༢༠༡༤ ཟླ་ ༤ ཚེས་ ༡༦ རེས་གཟའ་ལྷག་པ།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༡༦ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་རྒྱལ་ས་ཊོག་ཁྱོར་སོ་ཏོ་ཆོས་ལུགས་Soto sect ཀྱི་དགེ་འདུན་པ་མི་གྲངས་ ༢༥༠ དང་ལྷན་འགྲོ་བ་མིའི་བཟང་སྤྱོད་སྐོར་བགྲོ་གླེང་མཛད་ཡོད། སྤྱིར་དགེ་འདུན་པ་རྣམས་ཀྱིས་ཉི་ཧོང་གི་བཙོན་པ་རྣམས་ལ་ཡ་རབས་བཟང་སྤྱོད་སྐོར་སློབ་གསོ་གནང་བཞིན་ཡོད་འདུག
དེ་ཡང་དགེ་འདུན་པ་རྣམས་ཀྱིས་བཙོན་པ་རྣམས་ལ་སློབ་གསོའོ་ལས་འགུལ་སྤེལ་ནས་ད་བར་ལོ་ ༥༠ འགྲོ་བཞིན་ཡོད། དེར་བརྟེན་ཐེངས་འདིར་ ༥༠ དུས་དྲན་སྲུང་བརྩི་ཆེད་༸གོང་ས་མཆོག་གདན་ཞུས་ཀྱིས་བགྲོ་གླེང་ལྷན་ཚོགས་ཚོགས་ཡོད། མཛད་སྒོའི་ཐོག་མར་སོ་ཏོའི་ཆོས་ལུགས་ཀྱི་དགེ་འདུན་པ་བགྲེས་པ་ཞིག་གིས་སྲོལ་རྒྱུན་གྱི་ཆོ་ག་དང་ཤེས་རབ་སྙིང་པོ་གསུང་འདོན་གནང་སྟེ་མཛད་སྒོ་དབུ་འཛུགས་གནང་ཡོད།
དེ་རྗེས་ཆོས་དཔོན་གྱིས་མང་ཚོགས་རྣམས་ལ་༸གོང་ས་མཆོག་གི་མཛད་རྣམ་སྙིང་བསྡུས་ཤིག་ངོ་སྤྲོད་གནང་སྐབས་ཐོག་མར་མགོན་པོ་གང་ཉིད་མཆོག་འཁྲུངས་རབ་དང་། དེ་རྗེས་ཕྱི་ལོ་ ༡༩༥༩ ལོར་བཙན་བྱོལ་དུ་༸ཞབས་སོར་འཁོད་སྐོར། ༸གོང་ས་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་ལམ་ཞུས་ཚུལ་སྐོར། ཕྱི་ལོ་ ༢༠༡༡ ལོར་༸གོང་ས་མཆོག་གིས་བོད་མིའི་ཆབ་སྲིད་ཀྱི་སྐུ་དབང་ཡོངས་རྫོགས་མང་གཙོའི་ལམ་ནས་འོས་འདེམས་བྱས་པའི་བོད་མིའི་སྒྲིག་འཛུགས་ཀྱི་འགོ་ཁྲིད་རྣམས་ལ་རྩིས་སྤྲོད་མཛད་ཚུལ་སོགས་ངོ་སྤྲོད་གནང་ཡོད།
དེ་རྗེས་༸གོང་ས་མཆོག་གིས་བཀའ་སློབ་སྩལ་དོན། ངོས་རང་དེ་རིང་དགེ་འདུན་པ་རྣམས་ཀྱིས་བཙོན་པ་རྣམས་ལ་སློབ་གསོ་འི་ལས་འགུལ་སྤེལ་ནས་མི་ལོ་ ༥༠ འཁོར་བའི་དུས་དྲན་མཛད་སྒོར་བཅར་རྒྱུ་བྱུང་བར་ཧ་ཅང་དགའ་པོ་བྱུང་། དགེ་འདུན་པ་རྣམས་ཀྱིས་ལོ་ངོ་ ༥༠ རིང་བཙོན་པ་རྣམས་ལ་སློབ་གསོའི་ལས་འགུལ་སྤེལ་བ་དེ་ནི་ཡི་རང་བསྔགས་བརྗོད་ཞུ་འོས་པའི་བྱ་བ་རླབས་ཆེན་ཞིག་ཡིན། ངོས་རང་འཛམ་གླིང་ས་ཕྱོགས་གང་དུ་བསྐྱོད་ཀྱང་འགྲོ་བ་མིའི་བཟང་པོའི་རིན་ཐང་དང་ཆོས་ལུགས་མཐུན་སྒྲིལ་གོ་འཕེལ་གཏོང་ཐབས་བྱེད་བཞིན་ཡོད། འཛམ་གླིང་ནང་མི་འབོར་འཐེར་འབུམ་བདུན་ཡོད་པ་ཚང་མས་བདེ་བ་འདོད་པ་དང་
སྡུག་བསྔལ་མི་འདོད་པ་གཅིག་མཚུངས་ཡིན་པ་མཟད། ཚང་མར་མི་ཚེ་བདེ་སྐྱིད་ལྡན་པ་ཞིག་སྐྲུན་རྒྱུའི་ནུས་པའང་ཡོད། མི་ཚེ་བདེ་སྐྱིད་ལྡན་པ་ཞིག་ཡོང་བར་བྱམས་བརྩེ་དང་བཟོད་སྲན། ཆོག་ཤེས་སོགས་མིའི་བཟང་པོའི་རིན་ཐང་དེ་དག་གོང་མཐོར་བཏང་བ་བརྒྱུད་ནས་ཡོང་དགོས། འཛམ་གླིང་ནང་གི་ཆོས་ལུགས་ཚང་མས་རིན་ཐང་དེ་དག་གོང་མཐོར་གཏོང་ཐབས་བྱེད་བཞིན་ཡོད། དེར་བརྟེན་ཆོས་ལུགས་ཕན་ཚུན་གུས་བརྩི་དང་འཆམ་མཐུན་ངང་གནས་རྒྱུ་གལ་ཆེན་པོ་ཆགས་ཡོད།
ང་ཚོར་འཕྲད་བཞིན་པའི་དཀའ་ངལ་མང་པོ་ཞིག་མིས་བཟོས་པ་ཞིག་ཆགས་ཡོད། འདོད་ཆགས། ཞེ་སྡང་། གཏི་མུག་བཅས་ཉོན་མོངས་དུག་གསུམ་ལ་རྟེན་ནས་ང་ཚོས་ལས་ངན་པ་གསོག་བཞིན་ཡོད། ནང་པ་སངས་རྒྱས་པའི་གཞུང་ལུགས་ནང་ཆགས་སྡང་གཉིས་ཀྱི་རྩ་བ་གཏི་མུག་ཡིན་པ་དང་། ལྟོས་མེད་རང་དབང་གི་ཆོས་ཤིག་མེད་པར་ཆོས་ཐམས་ཅད་རྒྱུ་འབྲས་རྟེན་བྱུང་ཡིན་པ་བཞེས་ཀྱི་ཡོད། རྒྱུ་འབྲས་རྣམ་གཞག་ལ་རྟེན་ནས་རྒྱུ་དགེ་བ་ལས་འབྲས་བུ་བདེ་བ་དང་། རྒྱུ་མི་དགེ་བ་ལས་འབྲས་བུ་སྡུག་བསྔལ་ཡོང་རྒྱུ་ཡིན་པར་སྤོགས་ཐུབ། ཅེས་སོགས་ཀྱི་བཀའ་སློབ་སྩལ་རྗེས་དྲི་བ་ཁག་ལ་བཀའ་ལན་སྩལ་ཡོད།
དེ་རྗེས་༸གོང་ས་མཆོག་གིས་གོ་སྒྲིག་ཚོགས་ཆུང་ལ་སྟོན་པའི་སྐུ་བརྙན་གཉིས་ཕྱག་རྟགས་སུ་སྩལ་ཏེ་མགོན་པོ་གང་ཉིད་མཆོག་བགྲོ་གླེང་དེར་ཐུགས་དགྱེས་ཚོར་ཧ་ཅང་ཆེན་པོ་བྱུང་ཡོད་སྐོར་བཀའ་སློབ་སྩལ་བ་མ་ཟད། དགེ་འདུན་པ་བགྲེས་པ་རྣམས་སྐུ་ཚེ་དགུང་གྲངས་ ༡༠༠ བར་འཚོ་བཞུགས་ཐུབ་རྒྱུར་ཐུགས་སྨོན་མཛད་རྒྱུ་མ་ཟད། དགེ་འདུན་པ་རྣམས་ནས་ཀྱང་དེ་བཞིན་སྨོན་ལམ་རྒྱག་དགོས་པའི་བཀའ་སློབ་སྩལ་ཡོད། སྐབས་དེར་ཆོས་དཔོན་མཆོག་གིས་༸གོང་ས་མཆོག་ནི་བྱམས་བརྩེའི་བདག་ཉིད་ཀྱི་ཞི་བདེའི་དེད་དཔོན་ཡིན་པ་དང་། ༸གོང་ས་མཆོག་གིས་ལམ་སྟོན་མཛད་པ་དེར་ཤར་བསྐྱོད་བྱ་རྒྱུའི་ཁས་ལེན་ཞུས་པ་དང་སྦྲགས། ལམ་སྟོན་བཀའ་སློབ་ཟབ་གསལ་བཀའ་དྲིན་སྩལ་བར་ཐུགས་རྗེ་ཆེ་ཞུས་ཡོད།
ཚོགས་ཁང་གི་སྒོ་འཕྱོར་ནང་༸གོང་ས་མཆོག་གིས་ལྗགས་རྩོམ་མཛད་པའི་དཔེ་དེབ་འདྲ་མིན་འགྲེམས་སྟོན་གནང་ཡོད།
ཕྱི་ཚེས་ ༡༧ ཉིན་༸གོང་ས་མཆོག་གིས་ཊོག་ཁྱོའི་ནང་ཤེས་རབ་སྙིང་པོ་དང་མགོན་པོ་ཀླུ་གྲུབ་ཀྱིས་མཛད་པའི་ཆོས་དབྱིངས་བསྟོད་པ་དང་རྒྱལ་སྲས་ཐོགས་མེད་བཟང་པོས་མཛད་པའི་ལག་ལེན་སོ་བདུན་མའི་ཆོས་འབྲེལ་སྩལ་རྒྱུ་ཡིན་འདུག ཆོས་འབྲེལ་ཐད་ཀར་རྒྱང་སྲིང་གཟིགས་ཆེད་འདིར་གནོན།
