༢༠༡༤ ཟླ་ ༤ ཚེས་ ༡༠ རེས་གཟའ་ཕུར་བུ།

༄༅། །ཕྱི་ལོ་ ༢༠༡༤ ཟླ་ ༤ ཚེས་ ༩ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཉི་ཧོང་གི་གྲོང་ཁྱེར་ཨོ་ས་ཀའི་ནང་རྟེན་གཞི་བྱས་པའི་ཉི་ཧོང་གི་སི་ཕུ་གྷ་ཀེན་བུའི་སློབ་གྲྭར་ (Siefu Gakuen Boys High School) (What one would hope for the Young people to do) གཞོན་སྐྱེས་ཚོར་རེ་བ་ཇི་ཡོད། ཅེས་པའི་བརྗོད་གཞིའི་ཐོག་བཀའ་སློབ་སྩལ་དོན། དེ་རིང་སླར་ཡང་འདི་གར་ཐེངས་ཤིག་བསླེབས་ཐུབ་པར་ཧ་ཅང་དགའ་པོ་བྱུང་། སྤྱིར་བཏང་ང་ཚོས་དུས་རབས་ཉི་ཤུ་པའི་ནང་ང་དང་ཁྱོད། ཅེས་ཧ་ཅང་གི་བདག་འཛིན་བྱས་ཏེ་གོ་ལག་མང་པོ་བཟོས་ཡོད།

ང་ཚོས་དུས་རབས་ཉེར་གཅིག་གི་འགོ་སྟོད་ལ་ད་དུང་མུ་མཐུད་འཁྲུག་པ་མང་པོ་བརྒྱབ་སྟེ། མི་གསོད་ཁྲག་སྦྱོར་ཡོང་གི་ཡོད་པ་དེ་ནི་དུས་རབས་ ༢༠ པའི་ནང་འཐུས་ཤོར་ཕྱིན་པའི་རྟགས་མཚན་རེད། འོན་ཀྱང་དེ་ལྟར་མི་རེ་ཟུང་ཞིག་གིས་བྱས་པ་རེད། ཅེས་མཛུབ་མོ་འཛུགས་ཡུལ་མེད། དཔེར་ན། ཨི་ཛི་རལ་དུ་ཕྱི་ལོ་ ༡༩༤༨ ལོ་ནས་བཙན་འཛུལ་གྱི་གནས་ཚུལ་བྱུང་བ་རེད། ཕྱོགས་གཉིས་ཀ་ནས་ང་ཚོ་མཉམ་དུ་མ་བསྡད་ཀ་མེད་རེད། ཅེས་བརྗོད་དེ་ཁྱིམ་མཚེས་བཟང་པོའི་འདུ་ཤེས་ཁྱེར་ནས་བསྡད་ན་དཀའ་ངལ་ཏན་ཏན་སེལ་ཐུབ་ཀྱི་རེད། གཅིག་གིས་གཅིག་ལ་ང་དང་ཁྱོད་ཅེས་མཁྲེགས་པོ་བྱས་ཏེ་བསྡད་ན་དཀའ་ངལ་མུ་མཐུད་གནས་ཀྱི་རེད། གང་ལྟར་དུས་རབས་ ༢༠ པའི་ནང་ལྷོད་གཡེང་དུ་ཕྱིན་པའི་འབྲས་བུས་ཕོངས་ཀྱི་ཡོད་སྟབས། དེར་སྐྱོན་བརྗོད་བྱས་ཏེ་བསྡད་པས་འགྲིག་ཐབས་མེད། དུས་རབས་ ༢༡ པའི་ནང་དེ་ལྟར་མི་ཡོང་རྒྱུའི་ཐབས་ཤེས་དང་འབད་བརྩོན་བྱེད་དགོས།

དེ་བཞིན་མི་དང་མིའི་དབར་འབྲེལ་བ་བྱེད་རྒྱུ་ཧ་ཅང་གལ་ཆེན་པོ་རེད།

དེར་བརྟེན་ངོས་ཀྱིས་ནམ་རྒྱུན། དུས་རབས་ ༢༠ པ་དེ་འཚེ་བའི་དུས་རབས་ཤིག་ཆགས་ཡོད། དུས་རབས་ ༢༡ པ་འདི་བཞིན་གྲོས་མོལ་གྱི་ལམ་ནས་དཀའ་ངལ་སེལ་ཐབས་བྱ་རྒྱུའི་དུས་རབས་ཤིག་ཆགས་ཡོད། ཅེས་རྗོད་བཞིན་ཡོད། ལྷག་པར་དཔལ་ན་ལེནྡྲའི་ཆོས་བརྒྱུད་འཛིན་མཁན་གྱི་སློབ་མ་ཞིག་ཡིན་པའི་ཆ་ནས་སྟོང་ཉིད་ཀྱི་ལྟ་བ་དང་བྱང་ཆུབ་ཀྱི་སེམས་ཉམས་ལེན་གཙོ་བོ་བྱེད་དགོས། སྤྱིར་བཏང་ཆོས་ལུགས་ལྟ་གྲུབ་མི་འདྲ་བའི་ཐོག་ནས་འགྲེལ་བཤད་མི་འདྲ་བ་ཡོང་གི་རེད། ནང་པ་སངས་རྒྱས་པའི་ཆོས་ཀྱི་ཐོག་ནས་བཤད་ན། ཇི་སྲིད་རྣམ་པར་ཤེས་པའི་ལུས་རྟེན་འདི་གནས་རིང་ལ་ཚེའམ་སྲོག་ཅན་ཡིན།

བརྙན་འཕྲིན་གཟིགས་ཆེད་འདིར་གནོན།

རྣམ་པར་ཤེས་པ་འདི་ཡུལ་ནས་བྲལ་ན་རྟེན་དང་བརྟེན་པའི་འབྲེལ་བ་ཆད་འགྲོ་གི་ཡོད། ཅེས་གསུང་གི་ཡོད། ལྷག་པར་ད་ལྟའི་དུས་རབས་འདིའི་འགོ་ཁྲིད་ཚོ་དངོས་པོ་ཁོ་ནར་དམིགས་པའི་ཤེས་ཡོན་སློབ་གསོའི་ནང་འཚར་ལོངས་བྱུང་ཡོད། འདི་ལྟ་བུའི་ཤེས་ཡོན་འོག་འཚར་ལོངས་བྱས་པའི་སྤྱི་ཚོགས་འདི་གཞི་རྩའི་ཆ་ནས་ཤེས་ཡོན་སྤྲོད་སྟངས་ལ་འགྱུར་བ་ཞིག་གཏོང་མ་ཐུབ་ན། མི་རེ་ཟུང་གིས་འགྱུར་བ་གཏོང་རྒྱུ་ཧ་ཅང་ཁག་པོ་རེད། ཇར་མན་གྱི་སློབ་དཔོན་ཁོང་ངོས་ཀྱི་གྲོགས་པོ་ཡིན། ཁོང་ལོ་གཞོན་དུས་ཇར་མན་གྱི་མིག་སྣང་ལ་ཕ་རན་སི་བརྗོད་ན་དགྲ་བོར་ངོས་འཛིན་བྱེད་ཀྱི་ཡོད། དེ་བཞིན་ཕ་རན་སིའི་མིག་སྣང་ལ་ཇར་མན་བརྗོད་ན་དགྲ་བོར་ངོས་འཛིན་བྱེད་ཀྱི་ཡོད། ཅེས་བརྗོད་བྱུང། མཐར་ཇར་མན་གྱི་སྲིད་འཛིན་ཐོག་མ་དང་ཕ་རན་སིའི་སྲིད་འཛིན་ཌོ་ཁོ་མཆོག་ཁོང་གཉིས་ཀྱིས་བསམ་བློ་བཏང་སྟེ་ཡུ་རོབ་སྤྱི་མཐུན་གྱི་ལྷན་ཚོགས་དབུ་འཛུགས་གནང་བ་རེད། ཅེས་སོགས་ཀྱི་བཀའ་སློབ་དང་སློབ་ཕྲུག་ཚོའི་དྲི་བར་བཀའ་ལན་སྩལ་ཡོད། །