༢༠༡༤ ཟླ་ ༤ ཚེས་ ༢༢ རེས་གཟའ་མིག་དམར།

༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་སྨན་པ་བསོད་ནམས་དོན་གྲུབ་ལགས་དང་འཇིགས་མེད་སྐལ་བཟང་ལགས་གཉིས་སྦེལ་ཀོབ་འཚོ་བྱེད་ཁང་གསར་སྨན་ཁང་དང་ཀོ་ལེ་གྷལ་དོན་ལྡན་གླིང་གཞིས་ཆགས་ཀྱི་སྨན་ཁང་གི་སྨན་པར་བསྐོ་བཞག་གནང་ཡོད། དེ་ཡང་བསོད་ནམས་དོན་གྲུབ་ལགས་ཀྱིས་ཕྱི་ལོ་ ༢༠༡༤ ཟླ་ ༥ ཚེས་ ༥ ཉིན་ནས་སྨན་པའི་ལས་ཁུར་ཞུ་རྒྱུ་དང་། འཇིགས་མེད་སྐལ་བཟང་ལགས་ཀྱིས་ཕྱི་ལོ་ ༢༠༡༤ ཟླ་ ༣ ཚེས་ ༡༡ ཉིན་སྨན་པའི་ལས་ཁུར་ཞུས་ཡོད།

སྨན་པ་བསོད་ནམས་དོན་གྲུབ་ལགས་ནི་ཨ་རིའི་སི་ཊོན་ནི་བྷུ་རུཀ་གཙུག་ལག་སློབ་གྲྭ་ Stony Brook University ནས་སྤྱི་ཚོགས་འཕྲོད་བསྟེན་ཐོག་གཙུག་ལག་རབ་འབྱམས་པ་ལེགས་པར་ཐོན་རྗེས་འདི་ལོར་ཕྱིར་འཁོར་ཡོད་པ་དང་། ཁོང་གིས་དེ་སྔ་མོན་གྷོ་འདོད་རྒུ་གླིང་གཞིས་ཆགས་དང་སྦིར་སྨན་ཁང་དུ་སྨན་པ་གནང་མྱོང་ཡོད། ཕྱོགས་མཚུངས་འཇིགས་མེད་སྐལ་བཟང་ལགས་ནི་སྔ་ལོར་ལྡི་ལིར་རྟེན་གཞི་བྱས་པའི་མོ་ལ་ན་ཨ་ཛཱ་དི་སྨན་པའི་མཐོ་སློབ་Mulana Azad Medical College ནས་སྨན་པའི་སློབ་སྦྱོང་ MBBS ལེགས་པར་ཐོན་རྗེས་ཐོག་མར་སྦེལ་ཀོབ་འཚོ་བྱེད་ཁང་གསར་སྨན་ཁང་དུ་ཉམས་མྱོང་བརྗེ་ལེན་ཆེད་ཞབས་ཞུ་གནང་སྟེ་རྗེས་ཕྱི་ལོ་ ༢༠༡༤ ཟླ་ ༦ ཚེས་ ༡ ནས་ཀོ་ལེ་གྷལ་དོན་ལྡན་གླིང་བོད་མིའི་གཞིས་ཆགས་སུ་སྨན་པའི་ལས་ཁུར་དངོས་སུ་དབུ་འཛུགས་གནང་རྒྱུ་ཡིན་འདུག བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱི་སྨན་པའི་ཟུར་བཅད་ཞབས་སྟེགས་ཐོག་སྨན་པའི་སློབ་སྦྱོང་གནང་ནས་ཕྱིར་འཁོར་མཚམས་གན་རྒྱའི་འབྲུ་དོན་ལྟར་འཕྲོད་བསྟེན་ལས་ཁུངས་སུ་ཉུང་མཐར་ལོ་གསུམ་ཞབས་ཞུ་བསྒྲུབ་དགོས།

སྤྱིར་བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱིས་རྒྱ་གར་དང་བལ་ཡུལ་ནང་སྨན་ཁང་ཆེ་བ་བདུན་དང་། སྨན་ཁང་ཆུང་འབྲིང་བསྡོམས་ ༤༣ ཡོད། བོད་མིའི་སྒྲིག་འཛུགས་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་སྨན་པ་རྣམ་གཉིས་ལ་ལས་དོན་དོན་འཁྱོལ་ཡོང་བའི་འཚམས་འདྲི་ཞུས་པ་དང་སྦྲགས། ད་ལྟ་སྨན་པའི་སློབ་སྦྱོང་གནང་བཞིན་པའི་བོད་རིགས་སློབ་མ་རྣམས་ལ་སྨན་སློབ་ MBBS ཐོན་རྗེས་བོད་པའི་སྤྱི་ཚོགས་ཁྲོད་ཞབས་ཞུ་བསྒྲུབ་དགོས་པའི་འབོད་སྐུལ་ཡང་གནང་ཡོད། ད་སྐབས་འཕྲོད་བསྟེན་ལས་ཁུངས་འོག་བོད་མི་ཕྱི་ལུགས་སྨན་པ་བདུན་ཡོད་ཀྱང་ད་དུང་མིའོ། ཨོ་ཌི་ས། མན་པར། ཧོན་སུར། ལ་དྭགས། བྷན་ད་ར། མོན་གྷོ་བཅས་སུ་ཕྱི་ལུགས་སྨན་པ་རེ་རེ་ཛ་དྲག་དགོས་ངེས་ཆགས་ཡོད། ད་ཆར་བྷི་ཀ་ནེར་དང་སིམ་ལ། ཀངྒ་ར། ཀོལ་ཀ་ཊ་བཅས་སུ་བོད་རིགས་སྨན་པའི་སློབ་སྦྱོང་གནང་བཞིན་པ་སློབ་མ་བཅོ་བརྒྱད་ཡོད་པ་དང་། ཁོང་རྣམས་ཀྱིས་འཕྲོད་བསྟེན་ལས་ཁུངས་དང་གན་རྒྱ་བཞག་ཡོད།