༢༠༡༤ ཟླ་ ༤ ཚེས་ ༡༤ རེས་གཟའ་ཟླ་བ།
༄༅། །ཕྱི་ལོ་ ༢༠༡༤ ཟླ་ ༤ ཚེས་ ༡༣ །༡༤ 
བཅས་ཉིན་གཉིས་རིང་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོང་ཁྱེར་ཀོ་ཡ་སན་ནང་རྟེན་གཞི་བྱས་པའི་ཀོ་ཡ་སན་གཙུག་ལག་སློབ་ཁང་ KOYASAN UNIVERSITY ནང་བློ་སྦྱོང་ཚིགས་བརྒྱད་མ་དང་ལམ་རིམ་བསྡུས་དོན་སོགས་ཆོས་འབྲེལ་དང་བཀའ་དབང་སོགས་སྩོལ་བཞིན་པའི་སྐབས་ལྷོ་ཀོ་རི་ཡའི་དད་ལྡན་ཁག་གཅིག་གིས་ཇི་ལྟར་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་ཐོབ་སྟེ་མཇལ་ཁ་དང་བཀའ་སློབ་སྩལ་དོན། བོད་པ་དང་ཀོ་རི་ཡ་གཉིས་སྟོན་པ་བཅོམ་ལྡན་འདས་ཀྱི་རྗེས་འཇུག་ཡིན་པ་གཅིག་པ་ཡིན། དེར་བརྟེན་བཅོམ་ལྡན་འདས་ཀྱི་བཀའ་དང་བཀའི་དགོངས་པ་རྒྱ་གར་གྱི་དཔལ་ན་ལེནྜའི་མཁས་པས་མཛད་པའི་འགྲེལ་བ་རྣམས་ལ་སློབ་སྦྱོང་བྱ་རྒྱུ་ཧ་ཅང་གལ་ཆེན་པོ་ཆགས་ཡོད། ང་ཚོས་ནང་ཆོས་དང་དེང་དུས་ཤེས་ཡོན་ཟུང་འབྲེལ་ཐོག་ནས་དུས་རབས་ ༢༡ ནང་པ་ཞིག་ཆགས་ཐབས་བྱེད་དགོས། ནང་ཆོས་ནས་གསུང་པའི་ཚན་རིག་དང་དེང་དུས་ཀྱི་ཚན་རིག་དབར་འབྲེལ་བ་བྱས་ནས་འཛམ་གླིང་བདེ་སྐྱིད་ལྡན་པ་ཞིག་བཟོ་ཐུབ་རྒྱུའི་ནུས་པ་ཡོད། ཅེས་སོགས་ཀྱི་བཀའ་སློབ་སྩལ་བསྟུན། དྲི་བ་ཡོད་མེད་བཀའ་བརྩད་མཛད་སྐབས་ཚོགས་བཅར་བ་རྣམས་ཀྱིས་མགྲིན་གཅིག་ཏུ་༸གོང་ས་མཆོག་ཀོ་རི་ཡར་གདན་འདྲེན་ཞུ་རྒྱུའི་མདུན་པ་ཤུགས་ཆེ་ཡོད་སྐོར་ཞུ་སྐབས་༸གོང་ས་མཆོག་གིས་བཀའ་ལན་ཕེབས་དོན། འདས་པའི་ལོ་མང་རིང་ཀོ་རི་ཡའི་ཆོས་གྲོགས་ཚོས་ངོས་རང་མགྲོན་འབོད་བྱ་རྒྱུའི་ཐབས་ཤེས་གང་མང་གནང་ཡོད། འོན་ཀྱང་ངོས་རང་ཀོ་རི་ཡར་འགྲོ་ཐུབ་མིན་དེ་ཡུལ་དེའི་སྲིད་གཞུང་གི་ཆབ་སྲིད་དང་དཔལ་འབྱོར་གྱི་གནས་བབ་ཐོག་བསམ་བློ་བཏང་ནས་ཐག་གཅོད་བྱེད་དགོས་པ་ཆགས་ཡོད། ནང་པའི་རྒྱལ་ཁབ་མང་པོ་ཞིག་ཡོད་ཁོངས་ནས་ངོས་རང་དཀའ་ངལ་གང་ཡང་མེད་པར་ཡོང་ཐུབ་ཡུལ་ནི་ཉི་ཧོང་གཅིག་པུ་ཡིན། ངོས་རང་ནང་པ་སངས་རྒྱས་པ་ཞིག་ཡིན་ནའང་ནང་པའི་རྒྱལ་ཁབ་ནང་འགྲོ་ཐུབ་ཀྱི་མེད། ཅེས་བཀའ་ལན་སྩལ་བ་དང་སྦྲགས། ལྷན་རྒྱས་སྐུ་པར་ཡང་བསྒྲོན་གནང་མཛད་ཡོད།
