༢༠༡༤ ཟླ་ ༤ ཚེས་ ༢༡ རེས་གཟའ་ཟླ་བ།
༄༅། །འདི་གར་ཤེས་རིག་ལས་ཁུངས་ནས་བཏང་གནས་ནང་འཁོད་དོན། བཀའ་ཤག་སྐབས་ ༡༤ པས་ཤེས་ཡོན་ལ་གལ་གནད་ཆེ་ཤོས་སུ་ངོས་འཛིན་གནང་བའི་ཐོག་དབུས་བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་སློབ་ཕྲུག་སོ་སོའི་འབད་རྩོལ་གྱི་གྲུབ་འབྲས་ལ་སེམས་སྐུལ་ལེགས་གསོལ་དང་འབྱོར་འཁོས་ཞན་པའི་སློབ་ཕྲུག་དང་ཁྱིམ་ཚང་བཅས་ལ་དམིགས་བསལ་དགོངས་བཞེས་སློབ་ཡོན་འཆར་གཞི་གསར་པའི་གནད་དོན་ཁག་མང་ཚོགས་ནས་མཁྱེན་རྟོགས་ཡོང་ཐབས་སུ་ ༢༠༡༣ ལོ་ནས་འཆར་གཞི་དང་སྦྲགས་བརྒྱུད་ལམ་སྣ་ཚོགས་རྒྱུད་གསལ་བསྒྲགས་ཞུས་ཡོད་ཀྱང་། དེ་དོན་འབྲེལ་ཡོད་སློབ་ཕྲུག་དང་ཕ་མ་མང་ཚོགས་བཅས་ལ་བསྐྱར་དུ་དོན་ཚན་རེ་རེ་བཞིན་གསལ་བསྒྲགས་གནང་དགོས་གལ་ཆེར་མངོན་པ་ལྟར་ཁུངས་ཁྱབ་མཇུག་སྣོན་ནན་འདྲོངས་ཡོང་བ་ཞུ།
ཀ། སྲིད་སྐྱོང་སློབ་ཡོན།
བོད་མིའི་སྒྲིག་འཛུགས་ཁྱབ་ཁོངས་སློབ་གྲྭ་ཁག་ནས་འཛིན་རིམ་བཅུ་གཉིས་ཀྱི་རྒྱལ་ཡོངས་ཡིག་རྒྱུགས་ཀྱི་ཕྱོགས་བསྡོམས་བརྒྱ་ཆ་ ༩༥ ཡན་ལོན་པ་རྣམས་ནས་འདི་གའི་ ༢༠༡༤ སློབ་ཡོན་གསལ་བསྒྲགས་སྔོན་སོང་ལྟར་འཚང་སྙན་དུས་ཐོག་འབུལ་དགོས་པ་དང་། སྲིད་སྐྱོང་སློབ་ཡོན་མུ་མཐུད་འཐོབ་པར་ཉེ་བའི་གཙུག་ལག་རབ་འབྱམས་པའི་ལོ་རིམ་དང་པོ་དང་གཉིས་པ་སོ་སོར་ཡིག་རྒྱུགས་བརྒྱ་ཆ་ ༧༠ ཡན་ངེས་པར་ལོན་པ་དགོས། དེ་མིན་ཤེས་རིག་གི་སློབ་ཡོན་སྤྱི་མཚུངས་ལས་དམིགས་བསལ་ཐོབ་ཐང་མེད།
ཁ། སྲིད་སྐྱོང་གཟེངས་བསྟོད།
དབུས་བོད་མིའི་སྒྲིག་འཛུགས་མ་ལག་གང་རུང་ནས་སློབ་ཡོན་སྦྱར་བ་དང་། བོད་མིའི་དྭང་བླངས་དཔྱ་དངུལ་ལག་དེབ་ཡོད་ལ་སྒེར་ཁུངས་ནས་ཕྱི་ལོ་ ༢༠༡༣ ཟླ་ ༨ ནས་བཟུང་སྒྲིག་ཞུགས་རིགས་གཅིག་རྐང་འཛིན་(Ph.D)སློབ་ཐོན་རྣམས་ལ་ཆེ་བསྟོད་ལག་འཁྱེར་དང་ལེགས་སྐྱེས་སྒོར་ ༢༠,༠༠༠།༠༠ གནང་རྒྱུ་ཡིན་པར་སོང་ཕྱི་ལོ་ ༢༠༡༤ ཟླ་ ༨ ཚེས་ ༡༥ ནང་ཚུད་སྙན་འབུལ་མཉམ་གོང་གསལ་སློབ་ཚན་ཐོན་པའི་ལག་འཁྱེར་ངོས་བཤུས་བཅས་གནང་སྐྱོང་ཡོང་བ་ཞུ། ཆེ་བསྟོད་ཞུ་ཡུལ་དྷ་སར་ཟླ་ ༩ ཚེས་ ༢ མང་གཙོའི་དུས་དྲན་ཉིན་གཞུང་འབྲེལ་མཛད་སྒོའི་སྐབས་གནང་རྒྱུ།
སློབ་ཐོན་པ་རྣམས་བྱ་དགའ་ལེན་པར་ཡོང་སྐབས་གྲང་གློག་མེ་འཁོར་ཉལ་ཁྲི་ཉིས་བརྩེགས་(AC 2 TIER)དང་སྦ་སི་ལེགས་གྲས་ཀྱི་ལམ་གྲོན་དང་། ཉིན་རེར་ལྟོ་དོད་ཧིན་སྒོར་ ༣༠༠། རེ་དང་། ལམ་བར་དགོས་གལ་ཡོད་རིགས་ལ་ཉིན་རེར་ཁང་གླ་མང་མཐར་སྒོར་ ༥༠༠ གནང་རྒྱུ་ཡིན། གོང་གསལ་འགྲོ་གྲོན་ཁག་རྩིས་འཕེར་ཡོང་སླད་ཁང་གླ་དང་མེ་འཁོར་སྣུམ་འཁོར་སོགས་ཀྱི་འབིན་འཛིན་ངོ་མ་ཆབ་འབུལ་ཞུ་དགོས།
ག ལེགས་གསོལ་བྱ་དགའ།
ཕྱི་ལོ་ ༢༠༡༣ ལོའི་སློབ་ཡོན་འཆར་གཞི་གསར་པའི་ཁོངས་སུ་མ་གཏོགས་པའི་ཤེས་རིག་སློབ་ཡོན་ཞུ་སྤྲོད་གནང་བཞིན་པའི་ཉེ་བའི་གཙུག་ལག་རབ་འབྱམས་པ་དང་གཙུག་ལག་རབ་འབྱམས་པའི་སློབ་མ་ལོ་རེའི་ཡིག་རྒྱུགས་སྐབས་བརྒྱ་ཆ་ ༧༥ ལོན་པ་རྣམས་ལ་དེ་སྔ་སློབ་ཡོན་གཏན་འབེབས་ཇི་ཡོད་ཐོག་ལོ་དེར་སྒོར་ ༡༠,༠༠༠ འཕར་མ་གནང་རྒྱུ། དེ་མཚུངས་བོད་མིའི་སྒྲིག་འཛུགས་ཁྱབ་ཁོངས་དང་བཅས་པ་ནས་སློབ་ཡོན་མ་ཞུས་པར་སོ་སོའི་འགྲོ་གྲོན་ཐོག་མཐོ་སློབ་སློབ་གཉེར་གནང་ཁོངས་ནས་གོང་བཞིན་ལོ་རིམ་སོ་སོའི་ཡིག་རྒྱུགས་བརྒྱ་ཆ་ ༧༥ ཡན་ལོན་ཚེ་སྒོར་༡༠,༠༠༠ ལེགས་སྐྱེས་སུ་གནང་རྒྱུ་ཡིན། འོང་ཀྱང་སློབ་མ་འདི་རིགས་ནས་འཛིན་རིམ་བཅུ་པ་བར་བོད་པའི་སྐད་ཡིག་སློབ་སྦྱོང་བྱས་པ་ཞིག་དགོས། གོང་གསལ་ལེགས་སྐྱེས་ཞུ་མཁན་རྣམས་ནས་སོ་སོའི་ཡིག་རྒྱུགས་གྲུབ་འབྲས་དང་བཅས་པ་སྙན་ཞུ་འདི་ལས་སུ་འབུལ་གནང་ཡོང་བ་ཞུ།
ང་། ཕྱི་རྒྱལ་སྐད་ཡིག་སློབ་ཚན་སློབ་ཡོན།
ཤེས་རིག་ལས་ཁུངས་ནས་སློབ་ཡོན་ལེན་མུས་སློབ་ཕྲུག་གང་ཞིག་ཉེ་བའི་གཙུག་ལག་རབ་འབྱམས་པ་དང་གཙུག་ལག་རབ་འབྱམས་པའི་སློབ་དུས་རིང་ལ་རྒྱ་གར་གཞུང་ནས་ངོས་ལེན་ཡོད་པའི་ལྟེ་གནས་ཁང་ཞིག་ནང་རྒྱ་ཡིག(Chinese) ཕ་རྰན་སིའི།(French) ཨུ་རུ་སུ།(Russian) ཨ་རབ།(Arabic) སི་པཻན།(Spanish) ཉི་འོང་(Japanese) བཅས་ཀྱི་(Certificate/Diploma) སྐད་ཡིག་སྦྱོང་མཁན་ལ་སྒོར་ ༡༠,༠༠༠།༠༠ ཐམ་པ་ དང་། (Advance Course) ལ་སྒོར་ ༡༥,༠༠༠།༠༠ ཐམ་པ་སློབ་ཡོན་འཕར་མ་གནང་རྒྱུ་ཡིན། སློབ་ཡོན་ཞུ་བློ་ཡོད་རིགས་ནས་འདི་གའི་ལས་ཁུངས་སུ་གོོང་དོན་སྐོར་དཔང་རྟགས་ཡིག་ཆ་དང་བཅས་སྙན་ཞུ་འབུལ་གནང་ཡོང་བ་ཞུ།
ཅ། དུས་ཐུང་ཆེད་ལས་སློབ་ཡོན།
ཤེས་རིག་ལས་ཁུངས་ནས་སློབ་ཡོན་ལེན་མུས་སློབ་ཕྲུག་གང་ཞིག་ཉེ་བའི་གཙུག་ལག་རབ་འབྱམས་པའི་སློབ་དུས་རིང་ ཆེད་ལས་ (Professional courses) སློབ་ཚན་གཞན་ཐོག་དུས་ཐུང་ཟུར་སྦྱོང་གི་ཤེས་ཚད་ལག་འཁྱེར་ Certificate/Diploma ལེན་མཁན་རྣམས་ལ་སྒོར་ ༥,༠༠༠ རེ་འཕར་སྣོན་གནང་རྒྱུ། སློབ་ཡོན་ཞུ་བློ་ཡོད་རིགས་ནས་འདི་གའི་ལས་ཁུངས་སུ་སྙན་ཞུ་འབུལ་གནང་ཡོང་བ་ཞུ།
ཆ། ཉམ་ཐག་སློབ་མར་སློབ་ཡོན།
དབུས་བོད་མིའི་སྒྲིག་འཛུགས་ནས་ཞིབ་འཇུག་གིས་ཉམ་ཐག་ཨང་ཐོབ་ག་པ་ཅན་གྱི་སློབ་མ་འཛིན་རིམ་བཅུ་གཉིས་ཀྱི་རྒྱལ་ཡོངས་ཡིག་རྒྱུགས་སྐབས་བརྒྱ་ཆ་ ༤༠ ལོན་པ་གང་ཞིག་མཐོ་སློབ་དང་ལས་རིགས་སློབ་སྦྱོང་སོགས་ནང་ཞུགས་བློ་ཡོད་ཚེ་དམིགས་བསལ་སློབ་ཡོན་གནང་རྒྱུའང་། ཐུགས་སྣང་དགོས་པ་ཞིག་ལ་སློབ་བུ་དེ་རྣམས་སྔོན་དུ་དྭང་སློབ་ནང་ངེས་པར་འཛུལ་ཞུགས་གནང་དགོས། གལ་ཏེ་ལུས་བབ་གོ་འཕེར་མེད་པ་སོགས་ཀྱིས་དྭང་སློབ་ཏུ་མ་འཚུད་ཐོག་འབྲེལ་ཡོད་དྭང་སློབ་འགོ་འཛིན་ལས་ཁང་ནས་རྒྱབ་གཉེར་བྱུང་ཚེ་མཐོ་སློབ་དང་ལས་རིགས་སློབ་སྦྱོང་གང་རུང་དུ་ཞུགས་རྒྱུར་དམིགས་བསལ་སློབ་ཡོན་དགོངས་བཞེས་གནང་རྒྱུ་བཅས་ཤེས་རིག་ལས་ཁུང་ནས་ ༢༠༡༤ ཟླ་ ༤ ཚེས་ ༡༥ ལ།
SECRETARY
Department of Education CTA
Gangchen Kyishong
Distt. Kangra
Dharamsala – 176 215
Himachal Pradesh
Ph: 01892 – 226695, 222572, 222721
Fax: 01892- 223481
Email: [email protected] or [email protected]
Website: www.tcewf.org or www.sherig.org/tb
