༢༠༡༤ ཟླ་ ༤ ཚེས་ ༨ རེས་གཟའ་མིག་དམར།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་སེན་ཌའི་གྲོང་ཁྱེར་ནང་རྟེན་གཞི་བྱས་པའི་ཝེས་ཊིན་ Westin Hotel གསོལ་མགྲོན་ཁང་དུ་ཤིན་ཏའོ་ཆོས་བརྒྱུད་ཀྱི་བླ་ཆེན་ཁག་གཅིག་དང་ཉི་ཧོང་གི་བྱང་ཤར་ཁུལ་ནས་ཕེབས་པའི་མང་ཚོགས་བཅས་ཁྱོན་མི་གྲངས་ ༡༠༠ བརྒལ་བར་བཀའ་སློབ་སྩལ་དོན།
ཁྱེད་རང་ཚོས་འདི་ལྟར་གོ་སྒྲིག་གནང་བར་ཐུགས་རྗེ་ཆེ་ཞུ་རྒྱུ་ཡིན། ངོས་ཀྱི་མི་ཚེ་ཧྲིལ་པོའི་རིང་ལས་འགན་གཙོ་བོ་གསུམ་ཡོད་པ་ནི། དང་པོ། ངོས་རང་འགྲོ་བ་མི་ཞིག་ཡིན་པའི་ཆ་ནས་འགྲོ་བ་མིའི་རྒྱུད་ཀྱི་བཟང་སྤྱོད་གོང་མཐོར་སྤེལ་ཐབས་བྱ་རྒྱུ་དང་། གཉིས་པ། ངོས་རང་ནང་པའི་དགེ་སློང་ཞིག་ཡིན་པའི་ཆ་ནས་ཆོས་ལུགས་ཕན་ཚུན་བར་མཐུན་འབྲེལ་གོང་མཐོར་གཏོང་རྒྱུ་ཡིན་པར་བརྟེན་ངོས་རང་འཛམ་གླིང་གི་ས་ཕྱོགས་གང་དུ་བསྐྱོད་ཀྱང་དུས་རྟག་ཏུ་ཆོས་ལུགས་འདྲ་མིན་གྱི་དབུ་ཁྲིད་རྣམ་པ་དང་ཐུག་སྟེ་བགྲོ་གླེང་བྱེད་ཀྱི་ཡོད། ཆོས་ལུགས་ཕན་ཚུན་དབར་མཐུན་སྒྲིལ་ཡོང་ཐབས་སུ་ཆོས་ལུགས་འདྲ་མིན་སྐོར་གོ་རྟོགས་དགོས་རྒྱུ་ཧ་ཅང་གལ་ཆེན་པོ་ཡིན། ཆོས་ལུགས་འདྲ་མིན་ཐོག་གོ་རྟོགས་གཏིང་ཟབ་ཡོང་ཆེད་དེབ་ཀློག་པ་ཙམ་གྱི་འགྲིག་གི་མེད། ང་ཚོས་ཆོས་ཉམས་ལེན་བྱེད་མཁན་ཚོ་དང་དངོས་སུ་ཐུགས་རྒྱུ་གལ་ཆེན་པོ་ཡིན། འདས་པའི་ལོ་ཤས་ནང་ངོས་ཀྱིས་ཉི་ཧོང་གི་སྲོལ་རྒྱུན་གྱི་ཆོས་ལུགས་དེ་ཤིན་ཏའོ་ཆོས་ཉམས་ལེན་བྱེད་མཁན་དང་ཐུགས་རྒྱུའི་གོ་སྐབས་བྱུང་།
དེ་རིང་ངོས་རང་ནང་སེམས་ཀྱི་རིན་ཐང་གོང་མཐོར་གཏོང་ཆེད་བགྲོ་གླེང་བྱེད་རྒྱུའི་འདོད་པ་བྱུང་། དེང་དུས་ཀྱི་ཤེས་ཡོན་ལམ་ལུགས་ནང་ཡ་རབས་བཟང་སྤྱོད་སྐོར་གྱི་སློབ་ཚན་འཇོག་དགོས་རྒྱུ་ཧ་ཅང་གལ་ཆེན་པོ་ཡིན། ཕྱི་དངོས་པོ་ཡར་རྒྱས་དང་དངུལ་དངོས་ཀྱིས་མི་ཕན་ཚུན་དབར་རེ་དོགས་ཀྱིས་བཅིངས་ནས་དུས་རྟག་ཏུ་འཁོན་འཛིན་དང་། སེམས་ཁྲལ། ཕྲག་དོག་སོགས་ལ་བརྟེན་ནས་མཐའ་ན་རང་ཤི་རྒྱག་མཁན་དེ་འདྲའང་མང་པོ་ཡོང་བཞིན་ཡོད། ཨ་རི་དང་ཡུ་རོབ་ནང་ངོས་ཀྱི་གྲོགས་པོ་ཨ་སྒོར་དུང་ཕྱུར་བདག་པོ་དེ་དག་མང་པོ་ཞིག་གི་སེམས་ནང་ཞི་བདེ་མེད། དངུལ་གྱིས་སེམས་ནང་ཞི་བདེ་བསྐྲུན་མི་ཐུབ། དེང་དུས་ཀྱི་ཤེས་ཡོན་ལམ་ལུགས་ནང་ཕྱི་དངོས་པོའི་འཛུགས་སྐྲུན་ཡར་རྒྱས་གཙོ་བཟུང་བྱས་པ་ལས་ནང་གི་བསམ་བློའི་རིན་ཐང་ཐོག་དོ་སྣང་བྱེད་ཀྱི་མེད། སྲོལ་རྒྱུན་འགྲོ་ལུགས་ལྟར་བྱས་ན་བཟང་སྤྱོད་གོང་མཐོར་གཏོང་རྒྱུའི་འགན་གཙོ་བོ་ཆོས་ལུགས་ཀྱི་ལས་འགན་ཞིག་ཡིན་པར་ངོས་འཛིན་བྱེད་བཞིན་ཡོད། དེང་དུས་རབས་གསར་པའི་སྐབས་འདིར་ཆོས་ལུགས་ལ་དོ་སྣང་ཆུང་དུ་འགྲོ་བཞིན་ཡོད་པར་བརྟེན། དེང་དུས་ཤེས་ཡོན་ལམ་ལུགས་ནང་ཕྱི་དངོས་པོ་ཙམ་ཡར་རྒྱས་གཏོང་རྒྱུའི་འགན་ཡོད་པ་མ་ཟད། ནང་སེམས་ཀྱི་རིན་ཐང་གོང་མཐོར་གཏོང་རྒྱུའི་འགན་ཡང་ཡོད།
ཕྱི་དངོས་པོའི་འཛུགས་སྐྲུན་ཁོ་ནར་གཙིགས་ཆེར་འཛིན་པའི་ལམ་ལུགས་འོག་འཚར་ལོངས་བྱུང་བའི་མི་རབས་ཚོའི་བསམ་བློའི་ནང་ཕྱི་དངོས་པོ་གཙོ་བོར་འཛིན་རྒྱུ་མ་གཏོགས་ནང་སེམས་ཀྱི་རིན་ཐང་ལ་དོ་སྣང་ཡོང་གི་མེད། ཁོང་ཚོས་ཕྱི་དངོས་པོའི་རིན་ཐང་དང་དངུལ་ཁོ་ན་བསམས་ནས་སྡོད་ཀྱི་ཡོད། དངུལ་དེ་གལ་ཆེན་པོ་ཡིན། དངུལ་གལ་ཆེན་པོ་ཡིན་པ་ལྟར་ནང་གི་བསམ་བློའི་རིན་ཐང་བྱམས་པ་དང་བརྩེ་བ། གཞན་གྱི་བདེ་དོན་ལ་བསམ་བློ་གཏོང་རྒྱུ་སོགས་ཀྱང་དེ་མཚུངས་གལ་ཆེ་ཆགས་ཡོད། དེ་འདྲ་བྱུང་ཐུབ་ན་སེམས་ཀྱི་ཞི་བདེ་ངོ་མ་དེ་ཡོང་ཐུབ་རྒྱུ་ཡིན། ཚན་རིག་པ་ཚོས་རྟག་དཔྱད་བྱས་པ་བརྒྱུད་སེམས་ངལ་དང་རེ་དོགས་སོགས་བློ་མ་རུངས་པ་དེ་དག་གིས་ང་ཚོའི་ལུས་ཀྱི་འཕྲོད་བསྟེན་ལ་གནོད་ཚབས་བྱེད་ཀྱི་ཡོད་པ་ར་སྤྲོད་བྱུང་ཡོད། འདས་པའི་ལོ་མང་རིང་ང་ཚོས་དེང་དུས་ཚན་རིག་དང་ནང་པའི་ཚན་རིག་དབར་འབྲེལ་བ་འཛུགས་རྒྱུའི་འབད་བརྩོན་བྱས་ཡོད། ཨ་རིའི་ནང་རྟེན་གཞི་བྱས་པའི་སེམས་དང་སྲོག་གི་ལྟེ་གནས་ཁང་གི་ཚན་རིག་པ་སོགས་ཀྱིས་གཙོས་དེང་དུས་ཚན་རིག་པ་དང་ཉམས་ཞིབ་པ་མང་པོ་ཞིག་གིས་ཆོས་ལུགས་ལ་མ་རྟེན་པར་བློ་གཟུ་བོར་གནས་པའི་ཐོག་ནས་ནང་སེམས་ཀྱི་རིན་ཐང་གོང་མཐོར་གཏོང་རྒྱུར་དོ་སྣང་བྱེད་བཞིན་ཡོད། ནང་པའི་ཚན་རིག་ནི་སེམས་ཀྱི་ཚན་རིག་ཡིན། དེང་དུས་ཚན་རིག་གིས་གཙོ་བོ་ཕྱི་དངོས་པོའི་གནས་ལུགས་ལ་དཔྱད་བཞིན་ཡོད། རིག་གཞུང་དེ་གཉིས་དབར་འདས་པའི་ལོ་ངོ་བཅུ་བདུན་ལྷག་རིང་འབྲེལ་བ་བྱས་པ་དེས་ཕྱོགས་གཉིས་ཀར་ཕན་ཐོགས་ཧ་ཅང་བྱུང་ཡོད། དེང་སྐབས་ཉི་ཧོང་ཚན་རིག་པ་དང་ཤེས་ཡོན་མི་སྣ་མང་པོ་ཞིག་གིས་ནང་གི་བསམ་བློའི་རྣམ་གཞག་ལ་དོ་སྣང་བྱེད་འགོ་འཛུགས་བཞིན་ཡོད་པ་འདི་བཟང་ཕྱོགས་ཀྱི་ཡར་རྒྱས་ཤིག་ཡིན།
ཞེས་བཀའ་སློབ་སྩལ་བ་དང་སྦྲགས། ༸གོང་ས་མཆོག་གིས་ཤིན་ཏོ་ཆོས་ལུགས་ཀྱིས་རང་བྱུང་ཁམས་ལ་བརྩི་བཀུར་དང་གཙིགས་ཆེན་པོ་བྱ་རྒྱུའི་ལམ་སྲོལ་དེར་བསྔགས་བརྗོད་མཛད་པ་དང་སྦྲགས་བཀའ་སློབ་སྩལ་དོན། ངོས་ཀྱིས་ཤིན་ཏོའི་ཆོས་ལུགས་ལ་མཐོང་སྣང་གང་བྱུང་བརྗོད་ན། ཤིན་ཏོ་ཆོས་ལུགས་རྗེས་འབྲང་པ་ཚོས་མེ་ཏོག་དང་ཤིང་སྡོང་སོགས་རང་བྱུང་ཁམས་ཀྱི་དངོས་པོར་ཧ་ཅང་དགའ་མོས་བྱེད་བཞིན་འདུག དེང་སྐབས་དུས་རབས་གསར་པའི་སྐབས་འདིར་མི་རྣམས་འཕྲུལ་ཆས་ལ་གཞན་བསྟེན་གྱི་བསམ་བློ་ཧ་ཅང་ཤུགས་ཆེན་པོ་ཡོད། འོན་ཀྱང་སྐྱེ་ལྡན་སྲོག་ཆགས་ཡར་རྒྱས་འགྲོ་རྒྱུ་ནི་དུས་ཡུན་ཧ་ཅང་མང་པོའི་གོང་ནས་རང་བྱུང་ཁམས་ཀྱི་འགྱུར་བགྲོས་དང་བསྟུན་ནས་ད་ལྟའི་གནས་སྟངས་ལ་བསླེབས་ཡོད། དེར་བརྟེན་ང་ཚོས་རང་བྱུང་ཁམས་ལ་ངེས་པར་དུ་བརྩི་བཀུར་ཞུ་དགོས། ཞེས་སོགས་ཀྱི་བཀའ་སློབ་སྩལ་གྲུབ་མཚམས། མགོན་པོ་གང་ཉིད་མཆོག་སེན་ཌའི་ནས་ཨོ་ས་ཀར་ (Osaka) ཆིབས་སྒྱུར་བསྐྱངས་ཡོད་པ་དང་། ༸གོང་ས་མཆོག་ཨོ་ས་ཀར་༸ཞབས་སོར་འཁོད་སྐབས་རྒྱུད་སྨད་གྲྭ་ཚང་གི་སྐུ་ཚབ་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
ཕྱི་ཚེས་ ༩ ཉིན་༸གོང་ས་མཆོག་སེ་ཕུ་གྷ་ཀུན་བུའི་སློབ་གྲྭར་ (Siefu Gakuen Boys High School) (What one would hope for the Young people to do) གཞོན་སྐྱེས་ཚོར་རེ་བ་ཇི་ཡོད། ཅེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་པ་མ་ཟད། རྒྱུད་སྨད་གྲྭ་ཚང་གི་སྦྱིན་བདག་ཆེ་གྲས་མ་ཡེ་དྷོ་ཀའི་ཆོས་ཚོགས་ (Myodokai Center) སུ་ཆིབས་སྒྱུར་བསྐྱང་རྒྱུ་ཡིན་འདུག དེ་རྗེས་སོ་ཏོ་ཆོས་ལུགས་ཀྱི་ (Soto Sect) རི་ནན་ཇི་དགོན་པར་ (Rinnaji Temple) ཆིབས་སྒྱུར་གྱིས་བྱམས་བརྩེའི་བརྒྱུད་སྙིང་སྟོབས་སྐྲུན་ཐབས། (Strength through Compassion) ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་ཡིན་འདུག
