༢༠༡༤ ཟླ་ ༤ ཚེས་ ༢༩ རེས་གཟའ་མིག་དམར།
༄༅། །འདི་གའི་ཆེད་གཉེར་གསར་འགོད་པ་ཡེ་ཤེས་
ཀུན་གྲགས་ལགས་ཀྱིས་ཅོན་ཏ་ར་ནས་བཏང་གནས་ནང་འཁོད་དོན། ཕྱི་ལོ་ ༢༠༡༤ ཟླ་ ༤ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་སྦིར་ཅོན་ཏ་རར་རྟེན་གཞི་བྱས་པའི་སྔ་འགྱུར་རྙིང་མའི་དགོན་པ་ཟབ་གསང་ཆོས་འཁོར་གླིང་གསར་བཞེངས་ལེགས་གྲུབ་ཀྱི་དབུ་འབྱེད་མཛད་གྲུབ་མཚམས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེང་གེ་མཆོག་གིས་དེར་འདུས་གྲྭ་བཙུན་དང་སློབ་ཕྲུག་མི་དམངས་སོགས་ཁྱོན་མི་གྲངས་ ༥༠༠༠ བརྒལ་བ་རྣམས་ལ་གསུང་བཤད་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལྷ་ཕྱག་གྲངས་མེད་སྔོན་དུ་བཏང་བའི་ཐོག་སྐྱབས་གནས་དགེ་འདུན་གྱི་སྡེ། ཉི་གྲགས་རིན་པོ་ཆེ་མཆོག་དང་ཤར་སྤྲུལ་རིན་པོ་ཆེ་མཆོག དེ་བཞིན་མཁན་བླ་སྤྲུལ་རྣམ་པ། མང་གཙོའི་ཀ་བ་གསུམ་གྱི་མཛད་གཙོ་རྣམ་པ། མི་དམངས་རྣམ་པ། སློབ་ཕྲུག་རྣམ་པ་ཡོངས་ལ་བཀའ་ཤག་སྐབས་བཅུ་བཞི་པའི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། དེ་རིང་སྔ་འགྱུར་ཟབ་གསང་ཆོས་འཁོར་གླིང་གསར་བཞེངས་གྲུབ་པའི་དབུ་འབྱེད་ཉིན་མོར་བཀའ་ཤག་ནས་སྦྱིན་བདག་དང་འབྲེལ་ཡོད་ལས་བྱེད་རྣམ་པར་བསྔགས་བརྗོད་ཞུ་རྒྱུ་ཡིན།
སྤྱིར་བཏང་རྙིང་མའི་ཆོས་བརྒྱུད་རྫོགས་ཆེན་གྱི་དགོན་པ་ཞིག་རྒྱ་གར་དུ་བསྐྱར་གསོ་བྱེད་ཐུབ་པ་དེ་ནི་ཧ་ཅང་ཡག་པོ་རེད། ལོ་རྒྱུས་ཐོག་ང་ཚོ་བོད་ནང་གི་སྐྱེས་ཆེན་དམ་པ་ཚོས་རྒྱ་གར་དུ་ཕེབས་པ་ཙམ་མ་ཟད། དེ་ནས་ནང་པ་སངས་རྒྱས་པའི་ཆོས་བོད་དུ་གདན་འདྲེན་ཞུས་ཏེ་བསྟན་པ་དར་རྒྱས་བྱུང་ཡོད། འཛམ་གླིང་འདིའི་ནང་ངོམས་སུ་ཆོག་པ་ནི་ནང་པ་སངས་རྒྱས་པའི་ཆོས་དང་རིག་གཞུང་སྐད་ཡིག་རྣམས་ཆགས་ཡོད། དེ་དག་ནི་གཙོ་བོ་༸གོང་ས་༸སྐྱབས་མགོན་ཆེན་པོ་མཆོག་གི་མཛད་འཕྲིན་དང་། དེ་བཞིན་བླ་སྤྲུལ་རྣམ་པ་དང་དགེ་འདུན་རྣམ་པས་འཛམ་གླིང་ས་ཕྱོགས་གང་དུ་བསྐྱོད་དེ་ནང་པའི་སངས་རྒྱས་པའི་ཆོས་དང་རིག་གཞུང་སྐད་ཡིག་རྣམ་དར་སྤེལ་གནང་བར་བརྟེན་ནས་འཛམ་གླིང་སྡིངས་ཆའི་ཐོག་བོད་པ་ཞེས་བརྗོད་སྐབས་ཡ་རབས་སྤྱོད་བཟང་ལྡན་པ་ཞིག་ཏུ་ངོས་འཛིན་བྱེད་ཀྱི་ཡོད། ཆོས་ཕྱོགས་ཐོག་ནས་འཛམ་གླིང་ནས་ང་ཚོར་བསྔགས་བརྗོད་བྱེད་མཁན་མང་པོ་ཞིག་ཡོད་ཀྱང་དེང་དུས་ཤེས་ཡོན་ཐོག་ནས་ང་ཚོའི་སྤྱི་ཚོགས་ནང་སྔར་ལྷག་ཡར་རྒྱས་གཏོང་དགོས་པའི་གནས་སྟངས་མང་དག་ཅིག་ཡོད།
ཕྱི་ལོ་ ༢༠༠༨ ལོའི་དམིགས་བསལ་ཚོགས་ཆེན་སྐབས་༸གོང་ས་༸སྐྱབས་མགོན་ཆེན་པོ་མཆོག་གིས། ཐོག་མར་ང་ཚོ་བཙན་བྱོལ་དུ་འབྱོར་ནས་ལོ་བཅུ་ཉི་ཤུའི་རིང་འཐོམས་མ་སངས་པའི་གནས་སྟངས་བྱུང་ཡོད་སྲིད། འོན་ཀྱང་ལོ་སུམ་ཅུའི་ནང་ང་ཚོས་ཤེས་ཡོན་ཐོག་འཐུས་ཤོར་བཏང་འདུག་ཅེས་བཀའ་སློབ་ཕེབས་ཡོད་པ་ལྟར། བཀའ་ཤག་གིས་ཤེས་ཡོན་གལ་ཆེ་ཤོས་སུ་ངོས་འཛིན་དང་འབྲེལ་འབད་བརྩོན་བྱེད་བཞིན་ཡོད་ལ་གྲུབ་འབྲས་ཀྱང་མི་དམན་པ་ཞིག་ཐོན་ཡོད་སྙམ་གྱི་འདུག དེ་བཞིན་བོད་ནང་གི་བོད་མིའི་མངོན་འདོད་བསྒྲུབ་རྒྱུའི་འགན་འཁྲི་ང་ཚོ་བཙན་བྱོལ་དུ་ཡོད་པའི་བོད་མིར་ཡོད་སྟབས། ང་ཚོའི་ནུས་པ་ཆ་ཚང་འདོན་ཐུབ་རྒྱུར་ཤེས་ཡོན་གྱི་ཐབས་ལམ་ལས་བཟང་བ་ཞིག་མེད་པ་ཧ་ཅང་གསལ་པོ་རེད། ང་ཚོའི་རྩ་དོན་རྩོད་རྒྱུའི་ལངས་ཕྱོགས་ནི་འཚེ་མེད་ཞི་བ་དང་དབུ་མའི་ལམ་ལ་འགྱུར་བ་མེད། དབུ་མའི་ལམ་ནི་༸གོང་ས་༸སྐྱབས་མགོན་ཆེན་པོ་མཆོག་གིས་དབུས་བཙན་བྱོལ་ནང་གི་གནད་ཡོད་མི་སྣ་མང་པོ་ཞིག་གིས་བཀའ་བསྡུར་རིམ་པ་མཛད་པ་དང་། བོད་མི་མང་སྤྱི་འཐུས་ནས་སྤྱི་མོས་ཐོག་གཏན་ལ་ཕབ་པའི་སྲིད་བྱུས་ཤིག་ཆགས་ཡོད། དེ་བཞིན་ཉེ་ཆར་༸གོང་ས་༸སྐྱབས་མགོན་ཆེན་པོ་མཆོག་དང་ཨ་རིའི་སྲིད་འཛིན་མཇལ་འཕྲད་མཛད་སྐབས་སྲིད་འཛིན་ཨོ་བྷ་མས་དབུ་མའི་ལམ་ལ་རྒྱབ་སྐྱོར་ཤུགས་ཆེན་པོ་ཡོད་སྐོར་ཞུས་ཡོད། ཅེས་སོགས་ཀྱི་གསུང་བཤད་གནང་།
