི་སྲས་མོ་གཅིག་དང་བལ་པོ་རྒྱལ་པོའི་སྲས་མོར་ཆོས་རྒྱལ་སྲོང་བཙན་སྒམ་པོས་འཁྲུངས་ས་བསྐྱོན་ཡོད། དེའི་སྐབས་བལ་ཡུལ་ནས་ཐུབ་དབང་གི་སྐུ་
གཅིག་དང་། རྒྱ་ནག་ནས་ཐུབ་དབང་གི་སྐུ་གཅིག་གདན་འདྲེན་ཞུས་ཡོད་པའི་ཐུབ་དབང་གི་སྐུ་དེ་གཉིས་ལྷ་སར་རྟེན་གཙོའི་ནང་གི་གཙོ་བོ་ཆགས་ཡོད། དེ་འདྲ་བྱས་ཏེ་ནང་ཆོས་ལ་ཐུགས་སྣང་བསླེབས་པ་ཞིག་དང་། དེ་ནས་དུས་རབས་བརྒྱད་པའི་ནང་ཆོས་རྒྱལ་ཁྲི་སྲོང་ལྡེ་བཙན་སྐབས་ནང་ཆོས་དེ་རྒྱ་གར་ནས་བྱུང་བར་སོང་རྒྱ་གར་རང་ལ་ཐད་ཀར་འབྲེལ་བ་གནང་ཡོད་ཅིང་སྐབས་དེའི་རྒྱ་གར་ནང་དུ་ནང་ཆོས་ཀྱི་བསྟི་གནས་ལྟ་བུ་དེ་ནཱ་ལེནྡྲ་ཆགས་ཡོད། དེར་བརྟེན་ནཱ་ལེནྡྲའི་མཁས་པ་མཁན་ཆེན་ཞི་བ་འཚོ་བོད་ལ་གདན་ཞུ་གནང་ཡོད།
བོད་ནང་དུ་ནང་ཆོས་ངོ་སྤྲོད་དང་ཐོག་མར་འཛིན་སྐྱོང་སྤེལ་གསུམ་གནང་མཁན་
དེ་མཁན་ཆེན་ཞི་བ་འཚོ་རེད། ཁོང་ནི་ཡོངས་གྲགས་སུ་དཔལ་ནཱ་ལེནྡྲའི་མཁས་པ་ཆེན་པོ་ཞིག་ཡིན། ཁོང་གི་གསུང་ནང་ད་ལྟ་བོད་ཡིག་ནང་དུ་རྒྱ་གར་སྐད་ནས་བསྒྱུར་ཡོད་པ་བཀའ་འགྱུར་པོད་བརྒྱ་ཙམ་ཞིག་དང་བསྟན་འགྱུར་པོད་ཉིས་བརྒྱ་ཉི་ཤུ་རྩ་གྲངས་ཤིག་ཡོད། དེའི་ནང་དུ་མཁན་ཆེན་ཞི་འཚོ་སྐུ་ངོ་མས་གསུང་དབུ་མའི་སྐོར་ལ་དབུ་མ་རྒྱན་ཞེས་པ་ང་ཚོས་དེ་རིང་ཁ་སང་ཡིན་ཡང་སློབ་སྦྱོང་བྱེད་བཞིན་ཡོད། དེ་བཞིན་ཁོང་ཚད་མའི་སྐོར་ལ་ཧ་ཅང་མཁས་པ་རེད་འདུག ཚད་མའི་དེ་ཁོ་ན་ཉིད་བསྡུས་པ་ཞེས་ཚད་ཆེན་གྱི་གཞུང་དེ་ཡང་དེང་གི་ཆར་ང་ཚོས་སློབ་སྦྱོང་བྱེད་རྒྱུ་གཅིག་རེད། ཁོང་གི་སློབ་དཔོན་ཀ་མ་ལ་ཤཱི་ལ་རེད། ཁོང་བོད་ལ་གདན་ཞུ་གནང་ཡོད་ཅིང་ཁོང་གིས་མཛད་པའི་དབུ་མའི་སྐོར་ལ་དབུ་མ་སྣང་བ་ཞེས་པ་ང་ཚོས་སློབ་སྦྱོང་བྱེད་བཞིན་ཡོད། ཁོང་གི་དགེ་རྒན་མཁན་ཆེན་ཞི་འཚོས་མཛད་པའི་ཚད་མའི་དེ་ཁོ་ན་ཉིད་བསྡུས་པའི་འགྲེལ་ཆེན་པོད་གཉིས་ཙམ་ཡོད།
བོད་ལ་སངས་རྒྱས་ཀྱི་ཆོས་ཐོག་མར་དར་སྤེལ་གནང་མཁན་གཙོ་བོ་དེ་ཞི་འཚོ་ཡབ་སྲས་རེད་འདུག ཁོང་ནཱ་ལེནྡྲ་ནས་ཕེབས་པ་ཞིག་རེད། ལྟ་བ་དབུ་མ་པ་དང་དགེ་སློང་འདུལ་བ་འཛིན་པ། དགེ་སློང་གི་སྡོམ་རྒྱུན་དེ་ཡང་མགོན
་པོ་ཀླུ་སྒྲུབ་ནས་བརྒྱུད་པའི་གཞི་ཐམས་ཅད་ཡོད་པར་སྨྲ་བའི་སྡོམ་རྒྱུན་རེད། ལྟ་གྲུབ་སྐོར་དེ་ཡང་མགོན་པོ་ཀླུ་སྒྲུབ་ནས་བརྒྱུད་པ་རེད་འདུག དེར་བརྟེན་གཙོ་བོ་མགོན་པོ་ཀླུ་སྒྲུབ་ནས་བརྒྱུད་པ་རེད། ཡང་ཁོང་གིས་དབུ་མ་རྒྱན་གྱི་ནང་དུ་རྣམ་རིག་པའི་ལྟ་བ་དེ་ཡང་ཁོང་གི་ཞལ་བཞེས་གནང་གི་ཡོད། དེར་བརྟེན་ཐོགས་མེད་སྐུ་མཆེད་ཀྱི་རྗེས་སུའང་འབྲང་མཁན་གང་ལྟར་ཀླུ་སྒྲུབ་དང་ཐོགས་མེད་གཉིས་ཀའི་དགོངས་པ་དགྲོལ་མཁན་ཞིག་ཡིན་ལ་བོད་ལ་ཐོག་མར་ནང་ཆོས་བཤད་སྒྲུབ་ཟུང་འབྲེལ་ཐོག་ནས་རྩ་འཛུགས་གནང་མཁན་དེ་མཁན་ཆེན་ཞི་འཚོ་ཡབ་སྲས་རྣམ་གཉིས་རེད། སློབ་དཔོན་རིན་པོ་ཆེའང་ཡོད་པ་རེད། ཞི་འཚོ་ཡབ་སྲས་ཀྱི་བསྟན་པ་རྒྱ་ཆེར་སྤེལ་སྐབས་མི་དང་མི་མིན་གྱིས་འགལ་རྐྱེན་མི་མཐུན་པའི་ཕྱོགས་སེལ་རྒྱུའི་འགན་གཙོ་བོ་དེ་སློབ་དཔོན་རིན་པོ་ཆེས་བཞེས་ཡོད། བྱས་ཙང་ང་ཚོས་ནམ་རྒྱུན་མཁན་སློབ་ཆོས་གསུམ་ཞེས་མཁན་ཆེན་ཞི་བ་འཚོ་དང་སློབ་དཔོན་པདྨ་འབྱུང་གནས། སྦྱིན་བདག་ཆོས་རྒྱལ་ཁྲི་སྲོང་ལྡེའུ་བཙན་ཡིན་པ་བཅས་བོད་ཀྱི་གཙུག་ལག་ཁང་མང་པོའི་ནང་དུ་མཁན་སློབ་ཆོས་གསུམ་གྱི་རི་མོ་འདི་དར་སྲོལ་ཆེན་པོ་ཡོད།
བོད་ཀྱི་ནང་ཆོས་ཀྱི་འབྱུང་ཁུངས་དེ་ནཱ་ལེནྡྲ་ནས་ཐད་ཀར་བརྒྱུད་པ་ཞིག་རེད། མཁན་ཆེན་ཞི་བ་འཚོ་དགེ་སློང་འདུལ་བ་འཛིན་པ་གཞི་ཐམས་ཅད་ཡོད་པར་སྨར་བའི་སྡེ་བའི་ལུགས་གི་བསྙེན་པར་རྫོགས་པའི་དགེ་སློང་འདུལ་བ་འཛིན་པ་བྱས། དེའི་ཐོག་ཁོང་གིས་དབུ་མ་རྒྱན་དེ་ཚོའི་ནང་གཙོ་བོ་སྟོང་ཉིད་སྐོར་དང་བྱང་ཆུབ་སེམས་ཀྱི་སྐོར་གསུངས་ཡོད། དེར་བརྟེན་བྱང་ཆུབ་སེམས་ཀྱི་ཐེག་ཆེན་གྱི་རྒྱུ་ཕ་རོལ་ཏུ་ཕྱིན་པའི་ཐེག་པའི་ལམ་དེ་དག་ཉམས་བཞེས་གནང་གི་ཡོད། དེའི་ཐོག་བསྟན་འགྱུར་ནང་དུ་མཁན་ཆེན་ཞི་འཚོས་མཛད་པས་དེ་ཁོ་ན་ཉིད་ཀྱི་རབ་བྱེད་ཅེས་པ་ཞིག་ཡོད་པ་དེ་གསང་སྔགས་བླ་མེད་སྐོར་རེད་འདུག བྱས་ཙང་ཁོང་གསང་སྔགས་བླ་མེད་སྐོར་ཉམས་བཞེས་གནང་མཁན་གྱི་མཁས་པ་ཞིག་རེད་འདུག
དེ་བརྟེན་བོད་ལ་མཁན་ཆེན་ཞི་བ་འཚོས་དཔལ་ནཱ་ལེནྡྲའི་ཆོས་དེ་ཇི་མ་ཇི་བཞིན་ཞིག་སྲོལ་གཏོད་གནང་བ་ཡིན་དུས། ང་ཚོས་ནམ་རྒྱུན་ཤོད་སྲོལ་ལ་ཕྱི་འདུལ་བ། ནང་བྱང་སེམས། གསང་བ་གསང་སྔགས་ཞེས་བསྟན་ཐོག་གཅིག་ལ་དེ་གསུམ་ཀ་ཉམས་ལེན་བྱེད་རྒྱུ་ཤོད་ཀྱི་ཡོད། དེ་ནས་མགོན་པོ་ཀླུ་སྒྲུབ་ལ་གཏུག་པ་ཡིན་ན་མགོན་པོ་ཀླུ་སྒྲུབ་ཕྱི་འདུལ་བ། ཁོང་གི་དབུ་མ་རིན་ཆེན་ཕྲེང་བ་དང་། དེ་བཞིན་བྱང་ཆུབ་སེམས་འགྲེལ། དེ་དག་ནང་བདག་གཞན་མཉམ་བརྗེས་ཀྱི་བྱང་ཆུབ་ཀྱི་སེམས་བསྒོམ་རྒྱུའི་སྐོར་ལ་མང་པོ་གསུངས་ཡོད། མགོན་པོ་ཀླུ་སྒྲུབ་ཀྱིས་བཀའ་བབ་ཀྱི་བསྟན་པའི་བྱ་བ་མཛད་རྒྱུ་དེ་ཤེར་ཕྱིན་གྱི་དངོས་བསྟན་སྟོང་ཉིད་ཀྱི་རིམ་པའི་སྐོར་དེ་རྩལ་དུ་བཏོན་ཏེ་གསུང་གི་ཡོད། དེར་བརྟེན་དབུ་མའི་ལྟ་བའི་སྐོར་ལ་ཀླུ་སྒྲུབ་ཀྱིས་གསུང་ལས་ལྷག་པ་ཞིག་མེད། གང་ལྟར་ཕྱི་འདུལ་བ་དང་ནང་བྱང་སེམས་ཀྱི་ཉམས་བཞེས་ཡོད་པའི་ཐོག་གསང་སྔགས་གཙོ་བོ་གསང་བ་བསྡུས་པའི་སྐོར་ལ་སྐྱེད་རིམ་སྐོར་མཛད་ཡོད་ལ་དེ་བཞིན་རྫོགས་རིམ་སྐོར་ལའང་མཛད་ཡོད། ཁོང་གི་སློབ་མ་ཨཱརྱ་དེ་བས་གསང་སྔགས་སྐོར་མཛད་ཡོད། དེ་བཞིན་ཐེག་ཆེན་སྐོར་དབུ་མ་བཞི་བརྒྱ་པ། སྔགས་སྐོར་མཛད་ཡོད།
ཁོང་གི་རྗེས་འབྲང་པ་ཟླ་བ་གྲགས་པ་ཕྱི་འདུལ་བ་དང་ནང་བྱང་སེམས། དབུ་མ་འཇུག་པ་དང་བཞི་བརྒྱ་པའི་འགྲེལ་བ། རྩ་བ་ཤེས་རབ་ཀྱི་འགྲེལ་བ་ཚིགས་གསལ། དེའི་ནང་གཟིགས་ནང་ཤེས་རྒྱུ་རེད། ཀླུ་སྒྲུབ་ཡབ་སྲས་ནས་བཟུང་སྟེ་མཁན་ཆེན་ཞི་བ་འཚོ་བར་དུ་ཕྱི་འདུལ་བ། ནང་བྱང་སེམས། གསང་བ་གསང་སྔགས་བྱས་ཏེ་ཕེབས་ཡོད། དེ་ལྟར་འདས་པའི་དུས་སུ་བོད་གངས་ཅན་གྱི་ལྗོངས་སུ་བསྟན་པ་འཛིན་སྐྱོང་སྤེལ་གསུམ་ཚད་ལྡན་གྱི་དབང་དུ་བྱས་པ་ཡིན་ན། གསུམ་ལྡན་རིག་པ་འཛིན་པ་ཞེས་པ་འདི་བྱེད་ཀྱི་ཡོད། ཅེས་སོགས་ཀྱི་གསང་བ་སྔགས་ཀྱི་ཆོས་འབྲེལ་ལེགས་པར་སྩལ་གྲུབ་རྗེས་ཆོས་ཞུ་བའི་ཁྲོད་ནས་དྲི་བ་ཕུལ་བ་རྣམས་ལ་རེ་རེ་བཞིན་བཀའ་ལན་སྩལ་ཡོད་པ་བཅས་དེ་འདུས་མི་མང་རྣམས་ལ་བོད་ཀྱི་གསང་སྔགས་ཀྱི་ཆོས་འབྲེལ་ཟབ་ཅིང་རྒྱས་པ་སྩལ་ཡོད་པར་ཚང་མ་ཐུགས་བློ་ཁེངས་བའི་རྣམ་འགྱུར་མངོན་གསལ་ཆེན་པོས་ཐུགས་རྗེ་ཆེ་ཞུའི་དགའ་བསུ་ལན་མང་ཞུས་ཡོད།
